കോപ്​ 28: 100 യുവ ​പ്രതിഭകൾക്ക്​ ക്ഷണം

ദുബൈ: യു.എ.ഇ ആതിഥേയത്വം വഹിക്കുന്ന ഈ വർഷത്തെ ആഗോള കാലാവസ്ഥ ഉച്ചകോടിയായ കോപ്​28ൽ പ​ങ്കെടുക്കാൻ​ വിവിധ രാജ്യങ്ങളിൽ നിന്നുള്ള 100 യുവ പ്രതിഭകളെ തെരഞ്ഞെടുത്തു. ഉച്ചകോടിക്ക്​ മുന്നോടിയായി ജർമനിയിലെ ബോണിൽ നടന്ന കാലാവസ്ഥ വ്യതിയാന സമ്മേളനത്തിലെ യൂത്ത്​ സ്​റ്റോക്​ടേക്​ സെഷനിലാണ്​ യുവ പ്രതിഭകളെ പ്രഖ്യാപിച്ചത്​​. വികസ്വര രാജ്യങ്ങളിൽ നിന്നുള്ളവരാണ് ഇതിൽ ഭൂരിഭാഗവും​​. ചെറു ദ്വീപ്​ രാജ്യങ്ങൾ, മധ്യപൂർവ ദേശം, തെക്കേ ആഫ്രിക്ക, ആഫ്രിക്കൻ ഭൂഖണ്ഡം, തെക്ക്​, വടക്ക്​ അമേരിക്ക, ഏഷ്യ, ഓഷ്യാനിയ എന്നിവിടങ്ങളിൽ നിന്നുള്ളവരാണ്​ 74 പേർ. ബാക്കിയുള്ളവർ വികസിത രാജ്യങ്ങളിൽ നിന്നാണ്​. അതോടൊപ്പം തെരഞ്ഞെടുക്കപ്പെട്ട 100ൽ 56 പേരും വനിതകളാണെന്നതും ഇത്തവണത്തെ പ്രത്യേകതയാണ്​.

12 പ്രതിനിധികൾ തദ്ദേശീയരാണ്​. സംഘർഷ മേഖലകളിൽ നിന്നുള്ളവരാണ്​ 10 പേർ. ആറു പേർ ഭിന്നശേഷി വിഭാഗത്തിൽ നിന്നാണ്​. 70 ശതമാനം പേരും 35 വയസ്സിൽ താഴേയുള്ളവരുമാണ്​.

അതേസമയം, 72 പേർ ആദ്യമായാണ്​ കാലാവസ്ഥ ഉച്ചകോടിയിൽ ക്ഷണതിക്കളാവുന്നത്​. യു.എ.ഇയുടെ സാമൂഹിക വികസന മന്ത്രിയും കോപ്​28ന്‍റെ യൂത്ത് ക്ലൈമറ്റ് ചാമ്പ്യനുമായ ഷമ്മ അൽ മസ്‌റൂയി, കോപ്പ്​ 28ന്റെ യുഎൻ കാലാവസ്ഥാ വ്യതിയാനത്തിന്റെ ഉന്നതതല അംഗവുമായ റസാൻ അൽ മുബാറക്, മറ്റ് കാലാവസ്ഥാ സംരക്ഷണ പ്രചാരകർ, യുവാക്കൾ എന്നിവരും ചടങ്ങിൽ പങ്കെടുത്തിരുന്നു. കാലാവസ്ഥ വ്യതിയാനവുമായി ബന്ധപ്പെട്ട്​ സുപ്രധാന ചർച്ചകൾക്ക്​ സാക്ഷ്യം വഹിക്കുന്ന ഉച്ചകോടിയിൽ യുവാക്കളുടെ സാന്നിദ്ധ്യം അനിവാര്യമാണെന്ന തിരിച്ചറിവിന്‍റെ അടിസ്ഥാനത്തിലാണ്​ വിവിധ രാജ്യങ്ങളിൽ നിന്നുള്ള യുവ പ്രതിഭകളെ ക്ഷണിച്ചിരിക്കുന്നതെന്ന്​ ഉച്ചകോടിയുടെ പ്രസിഡന്‍റ്​ ഡോ. സുൽത്താൻ അൽ ജാബിർ പറഞ്ഞു​. ഉച്ചകോടിയിലേക്ക്​ 100 യുവ പ്രതികളെ ക്ഷണിക്കുമെന്ന്​ കഴിഞ്ഞ മാർച്ചിൽ ഡോ. അൽ ജാബിർ പ്രഖ്യാപിച്ചിരുന്നു. നവംബർ 30 മുതൽ ഡിസംബർ 12 വരെ ദുബൈ എക്​സ്​പോ സിറ്റിയിൽ വെച്ചാണ്​ കോപ്​28 നടക്കുക.