ദുബൈ: ഗാർഹികപീഡനം, മനുഷ്യക്കടത്ത്, ഭീഷണി തുടങ്ങിയ അതിക്രമങ്ങൾ വാട്സ്ആപ് വഴിയും റിപ്പോർട്ട് ചെയ്യാൻ സൗകര്യം. ദുബൈ ഫൗണ്ടേഷൻ ഫോർ വുമൺ ആൻഡ് ചിൽഡ്രൻ (ഡി.എഫ്.ഡബ്ല്യു.എ.സി) ആണ് പരാതികൾ അറിയിക്കാനും സഹായം തേടാനും എളുപ്പമുള്ള സൗകര്യം ഏർപ്പെടുത്തിയത്. അതിക്രമങ്ങളുടെ ഇരകൾക്ക് മാനസികവും സാമൂഹികവും നിയമപരവുമായ സഹായങ്ങൾക്ക് അപേക്ഷിക്കാനും ഇത് ഉപയോഗിക്കാനാവും. ഫൗണ്ടേഷന്‍റെ സേവനങ്ങൾ സുഗമമാക്കാനും വേഗത്തിലാക്കാനും ലക്ഷ്യമിട്ടാണ് പദ്ധതി നടപ്പാക്കുന്നത്. 971-800-111 എന്ന ഹോട്ട്‌ലൈൻ നമ്പറിലെ വാട്സ്ആപ് വഴിയാണ് ഫൗണ്ടേഷനിലേക്ക് സന്ദേശമയക്കേണ്ടത്.
ഫൗണ്ടേഷന്‍റെ സേവനങ്ങൾ കൂടുതൽ പേരിലേക്കെത്തിക്കാനും ആശയവിനിമയം എളുപ്പമാക്കും സ്മാർട് ചാനലുകൾ സജീവമാക്കാനും ലക്ഷ്യംവെച്ചാണ് പുതിയ സേവനം ഒരുക്കിയതെന്ന് അധികൃതർ അറിയിച്ചു. വാട്സ്ആപ് സംവിധാനം ഫൗണ്ടേഷന്‍റെ പ്രതികരണ സമയം കുറക്കുമെന്നും സേവനങ്ങൾ സമയബന്ധിതമായി നൽകുന്നത് ഉറപ്പാക്കുമെന്നും ഡി.എഫ്.ഡബ്ല്യു.എ.സി ആക്ടിങ് ഡയറക്ടർ ജനറൽ ശൈഖ സഈദ് അൽ മൻസൂരി പറഞ്ഞു.
വെബ്സൈറ്റ് വഴിയും സമൂഹമാധ്യമങ്ങൾ വഴിയും നിലവിൽ ഫൗണ്ടേഷൻ സേവനങ്ങൾ നൽകി വരുന്നുണ്ട്. ഗാർഹികപീഡനം, കുട്ടികളെ ദുരുപയോഗം ചെയ്യൽ, മനുഷ്യക്കടത്ത് എന്നിവക്കെതിരെ യു.എ.ഇയിലെ സ്ത്രീകൾക്കും കുട്ടികൾക്കും സംരക്ഷണവും സഹായവും നൽകുന്നതിന് 2007ൽ സ്ഥാപിതമായ സംവിധാനമാണ് ഫൗണ്ടേഷൻ. സ്ത്രീകളുടെയും കുട്ടികളുടെയും സംരക്ഷണത്തിനായി പ്രത്യേകമായി പ്രവർത്തിക്കുന്ന യു.എ.ഇയിലെ ആദ്യത്തെ ലൈസൻസുള്ള കേന്ദ്രമാണിത്. അന്താരാഷ്ട്ര മനുഷ്യാവകാശ നിയമങ്ങൾക്ക് അനുസരിച്ച സേവനങ്ങളാണ് ഡി.എഫ്.ഡബ്ല്യു.എ.സി നൽകിവരുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.