യു.എ.ഇയിൽ നിക്ഷേപസൗഹൃദ അന്തരീക്ഷം –പി.ബി. അബ്​ദുൽ ജബ്ബാർ

ദുബൈ: യു.എ.ഇയിൽ നിക്ഷേപത്തിന്​ പൂർണമായും അനുകൂലമായ അന്തരീക്ഷമാണെന്നും ബിസിനസുകാരുടെ വിജയത്തിനും വളർച്ചക്കും എല്ലാ അവസരവും ഇവിടെ ലഭിക്കുന്നതായും ദുബൈ ആസ്ഥാനമായ ഭക്ഷ്യ പാക്കേജിങ്​ ഉൽപന്ന നിർമാണ-വിതരണ കമ്പനിയായ ഹോട്​പാക്ക് ഗ്ലോബൽ ഗ്രൂപ് മാനേജിങ്​ ഡയറക്​ടർ പി.ബി. അബ്​ദുൽ ജബ്ബാർ. ഇമാറാത്തി വാർത്ത ഏജൻസിയായ 'വാം'ന്​ നൽകിയ അഭിമുഖത്തിലാണ്​ അദ്ദേഹം യു.എ.ഇയിലെ നിക്ഷേപസൗഹൃദ അന്തരീക്ഷത്തെ പ്രകീർത്തിച്ചത്​.

മേഖലയിലെ അടിസ്ഥാന സൗകര്യവികസനത്തിൽ രാജ്യം മുന്നിലായത് വിദേശനിക്ഷേപം ആകർഷിക്കാൻ​ കാരണമാകുന്നു. രാജ്യനേതൃത്വത്തി​െൻറ ഉൾക്കാഴ്​ചയുള്ള സാമ്പത്തിക, രാഷ്​ട്രീയ കാഴ്​ചപ്പാടിൽ നിക്ഷേപകർ എന്നനിലയിൽ വലിയ ആത്മവിശ്വാസമുണ്ട്. ഇമാറാത്തിലെ മിക്ക ബിസിനസ് മേഖലകളും നല്ല വളർച്ചയിലാണ്​. ഒാരോ വർഷവും പുതിയ ബിസിനസുകാർ വിപണിയിൽ പ്രവേശിക്കുന്നു. പ്രാദേശികമായും അന്തർദേശീയമായും നിരവധി സംരംഭകരും നിക്ഷേപകരും തങ്ങളുടെ ബിസിനസ് വിപുലീകരണത്തിനായി ഇവിടെ കടന്നുവരുന്നു -അദ്ദേഹം ചൂണ്ടിക്കാട്ടി.

വ്യവസായമേഖലയിൽ കൂടുതൽ നിക്ഷേപം നടത്താൻ യു.എ.ഇ നിയമം ദേശീയ, വിദേശനിക്ഷേപകർക്ക് ശക്തമായ പ്രചോദനം നൽകുന്നു. നിരവധി ആഗോള സൂചകങ്ങളിൽ മുൻനിരയിലുള്ള രാജ്യങ്ങളിലൊന്നായി മാറുക മാത്രമല്ല, സർഗാത്മകതയിലും മികവിലും താൽപര്യമുള്ള എല്ലാവരെയും ആകർഷിക്കുകയും സ്വതന്ത്രമായ ജീവിതത്തി​െൻറയും സഹിഷ്​ണുതയുടെയും സവിശേഷമായ ജീവിതശൈലിയും രൂപപ്പെടുത്തിയതായി അദ്ദേഹം പറഞ്ഞു. കുറഞ്ഞ വാടക, തടസ്സമില്ലാത്ത വൈദ്യുതി, ജലവിതരണം, തുറമുഖങ്ങൾക്ക് സമീപം സ്ഥിതിചെയ്യുന്ന പ്രമുഖ സൈറ്റുകൾ, കാര്യക്ഷമമായ ആശയവിനിമയ ഇൻഫ്രാസ്ട്രക്​ചർ, നൂതന റോഡുകൾ, കരയിലൂടെയും കടലിലൂടെയുമുള്ള ഗതാഗത മാർഗങ്ങൾ, തൊഴിലാളികൾക്കുള്ള സേവനങ്ങൾ തുടങ്ങിയവ രാജ്യത്തൈ ആകർഷകമാക്കുന്ന സവിശേഷതകളാണ്​.

എ​െൻറ വിജയരഹസ്യം യു.എ.ഇയാണ്. അവസരങ്ങളുടെയും നന്മയുടെയും ദാനത്തി​െൻറയും സഹിഷ്​ണുതയുടെയും നാട്. രാജ്യം നിക്ഷേപപ്രക്രിയ സുഗമമാക്കുകയും എല്ലാ സംരംഭകർക്കും കമ്പനികൾക്കും കൂടുതൽ വിജയം നേടാൻ സഹായിക്കുന്ന അന്തരീക്ഷം ഒരുക്കുകയും ചെയ്​തു -അദ്ദേഹം പറഞ്ഞു.

1995ൽ സ്ഥാപിതമായ ഹോട്ട്പാക്ക് ഗ്ലോബലിന് പശ്ചിമേഷ്യ, ബ്രിട്ടൻ, ആഫ്രിക്ക എന്നിവിടങ്ങളിലും വിപുലമായ ശൃംഖലയുണ്ട്. ഡിസ്പോസിബിൾ പേപ്പർ കപ്പുകൾ, ഫുഡ് സ്​റ്റോറേജ് ബാഗുകൾ, പ്ലാസ്​റ്റിക് പ്ലേറ്റുകൾ, ട്രേകൾ, ക്ലിയർ കണ്ടെയ്​നറുകൾ, മൈക്രോവേവ് കണ്ടെയ്​നറുകൾ, ഭക്ഷ്യപാത്രങ്ങൾ തുടങ്ങി മൂവായിരത്തിലധികം ഉൽപന്നങ്ങൾ കമ്പനി വിതരണം ചെയ്യുന്നുണ്ട്​.