ദുബൈ: എമിറേറ്റിലെ ടോൾ കലക്ഷൻ സംവിധാനമായ 'സാലിക്' വിൽപനക്കുവെച്ച ഓഹരികളുടെ എണ്ണം വർധിപ്പിച്ചു. ഇനീഷ്യൽ പബ്ലിക് ഓഫറിങ്ങിലൂടെ (ഐ.പി.ഒ) വിൽക്കുന്ന ഓഹരികൾ 20 ശതമാനത്തിൽനിന്ന് 24.9 ശതമാനവുമായാണ് വർധിപ്പിച്ചത്. ഇതോടെ ആകെ 186 കോടി ഓഹരികൾ വിൽക്കും. നേരത്തേ, 150 കോടി ഓഹരികളാണ് വിൽക്കാൻ തീരുമാനിച്ചത്. നിക്ഷേപകരിൽനിന്ന് ഓഹരി വാങ്ങുന്നതിന് മികച്ച പ്രതികരണം ദൃശ്യമായതിനെ തുടർന്നാണ് ഐ.പി.ഒ വർധിപ്പിച്ചത്. ഇതോടെ നിലവിലുള്ള ഓഹരി മൂലധനത്തിന്‍റെ 75.1 ശതമാനമാണ് ദുബൈ സർക്കാറിന്‍റെ ഉടമസ്ഥതയിൽ തുടരുക.
ചൊവ്വാഴ്ച മുതൽ ആരംഭിച്ച വിൽപനയിൽ ഒരു ഓഹരിക്ക് രണ്ട് ദിർഹമാണ് വില നിശ്ചയിച്ചിരിക്കുന്നത്. സെപ്റ്റംബർ 20വരെയാണ് വിൽപന. വിൽപനക്കുശേഷം സെപ്റ്റംബർ 29ന് 'സാലിക്' ദുബൈ ഫിനാൻഷ്യൽ മാർക്കറ്റിൽ ലിസ്റ്റ് ചെയ്യും. ഓഹരി വിൽപനക്ക് മുമ്പായി ജൂണിൽ 99 വർഷത്തെ കാലാവധിയോടെ 'സാലിക്' പബ്ലിക് ജോയന്‍റ് സ്റ്റോക്ക് കമ്പനിയായി മാറിയിരുന്നു. എമിറേറ്റിൽ എട്ട് ടോൾ ഗേറ്റുകളാണ് കമ്പനി നടത്തുന്നത്. ദുബൈയിലെ ഏറ്റവും വലിയ ബാങ്കായ എമിറേറ്റ്‌സ് എൻ.ബി.ഡിയാണ് ഐ.പി.ഒയുടെ ലീഡ് സ്വീകരിക്കുന്ന ബാങ്ക്. അതിനിടെ യു.എ.ഇ സ്ട്രാറ്റജിക് ഇൻവെസ്റ്റ്‌മെന്‍റ് ഫണ്ട്, ദുബൈ ഹോൾഡിങ്, ഷമാൽ ഹോൾഡിങ്, അബൂദബി പെൻഷൻ ഫണ്ട് എന്നിവ കോർണർസ്റ്റോൺ നിക്ഷേപകരാക്കി സാലിക് കരാർ ഒപ്പുവെച്ചിട്ടുണ്ട്.
നിശ്ചിത എണ്ണം ഓഹരികൾക്ക് മുൻകൂട്ടി നിക്ഷേപിക്കുന്നവരാണ് കോർണർസ്റ്റോൺ നിക്ഷേപകർ. ഇവ ആകെ 60.6 കോടി ദിർഹമിന്‍റെ ഓഹരികൾ വാങ്ങാനാണ് സമ്മതിച്ചിട്ടുള്ളത്. ഫിനാൻഷ്യൽ മാർക്കറ്റിന്‍റെ വലുപ്പം വർധിപ്പിക്കുന്നതിനായി സർക്കാർ ഉടമസ്ഥതയിലുള്ള 10 കമ്പനികളെ ഓഹരി വിപണിയിൽ ലിസ്റ്റ് ചെയ്യുമെന്ന് കഴിഞ്ഞ നവംബറിൽ ദുബൈ പ്രഖ്യാപിച്ചിരുന്നു. മാർച്ചിൽ ദുബൈ ജല-വൈദ്യുത വകുപ്പായ 'ദേവ' ഐ.പി.ഒയിലൂടെ 22.41 ബില്യൺ ദിർഹം സമാഹരിച്ചിരുന്നു. 8.50 ബില്യൺ ഷെയറുകളാണ് 'ദേവ' വിറ്റത്. 'ദേവ'യുടെ ഷെയറുകൾ സ്വന്തമാക്കുന്നതിന് വലിയ പ്രതികരണം ദൃശ്യമായതിനെ തുടർന്ന് ഐ.പി.ഒ 17 ശതമാനം ഉയർത്തിയിരുന്നു. ബാക്കി 83 ശതമാനം ഷെയറും ദുബൈ സർക്കാർ ഉടമസ്ഥതയിലാണുള്ളത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.