ആദ്യ സഫാരി 'ഉരുണ്ടിറങ്ങി'; ഇനി ബുക്കിങ്ങിനായി കാത്തിരിപ്പ്​

ടാറ്റയുടെ പതാകവാഹകൻ എസ്​.യു.വി സഫാരിയുടെ ​ നിർമാണമാരംഭിച്ചു. പുനെയിലെ ഫാക്​ടറിയിൽനിന്നാണ്​ ആദ്യ സഫാരി പുറത്തെത്തിയത്​. ആദ്യ റോൾഔട്ട്​ വാഹനത്തി​ന്‍റെ ചിത്രം ടാറ്റ സമൂഹമാധ്യമങ്ങളിൽ പങ്കുവച്ചു. ഹാർബർ ബ്ലൂ നിറത്തിലുള്ള സഫാരിയാണിത്​. പുതിയ എസ്‌യുവിയുടെ ബുക്കിങ്​ ഉടൻ ആരംഭിക്കുമെന്ന്​ ടാറ്റ അധികൃതർ അറിയിച്ചു. ടാറ്റ ഹാരിയറിന്‍റെ ഏഴ്​ സീറ്റുകളുള്ള പതിപ്പാണ് പുതിയ സഫാരി.

ഓട്ടോ എക്‌സ്‌പോ 2020ൽ ഗ്രാവിറ്റാസ് എന്ന പേരിൽ ടാറ്റ പരിചയപ്പെടുത്തിയരുന്ന വാഹനമാണ്​ ഇപ്പോൾ സഫാരിയെന്ന പേരിൽ വിപണിയിലെത്തുന്നത്​. 170 എച്ച്പി ഡീസൽ എഞ്ചിൻ മാനുവൽ, ഓട്ടോ ട്രാൻസ്മിഷനുകളിൽ ലഭ്യമാകും. വാഹനത്തിന്‍റെ ഗ്രിൽ പുതിയതാണ്. സ്പ്ലിറ്റ് ഹെഡ്‌ലൈറ്റ് ക്ലസ്റ്ററുകളും ഡോർ ഹാൻഡിലുകളും ക്രോമിയത്തിലാണ്​ ഫിനിഷ്​ ചെയ്​തിരിക്കുന്നത്​. അലോയ്കൾ ഹാരിയറിന്​ സമാനമാണ്. പുതിയ സഫാരിക്ക് പനോരമിക് സൺറൂഫും ലഭിക്കുന്നു.

ഡിസൈനും മെക്കാനിക്കൽ പ്രത്യേകതകളും അഞ്ച് സീറ്റുകളുള്ള ഹാരിയറുമായി പങ്കിടുന്ന എസ്​.യു.വി കൂടിയാണിത്​. വാഹനത്തിന്‍റെ വില ഉടൻ പ്രഖ്യാപിക്കില്ലെന്നാണ്​ ടാറ്റ പറയുന്നത്​. മൂന്ന്​നിര സീറ്റുകളുള്ള സഫാരിക്ക്​​ ഹാരിയറിനേക്കാൾ ഉയരമുണ്ട്.ഹാരിയർ പോലെ മാനുവൽ, ഓട്ടോ ഓപ്ഷനുകളുള്ള 170 എച്ച്പി ഡീസൽ എഞ്ചിനായിരിക്കും വാഹനത്തിന്​. ഹാരിയറും സഫാരിയും ടാറ്റയുടെ ഒമേഗ പ്ലാറ്റ്ഫോമാണ്​ പങ്കിടുന്നത്​. മൂന്നാം നിര സീറ്റുകളെ ഉൾക്കൊള്ളുന്നതിന് ഹാരിയറിന്‍റെ നീളത്തിൽ​ നിന്ന്​ 63 മില്ലീമീറ്ററും ഉയരത്തിൽ 80 മില്ലീമീറ്ററും സഫാരിക്ക്​​ ടാറ്റ വർധിപ്പിച്ചിട്ടുണ്ട്​. 4,661 മില്ലീമീറ്റർ നീളവും 1,894 മില്ലീമീറ്റർ വീതിയും 1,786 മില്ലീമീറ്റർ ഉയരവും 2,741 മില്ലീമീറ്ററും വീൽബേസുമാണ്​ പുതിയ വാഹനത്തിനുള്ളത്​​.

രൂപത്തിൽ ഏകദേശം ഒരുപോലെയാണ്​ ഇരുവാഹനങ്ങളും. സഫാരിയും ഹാരിയറും തമ്മിലുള്ള മുൻവശത്തെ സ്റ്റൈലിംഗ് വ്യത്യാസങ്ങൾ സൂക്ഷ്മമാണ്​. എന്നാൽ ബി പില്ലർ മുതൽ സഫാരി​ വ്യത്യസ്തമാണ്​. ഇന്‍റീരിയറും മറ്റ്​ സവിശേഷതകളുടെ ലിസ്റ്റും സമാനമാകുമെന്ന് പ്രതീക്ഷിക്കുന്നു. ടാറ്റയുടെ ഏറ്റവും ഉയർന്ന എസ്‌യുവി എന്ന നിലയിൽ സഫാരിക്ക്​ ഹാരിയറിനേക്കാൾ വില കൂടുതലുണ്ടാകും. ഹാരിയറിന്‍റെ വില 13.84-20.30 ലക്ഷം രൂപയാണ്. ഏറ്റവും കുറഞ്ഞ മോഡൽ സഫാരിക്ക്​ 15 ലക്ഷം രൂപയാണ്​ പ്രതീക്ഷിക്കപ്പെടുന്നത്​.