ഫുജൈറ: ഫുജൈറ ഇന്‍റർനാഷനൽ അറേബ്യൻ ഹോഴ്‌സ് ചാമ്പ്യൻഷിപ് ഡിസംബര്‍ 19 മുതല്‍ 21വരെ ഫുജൈറ ഫോര്‍ട്ട്‌ അങ്കണത്തില്‍ നടക്കും. ഫുജൈറ കിരീടാവകാശി ശൈഖ് മുഹമ്മദ് ബിൻ ഹമദ് അൽ ഷർഖിയുടെ രക്ഷാകർതൃത്വത്തിലാണ് ചാമ്പ്യൻഷിപ്പിന്‍റെ ഒമ്പതാം പതിപ്പ് സംഘടിപ്പിക്കുന്നത്. ഇതോടൊപ്പം ഡിസംബർ 22ന് ഫുജൈറ ഡ്രെസേജ് ചാമ്പ്യൻഷിപ്പിന്‍റെ രണ്ടാം പതിപ്പും നടക്കും.
ബ്യൂട്ടി ചാമ്പ്യൻഷിപ്പിലും ഡ്രെസേജ് ചാമ്പ്യൻഷിപ്പിലുമായി ഏകദേശം 600 ഇനത്തിലുള്ള കുതിരകള്‍ പങ്കെടുക്കുമെന്ന് ഇന്‍റർനാഷനൽ അറേബ്യൻ ഹോഴ്‌സ് ചാമ്പ്യൻഷിപ് സംഘാടക സമിതി ചെയര്‍മാന്‍ ഡോ. അഹമ്മദ് ഹംദാൻ അൽ സെയൂദി പറഞ്ഞു.
എട്ടുവർഷമായി നടന്നുവരുന്ന ഇന്‍റർനാഷനൽ അറേബ്യൻ ഹോഴ്‌സ് ചാമ്പ്യൻഷിപ് വിശിഷ്ട കായിക കേന്ദ്രമെന്നനിലയിൽ ഫുജൈറയുടെ സ്ഥാനം ശക്തിപ്പെടുത്തുന്നതിനും ഇമാറാത്തി പൈതൃകത്തെ പരിചയപ്പെടുത്തുന്നതിലും മുഖ്യ പങ്കുവഹിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു.
ആദ്യ പതിപ്പ് നേടിയ വിജയം കണക്കിലെടുത്ത് നിരവധി രാജ്യങ്ങളിൽനിന്നുള്ള കുതിരകളെ പങ്കെടുപ്പിച്ച് ഇന്‍റർനാഷനൽ ഇക്വസ്ട്രിയൻ ഫെഡറേഷന്‍റെ മേൽനോട്ടത്തിൽ ഈ വർഷം ഷോ ജംപിങ് ചാമ്പ്യൻഷിപ്പും നടത്താന്‍ തീരുമാനിച്ചിട്ടുണ്ട്.
ഡ്രെസേജ് ചാമ്പ്യൻഷിപ് സംഘടിപ്പിക്കുന്നതുവഴി രാജ്യത്തിന്‍റെ വിവിധ ഭാഗങ്ങളിൽനിന്നുള്ള റൈഡർമാർക്ക് കുതിരസവാരി സാങ്കേതികതകളിൽ കഴിവുകളും പ്രാഗത്ഭ്യവും പ്രകടിപ്പിക്കാനും കുതിരകളെ പരിശീലിപ്പിക്കുന്നതിൽ കഴിവുകൾ ഉയർത്തിക്കാട്ടാനും സഹായിക്കും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.