ദുബൈ: തൊഴിൽ നഷ്ടപ്പെടുന്നവർക്ക് ഏർപ്പെടുത്തിയ ഇൻഷുറൻസിനായി അപേക്ഷിക്കാനും ആനുകൂല്യം ഏറ്റുവാങ്ങാനും ജീവനക്കാരൻ യു.എ.ഇയിലുണ്ടാകണമെന്ന് നിർദേശം. നിയമം ദുരുപയോഗം ചെയ്യാതിരിക്കുന്നതിനാണ് നിർദേശം. ഇൻഷുറൻസിൽ ചേർന്ന് 12 മാസം പിന്നിടുന്നത് മുതലാണ് ആനുകൂല്യത്തിന് അർഹനാകുന്നത്. ഈ സമയത്ത് ജോലി നഷ്ടപ്പെട്ടാൽ ശമ്പളത്തിന്‍റെ 60 ശതമാനം തുക മൂന്നു മാസത്തേക്ക് ലഭിക്കും.
ഓരോ മാസവുമാണ് തുക നൽകുന്നത്. ഇത് നേരിൽ വാങ്ങാൻ ജീവനക്കാരൻ യു.എ.ഇയിലുണ്ടാവണം. ജോലി നഷ്ടപ്പെട്ടതിന്‍റെ പേരിൽ തൊഴിലുടമ വിസ റദ്ദാക്കിയാലും ആറു മാസം ഗ്രേസ് പിരീഡിൽ യു.എ.ഇയിൽ തങ്ങാനാകും. ഈ കാലയളവിൽ പുതിയ ജോലി അന്വേഷിക്കുന്നതിനാണ് ആനുകൂല്യം നൽകുന്നത്. ജീവനക്കാരൻ രാജ്യം വിടുകയോ മറ്റു ജോലി ലഭിക്കുകയോ ചെയ്താൽ ആനുകൂല്യം ലഭിക്കില്ല.
ജീവനക്കാർക്ക് മാസം അഞ്ച് ദിർഹം മുതൽ പ്രീമിയം അടച്ച് ഇൻഷുറൻസിന്‍റെ ഭാഗമാകാം. രണ്ടുതരം ഇൻഷുറൻസാണ് അവതരിപ്പിക്കുന്നത്. 16,000 ദിർഹം വരെ അടിസ്ഥാന ശമ്പളമുള്ളവർക്ക് മാസത്തിൽ അഞ്ച് ദിർഹം വീതം അടച്ച് ഇൻഷുറൻസിൽ ചേരാം. അല്ലെങ്കിൽ വർഷത്തിൽ 60 ദിർഹം അടക്കണം. 16,000 ദിർഹമിന് മുകളിൽ അടിസ്ഥാന ശമ്പളമുള്ളവർ മാസം 10 ദിർഹം വീതമോ വർഷത്തിൽ 120 ദിർഹമോ പ്രീമിയം അടക്കണം. ശമ്പളം 16,000 ദിർഹമിൽ താഴെയുള്ളവർക്ക് പരമാവധി പ്രതിമാസം 10,000 ദിർഹമാണ് ഇൻഷുറൻസായി ലഭിക്കുക. 16,000 ദിർഹമിന് മുകളിലുള്ളവർക്ക് പരമാവധി 20,000 ദിർഹം ലഭിക്കും. ജോലി നഷ്ടപ്പെട്ട് 30 ദിവസത്തിനുള്ളിൽ െക്ലയിമിനായി അപേക്ഷ സമർപ്പിക്കണം. രണ്ടാഴ്ചക്കുള്ളിൽ തുക ലഭിച്ച് തുടങ്ങും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.