അത്ഭുതങ്ങൾ ഒളിപ്പിച്ച്​ മിറക്കിൾ ഗാർഡൻ തുറക്കുന്നു

ദുബൈ: ലോകത്തിലെ ഏറ്റവും വലിയ ഫ്ലവർ ഗാർഡനായ മിറക്കിൾ ഗാർഡ​െൻറ ഒമ്പതാം സീസണിന്​ ഞായറാഴ്​ച തുടക്കം. 120 വ്യത്യസ്​ത വിഭാഗങ്ങളിൽപെട്ട 150 ദശലക്ഷം പുഷ്​പങ്ങളാണ്​ ഈ സീസണി​െൻറ മുഖ്യ ആകർഷണം. ഗൾഫ്​ മേഖലയിൽ ഇതുവരെ കണ്ടിട്ടില്ലാത്ത പുഷ്​പങ്ങളും ഇക്കുറിയുണ്ടാവും. ദീപാലംകൃതമായ പാർക്കും അതിഥികളെ സ്വീകരിക്കാൻ ഒരുങ്ങിക്കഴിഞ്ഞു.

നടപ്പാതയിലൂടെ പുഷ്​പസൗന്ദര്യം ആസ്വദിക്കാൻ സന്ദർശകർക്ക്​ കഴിയും. ദിവ​േസനയുള്ള വിനോദ പരിപാടികൾക്കും ഈ ട്രാക്ക്​ ഉപയോഗിക്കും. പ്രധാന കവാടത്തിൽ ജനപ്രിയ കാർട്ടൂൺ കഥാപാത്രങ്ങൾ സ്വീകരിക്കാനുണ്ടാവും.

പൂവുകളാൽ നിർമിച്ച എമിറേറ്റ്​സ്​ എ 30 വിമാനത്തി​െൻറയും മിക്കി മൗസി​െൻറയും ഭീമൻ മാതൃകയും മിറക്കിൾ ഗാർഡ​െൻറ ആകർഷണമാണ്​. ഇവ രണ്ടും ഗിന്നസ്​ ബുക്കിൽ ഇടം നേടിയിട്ടുണ്ട്​. മുകളിലെത്തിയാൽ സന്ദർശകർക്ക്​ ഗാർഡ​െൻറ പൂർണ ചിത്രം എടുക്കാനാകും. ദുബൈലാൻഡിൽ 72,000 ചതുര​ശ്ര മീറ്ററിലാണ്​ ഗാർഡൻ. ഓരോ വർഷവും പുതുമകൾ സമ്മാനിക്കാൻ ശ്രമിക്കുന്നുണ്ടെന്നും ഇക്കുറിയും അതിന്​ കുറവില്ലെന്നും മിറക്കിൾ ഗാർഡൻ കോ ഫൗണ്ടറായ എൻജിനീയർ അബ്​ദുൽ നാസർ റഹാൽ പറഞ്ഞു. സർക്കാർ നിർദേശമനുസരിച്ചുള്ള എല്ലാ സുരക്ഷ മുൻകരുതലുകളും സന്ദർശകർക്ക്​ ബാധകമായിരിക്കും.