അബൂദബിയിൽ നടന്ന ‘ഗൾഫ് മാധ്യമം’ ബിസിനസ് സമ്മിറ്റിൽ പങ്കെടുത്തവർ
അബൂദബി: യു.എ.ഇയിലെയും ഇന്ത്യയിലെയും ബിസിനസ് സാധ്യതകളുടെ പുതുവഴികൾ തേടുന്നവർക്ക് ആത്മവിശ്വാസത്തിന്‍റെ ചിറകുകൾ സമ്മാനിച്ച് ‘ഗൾഫ് മാധ്യമം‘ ബിസിനസ് സമ്മിറ്റിന്‍റെ ഒന്നാംഘട്ടം സമാപിച്ചു. അബൂദബി ഖലീഫ സ്ട്രീറ്റിൽ ലേ റോയൽ മെറിഡിയൻ ഹോട്ടലിൽ നടന്ന സമ്മിറ്റ് ‘ഗൾഫ് മാധ്യമം’ മിഡിൽ ഈസ്റ്റ് ഡയറക്ടർ മുഹമ്മദ് സലീം അമ്പലൻ ഉദ്ഘാടനം ചെയ്തു. ബിസിനസ് രംഗത്തെ പിന്തുണക്കുന്നതിന് ‘ഗൾഫ് മാധ്യമം’ പ്രതിജ്ഞാബദ്ധമാണെന്നും സംരംഭകരുടെ അനുഭവങ്ങളും നൂതനാശയങ്ങളും പങ്കുവെക്കുന്നതിനാണ് ഇത്തരം പരിപാടികളിലൂടെ ലക്ഷ്യംവെക്കുന്നതെന്നും അദ്ദേഹം പറഞ്ഞു. യു.എ.ഇയിലെ സംരംഭക രംഗത്തെ പ്രമുഖരായ ശാരിഖ് ശംസുദ്ദീൻ (ഫണ്ട്ഫോളിയോ), ഷാഹിദ് ഖാന (ഡിസക്സ്), മുഹമ്മദ് ശഫീഖ് (ഫിനാൻഷെൽസ്), ഉമർ അലി (സേഫ് കെയർ), ഷാലിമർ (സിൽവർ സ്റ്റോം), അജിൽ മുഹമ്മദ് (ഹൈലൈറ്റ്), മുസ്തഫ (സിൽവൻ), ജംഷീദ് ഹംസ (എതിക് കോർപ്) തുടങ്ങിയവർ വിവിധ വിഷയങ്ങളിൽ സദസ്സുമായി സംവദിച്ചു. റിയൽ എസ്റ്റേറ്റ് ഇൻവെസ്റ്റ്മെന്‍റ്, കോർപറേറ്റ് ടാക്സ്, ക്രിപ്റ്റോ കറൻസീസ്, സ്റ്റോക് ട്രേഡിങ്, ടൂറിസം, സ്റ്റാർട്ടപ്സ്, ഫ്രാഞ്ചൈസിങ് തുടങ്ങിയ വിഷയങ്ങളിൽ ക്രിയാത്മകമായ ആശയ കൈമാറ്റങ്ങൾക്കും സംവാദങ്ങൾക്കും ചർച്ചകൾക്കും സമ്മിറ്റ് വേദിയായി. പുതിയ കാലത്തെ ബിസിനസ് സാധ്യതകൾക്കൊപ്പം വിവിധ മേഖലകളിൽ ഉയർന്നുവരുന്ന വെല്ലുവിളികളെ നേരിടാനുള്ള പോംവഴികളും സമ്മിറ്റിൽ ചർച്ച ചെയ്തു. യു.എ.ഇയിൽ നടപ്പാക്കിയ കോർപറേറ്റ് ടാക്സ്, ഇന്ത്യ-യു.എ.ഇ സെപ കരാർ, ടൂറിസം നിക്ഷേപം, സ്റ്റാർട്ടപ്പുകളുടെ സാധ്യതകൾ, റിയൽ എസ്റ്റേറ്റ് മേഖലയിലെ മാറുന്ന നിയമങ്ങൾ എന്നിവയെ കുറിച്ച് പാനൽ ചർച്ചകൾ നടന്നു. പ്രമുഖ സംരംഭകരുടെ വിജയഗാഥകൾ യു.എ.ഇയിൽ പുതിയ ബിസിനസ് ആലോചിക്കുന്ന പുതുതലമുറക്ക് പ്രചോദനമായി. ജെ.ആർ. ഹാഷിം (‘ഗൾഫ് മാധ്യമം’ കൺട്രി ഹെഡ് ബിസിനസ് സൊലൂഷൻസ്, യു.എ.ഇ), കെ. ജുനൈസ് (കൺട്രി ഹെഡ് ബിസിനസ് മാധ്യമം), സാലിഹ് കോട്ടപ്പള്ളി (എഡിറ്റോറിയൽ ഹെഡ്, മിഡിൽ ഈസ്റ്റ്), എസ്.കെ. അബ്ദുല്ല (സീനിയർ മാനേജർ, സെയിൽസ് ആൻഡ് ബിസിനസ് സൊലൂഷൻ, ഗൾഫ് മാധ്യമം) തുടങ്ങിയവർ ഉപഹാരങ്ങൾ സമർപ്പിച്ചു. മിഡിൽ ഈസ്റ്റിലെ ഏറ്റവും വലിയ വ്യാപാര, വാണിജ്യ, സാംസ്കാരിക, കലാമേളയായ കമോൺ കേരളയോടനുബന്ധിച്ച് ‘ഗൾഫ് മാധ്യമം’ സംഘടിപ്പിച്ച നിക്ഷേപക ഉച്ചകോടി സംരംഭകരുടെ പങ്കാളിത്തംകൊണ്ട് വൻ വിജയമായിരുന്നു. ഇതിന്‍റെ തുടർച്ചയെന്നോണമാണ് യു.എ.ഇയിലെയും കേരളത്തിലെയും പുതിയ വ്യാപാര സാധ്യതകൾ തേടുന്ന ബിസിനസ് സമ്മിറ്റിന് ‘ഗൾഫ് മാധ്യമം’ വേദിയൊരുക്കിയത്.
സെപ്റ്റംബർ 14ന് ദുബൈ ശൈഖ് സായിദ് റോഡിലെ മെട്രോപൊളിറ്റൻ ഹോട്ടലിലാണ് ‘ഗൾഫ് മാധ്യമം’ ബിസിനസ് സമ്മിറ്റിന്‍റെ അടുത്ത ഘട്ടം നടക്കുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.