അബുദാബി: പ്രാദേശിക ഉൽ‌പ്പന്നങ്ങളെയും കൃഷിക്കാരെയും പിന്തുണക്കുന്നതിനായി യു.എ.ഇ.യിലെ എല്ലാ ലുലു ഹൈപ്പർ‌മാർക്കറ്റുകളിലും അൽ ഇമറാത്ത് അവ്വൽ (എമിറേറ്റ്‌സ് ഫസ്റ്റ്) പദ്ധതിക്ക് തുടക്കമായി. അബൂദബി ഇക്കണോമിക് ഡിപ്പാർട്ട്മെൻ്റ് ഡയറക്ടർ മുഹമ്മദ് അലി അൽ ഷൊർഫ, ദുബൈ ഇക്കണോമിക് ഡയറക്ടർ ജനറൽ സമി അൽ ഖംസി, അബൂദബി ഭക്ഷ്യസുരക്ഷ അതോറിറ്റി ഡയറക്ടർ ജനറൽ സയ്യിദ് അൽ ആമ്റി, ദുബൈ ഭക്ഷ്യ സുരക്ഷാ കമ്മിറ്റി ചെയർമാൻ ഉമർ ബുഷാബ് എന്നിവർ സംയുക്തമായാണ് പദ്ധതിയുടെ വെർച്ച്വൽ ഉദ്ഘാടനം നിർവ്വഹിച്ചത്. ലുലു ഗ്രുപ്പ് ചെയർമാൻ എം.എ.യൂസഫലി സന്നിഹിതനായിരുന്നു.
രാജ്യത്തിനകത്ത് മാത്രമല്ല, ജി.സി.സി തലത്തിലും പ്രാദേശിക ഉൽ‌പ്പന്നങ്ങൾ ഒരു വലിയ ഉപഭോക്തൃ അടിത്തറയിലേക്ക് വിപണനം ചെയ്യാൻ പദ്ധതി സഹായകരമാകുമെന്നും പ്രാദേശിക ഉല്പന്നങ്ങളെ പിന്തുണയ്ക്കുന്നതിന് ലുലു ഗ്രൂപ്പ് വലിയ പങ്കാണ് വഹിക്കുന്നതെന്നും മുഹമ്മദ് അലി ഷോർഫ പറഞ്ഞു.
ഭക്ഷ്യ സുരക്ഷയും പ്രാദേശിക ഉൽ‌പ്പന്നങ്ങളുടെ പിന്തുണയും ദുബൈയുടെ പ്രഖ്യാപിത സാമ്പത്തിക ലക്ഷ്യങ്ങളിലൊന്നാണെന്ന് സമി അൽ ഖംസി പറഞ്ഞു. ലുലു ഹൈപ്പർമാർക്കറ്റിെൻറ ഈ സംരംഭം സുസ്ഥിര കൃഷിയുടെ പുനരധിവാസത്തിലൂടെ യു.എ.ഇയുടെ സാമ്പത്തികവും സാമൂഹികവുമായ നേട്ടങ്ങൾ വർദ്ധിപ്പിക്കുന്നതിന് സഹായകമാകുമെന്ന് അദ്ദേഹം പറഞ്ഞു.
പ്രാദേശിക ഉൽപാദനത്തെ പിന്തുണയ്ക്കുന്നതിലും വിപണനം ചെയ്യുന്നതിലും കാർഷിക മേഖലയെ ശക്തിപ്പെടുത്തുന്നതിലും ലുലു ഹൈപ്പർമാർക്കറ്റ്മായി വർഷങ്ങളായി സഹകരിക്കുന്നുണ്ടെന്ന് സമി അൽ അമേരി പറഞ്ഞു.
യുഎഇയിലെ കാർഷിക ഉൽപന്നങ്ങളുടെയും വിവിധ ഭക്ഷ്യ ഉൽപന്നങ്ങളുടെയും വിപണനത്തിൽ ലുലു ഹൈപ്പർമാർക്കറ്റുകളുടെ പങ്കാളിത്തത്തിൽ ഏറെ അഭിമാനമുണ്ടെന്ന് ചടങ്ങിൽ സംസാരിച്ച ലുലു ഗ്രൂപ്പ് ചെയർമാൻ എം.എ.യൂസഫലി പറഞ്ഞു. പ്രാദേശിക കർഷകർക്കും ഉലപന്നങ്ങൾക്കും കൂടുതൽ പ്രാമുഖ്യം ലുലു ഹൈപ്പർ മാർക്കറ്റുകളിൽ ലഭിക്കുന്നതിനായി ഇത്തരത്തിലുള്ള കൂടുതൽ മേളകൾ സംഘടിപ്പിക്കുമെന്നും യൂസഫലി പറഞ്ഞു.
ലുലു ഹൈപ്പർമാർക്കറ്റ് നിരവധി പ്രാദേശിക കമ്പനികളുമായും കർഷകരുമായും നേരിട്ട് ബന്ധപ്പെട്ട് അവരുടെ ഉൽ‌പ്പന്നങ്ങൾ വിപണനം ചെയ്യുന്നതിനും പാക്കേജിംഗ്, മാർക്കറ്റിംഗ് എന്നിവയിൽ നിന്ന് ആവശ്യമായ പിന്തുണയും നൽകുന്നു. കാർഷികോത്പ്പന്നങ്ങൾ സായിദ് ഹയർ ഓർഗനൈസേഷൻ വഴി ലുലു ഹൈപ്പർമാർക്കറ്റുകളിൽ വിപണനം ചെയ്യുന്നുണ്ട്. ഇത് കൂടാതെ യു.എ.ഇ.യുടെ വിവിധ ഉല്പന്നങ്ങൾ ലുലു ബ്രാൻഡിൽ വിവിധ ലുലു ഹൈപ്പർമാർക്കറ്റുകളിൽ ലഭ്യമാക്കുന്നുമുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.