പെട്രോളും ഡീസലും ആവശ്യക്കാർക്ക് നേരിട്ട് എത്തിച്ചുകൊടുക്കുന്ന സംവിധാനവുമായി സ്റ്റാർട്ടപ്പ്. ചെന്നൈ ആസ്ഥാനമായുള്ള ഗോ ഫ്യൂവൽ ആണ് ഉപഭോക്താക്കളുടെ വാതിൽപ്പടിയിൽ ഇന്ധനം എത്തിക്കുന്ന സംവിധാനം തുടങ്ങിയത്. രാജ്യത്തെ സ്ഫോടകവസ്തുക്കളുടെയും പെട്രോളിയം മേഖലകളുടെയും സുരക്ഷാ ആവശ്യകതകൾക്ക് മേൽനോട്ടം വഹിക്കുന്ന നോഡൽ ഏജൻസിയായ പെസോ (പെട്രോളിയം ആൻഡ് എക്സ്പ്ലോസീവ് സേഫ്റ്റി ഓർഗനൈസേഷൻ) അംഗീകരിച്ച ഇന്ത്യയിലെ ആദ്യത്തെ, ഒ‌എം‌സി ഇതര ബ്രാൻഡഡ് മൊബൈൽ ഇന്ധന വിതരണക്കാരനാണ് ഗോ ഫ്യൂവൽ.
ആദ്യം ചെന്നൈയിലായിരിക്കും ഗോ ഫ്യൂവൽ ഇന്ധന വിതരണം നടത്തുക. ഈ വർഷംതന്നെ കൂടുതൽ നഗരങ്ങളിലേക്ക് പ്രവർത്തനം വ്യാപിപ്പിക്കുമെന്നും ഗോ ഫ്യൂവൽ അറിയിച്ചു. കമ്പനിയുടെ മൊബൈൽ അപ്ലിക്കേഷൻ വഴി ഇന്ധനത്തിനായി ഓർഡർ ചെയ്യാനും കഴിയും. തൽക്കാലം വാണിജ്യ സ്ഥാപനങ്ങൾക്ക് മാത്രമാണ് ഇന്ധനം നൽകുകയെന്നും ഗോ ഫ്യൂവൽ പറയുന്നു. ഇന്ത്യൻ ഓയിൽ കോർപറേഷൻ, ഹിന്ദുസ്ഥാൻ പെട്രോളിയം, ഭാരത് പെട്രോളിയം എന്നിവയുൾപ്പെടെ രാജ്യെത്ത പ്രധാന ഓയിൽ കമ്പനികളിൽ നിന്ന് ഗോഫ്യൂൾ അതിന്‍റെ പ്രവർത്തനങ്ങൾക്ക് ലൈസൻസ് നേടിയിട്ടുണ്ട്. ഉപഭോക്താവിന് മികച്ച സൗകര്യമൊരുക്കുന്നതിലൂടെ കാർഷിക സമൂഹം ഉൾപ്പെടെയുള്ള വിവിധ വ്യവസായങ്ങളെ സഹായിക്കാൻ ഞങ്ങൾ ആഗ്രഹിക്കുന്നുവെന്ന് ഗോ ഫ്യൂവൽ സ്ഥാപകനും സിഇഒയുമായ വിനോദ്രാജ് പറഞ്ഞു.
പ്രവർത്തനരീതി
ഗോ ഫ്യൂവലിന്‍റെ സ്മാർട്ട്‌ഫോൺ അപ്ലിക്കേഷൻ വഴി ഉപഭോക്താക്കൾക്ക് ഡീസലിനായി ഓർഡർ ചെയ്യാം. മൂന്ന് ഒ‌എം‌സികളിൽ ഏതെങ്കിലും ഡിപ്പോകളിൽ നിന്നോ അംഗീകൃത റീട്ടെയിൽ സ്ഥലങ്ങളിൽ നിന്നോ സപ്ലൈകൾ ശേഖരിക്കുകയും ഉപഭോക്താവിന്‍റെ സ്ഥലത്ത് ഇന്ധനം എത്തിക്കുകയും ചെയ്യുന്ന ഒന്നിലധികം ഇന്ധന വിതരണ ട്രക്കുകൾ കമ്പനി നഗരത്തിൽ വിന്യസിച്ചിട്ടുണ്ട്. ഇന്ധന സ്റ്റേഷനുകളിലെ ഡീസലിന്‍റെ വിലതന്നെയായിരിക്കും ഇവിടേയും നൽകേണ്ടത്. ആദ്യഘട്ടത്തിൽ ഡെലിവറി ഫീസ് ഈടാക്കില്ല. വ്യവസായങ്ങൾ, നിർമ്മാണ പ്ലാന്‍റുകൾ, നിർമാണ സൈറ്റുകൾ, റെസിഡൻഷ്യൽ കോംപ്ലക്സുകൾ, ബാങ്കുകൾ, ആശുപത്രികൾ, മാളുകൾ, വെയർഹൗസുകൾ, കാർഷിക മേഖല തുടങ്ങിയ വാണിജ്യ സ്ഥാപനങ്ങൾക്ക് മാത്രമേ തുടക്കത്തിൽ സേവനം ലഭ്യമാവുകയുള്ളൂ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.