റോയൽ എൻഫീൽഡ്​ വാങ്ങുന്നുണ്ടോ? ഇൗ അഞ്ചുകാര്യങ്ങൾ തീർച്ചയായും അറിഞ്ഞിരിക്കണം

റോയൽ എൻഫീൽഡ്​ ​െബക്ക്​ വാങ്ങണമെന്നുണ്ടോ. ആദ്യം അറിയേണ്ടത്​ നിങ്ങൾ മഹാരഥന്മാർ സഞ്ചരിച്ച വഴിയിലൂടെയാണ്​ സഞ്ചരിക്കാൻ പോകുന്നത്​ എന്നാണ്​. 120 വർഷത്തെ പാരമ്പര്യത്തിലേക്കാണ്​ നിങ്ങൾ റോയലിലൂടെ കാലെടുത്തു​വയ്​ക്കുന്നത്​. യുദ്ധങ്ങളുടെ ചോരപുരണ്ട വഴികൾ അതിലുണ്ട്​, സഞ്ചാരികളുടെ ചരിത്രംപേറുന്ന വഴികളും. അങ്ങ്​ ഹിമാലയം മുതൽ ഇങ്ങ്​ കന്യാകുമാരിവരെ സഞ്ചരിക്കാനുതകുന്ന വാഹനമാണ്​ നിങ്ങൾ സ്വന്തമാക്കുന്നത്​.

ആധുനിക കാലത്തും റോയൽ വന്നവഴിയുടെ പ്രൗഡി ഉപേക്ഷിച്ചിട്ടില്ല. എങ്കിലും ഒരു ഹീറോ ഹോണ്ട സ്​പ്ലെൻഡർ വാങ്ങുന്ന ലാഘവത്തോടെ വാങ്ങാവുന്ന ബൈക്കല്ല ഇത്​. പണമുണ്ട്​ എന്നുകരുതിയും റോയൽ വാങ്ങാതിരിക്കുക. റോയലിനോട്​ പെരുമാറേണ്ടവിധം പെരുമാറിയാൽ അവൻ നിങ്ങൾക്ക്​ വിളക്കും വഴികാട്ടിയുമാകും. ഇല്ലെങ്കിൽ ബാധ്യതയും ഭാരവുമാകും.

റോഡിൽ പറപ്പിക്കാൻ റോയലിനെ വാങ്ങരുത്​

വെട്ടിത്തിരിഞ്ഞും വട്ടംകറക്കിയും റോഡിൽ മിന്നിക്കാനുള്ള വാഹനമല്ല റോയൽ എൻ​ഫീൽഡ്​. അതിനിവിടെ ഡ്യൂക്കും യമഹയും കാവാസാക്കിയുമൊക്കെ ഉണ്ട്​. റോയൽ എൻഫീൽഡുകൾ നല്ല ഒന്നാന്തരം ടൂറിങ്​ ക്രൂസറുകളാണ്​. പതിഞ്ഞ താളത്തിൽ തുടങ്ങി മുറുകിവരുന്ന മേളപ്പെരുക്കംപോലെ സുന്ദരമാണ്​ ഒാരോ എൻഫീൽഡ്​ യാത്രകളും. വെടിക്കെട്ടും താലപ്പൊലിയുമൊക്കെ അതിന്​പുറത്താണ്​ നടക്കുന്നത്​.

ലോങ്​ എൻഡ് ടോർക്കിന് പേരുകേട്ട ലോംഗ് സ്ട്രോക്ക് എഞ്ചിനുകളാണ്​ ഇൗ കൂറ്റന്മാർക്ക്​ കരുത്തുപകരുന്നത്​. ക്ലാസിക് 350 ന് 19.3 പി‌എസ് മാത്രമേ ഉള്ളൂവെങ്കിലും 28 എൻ‌എം എന്ന മികച്ച ടോർക്​ ഉണ്ടെന്നത്​ മറക്കരുത്​. മികച്ച ടോപ്പ് സ്പീഡോ ആക്‌സിലറേഷനോ ഇവർക്ക്​ ഉണ്ടാകണമെന്നില്ല. പക്ഷേ 70 മുതൽ 80 കിലോമീറ്റർ വരെ വേഗതയിൽ ക്രൂസ് ചെയ്യുന്നതാണ് ഇതിൽ സഞ്ചരിക്കുന്നവരുടെ ആഹ്ലാദം. അത്​ ഇഷ്​ടപ്പെടുന്നവർക്ക്​ റോയലി​െൻറ വഴിയേ പോകാവുന്നതാണ്​.

പഴയത്​ പേരും പാരമ്പര്യവും മാത്രം,​ വാഹനം പുതുപുത്തനാണ്​

അടുത്തകാലത്ത്​ വലിയരീതിയിൽ ആധുനീകരിച്ച വാഹനമാണ്​ എൻഫീൽഡ്​. എ.ബി.എസ്​ ബ്രേക്കിങ്​ പോലെ സുരക്ഷാസംവിധാനങ്ങൾ ഉൾപ്പെടുത്തിയാണ്​ പുതിയ ബൈക്കുകൾ നിരത്തിലെത്തുന്നത്​. എബി‌എസ് യൂനിറ്റ് മുന്നിലും പിന്നിലും ഉണ്ട്. കാർബറേറ്ററുകൾക്ക് പകരം ഫ്യൂവൽ ഇഞ്ചക്ഷൻ രീതിയാണ്​ നിലവിൽ കമ്പനി പിൻതുടരുന്നത്​. ബിഎസ് 6 എമിഷൻ മാനദണ്ഡങ്ങൾക്കനുസൃതമായാണ്​ ഇത്​. എഞ്ചിൻ കുറച്ചുകൂടി പരിഷ്​കൃതവും സുഗമവുമാണ്​. പഴയ ഒാർമകൾ പുതുക്കാൻ റോയൽ വാങ്ങി നിരാശപ്പെടേണ്ടതില്ല എന്നാണ്​ പറഞ്ഞുവരുന്നത്​. ഇന്ന്​ റോയൽ ഒാടിക്കുന്നത്​ ഒരു കലയോ വൈദഗ്​ധ്യമോ അല്ല. ഏതൊരു സാധാരണ വാഹനാനുഭവവുംപോൽ സാധാരണമാണത്​.

അൽപ്പം കരുതലും ശ്രദ്ധയും

ഒരുകാലത്ത്​ ഒരുപാട്​ പരിചരണം വേണ്ട വാഹനമായിരുന്നു റോയൽ എൻഫീൽഡ്​. യാത്രകൾ പൂർത്തയാക്കാതെ പാതിവഴിയിലാകുന്ന അനുഭവവും പതിവ്​. എന്നാൽ അതിനെല്ലാം മാറ്റം വന്നിട്ടുണ്ട്​. എങ്കിലും സാധാരണ വാഹനങ്ങൾക്ക്​ നൽകുന്നതിൽ അധികം സ്​നേഹവും കരുതലും നിങ്ങൾക്ക്​ റോയലിന്​ നൽകേണ്ടിവരും. ശരിയായി കൈകാര്യം ചെയ്യുന്നില്ലെങ്കിൽ ബുള്ളറ്റും ക്ലസിക്കുമെല്ലാം പ്രകോപിതരായേക്കാം. ഉടമയും വാഹനവും തമ്മിലുള്ള ഉൗക്ഷ്​മളമായ സ്​നേഹബന്ധം റോയലിനെ കൂടുതൽ മികവുള്ളവനാക്കും.

ദീർഘദൂര യാത്രകൾ ചെയ്യുന്ന റോയൽ റൈഡർമാർ സ്വന്തം ടൂൾകിറ്റ് കരുതാറുണ്ട്​. വാഹനത്തിന്​ വരുന്ന ചെറിയ പ്രശ്​നങ്ങൾ ഇവർതന്നെ പരിഹരിക്കുകയാണ്​ പതിവ്​. കാരണം നിങ്ങളുടെ യാത്രകൾക്കിടയിൽ ഒരുപക്ഷെ റോയൽ മാത്രമാകും ഒപ്പമുണ്ടാവുക. അവിടെ ഒരു മെക്കാനിക്കിനെ അന്വേഷിക്കുക അസാധ്യവും അസംഭവ്യവുമായിരിക്കും. റോയൽ‌ എൻ‌ഫീൽ‌ഡിനെ ഉറ്റ ചങ്ങാതിയാക്കാമെങ്കിൽ മാത്രം സ്വന്തമാക്കുക.

ആഡ്യത്വത്തി​െൻറ ഭാരം

റോയൽ എൻഫീൽഡ്​ ശ്രേണിയിലെ എല്ലാ ബൈക്കുകൾക്കും ഭാരം ഒരു പൊതുഘടകമാണ്​. നിലവിൽ, ഏറ്റവും ഭാരം കുറഞ്ഞ റോയൽ‌ എൻ‌ഫീൽ‌ഡ് ബൈക്ക്​ ബുള്ളറ്റ് 350 ആണ്. പക്ഷേ, ഇത് ഇപ്പോഴും 186 കിലോഗ്രാം എന്ന അക്കങ്ങളിലെത്തുന്ന സാമാന്യം ഭാരമേറിയ വസ്​തുവാണ്​. പുതിയ മോഡൽ ഹീറോ സ്​പ്ലെൻഡറിന്​ 109 കിലോഗ്രാം മാത്രമാണ്​ ഉള്ളതെന്നറിയുക. ഒരു പുതിയ റൈഡറെ സംബന്ധിച്ച്​ വാഹനം കൈകാര്യം ചെയ്യുക‌ ശ്രമകരമായിരിക്കും. ഇനി 500 സിസി ബൈക്കാണെങ്കിൽ 200 കിലോ ഭാരംവരും. അബദ്ധവശാൽ മറിഞ്ഞുപോയാൽ വാഹനം ഉയർത്താനുള്ള ടെക്​നിക്ക​ുകൾ അറിഞ്ഞിരിക്കണം. ക്ലാസിക് 500 ഓടിക്കുന്ന പലർക്കും അവ സെൻട്രൽ സ്റ്റാൻഡിൽ ഇടാൻ കഴിയാറില്ലെന്നതും വസ്​തുതയാണ്​.

പുനർവിൽപ്പന മൂല്യം

റോയൽ‌ എൻ‌ഫീൽ‌ഡ് മോട്ടോർ‌സൈക്കിളുകൾ‌ക്ക് അവയുടെ പുനർ‌വിൽപ്പന മൂല്യം കൂടുതലാണ്​, കാരണം അവയ്ക്ക് ആവശ്യക്കാർ കൂടുതലാണ്. നിലവിൽ പുതിയ ബൈക്കി​െൻറ കാത്തിരിപ്പ് കാലയളവ് കൂടിയിട്ടുണ്ട്​. ഇൻറർസെപ്റ്റർ 650 ​െൻറ കാത്തിരിപ്പ് കാലയളവ് ചില നഗരങ്ങളിൽ രണ്ട്​ മാസത്തിലധികമാണ്​. വലതുവശത്ത് ഗിയർ സെലക്ടറുള്ള പഴയ റോയൽ എൻഫീൽഡ് മോട്ടോർസൈക്കിളുകൾക്ക്​ വിപണിയിൽ വലിയ ഡിമാൻഡാണ്​. നന്നായി പരിപാലിക്കപ്പെട്ടവാഹനമാണെങ്കിൽ ചില പ്രത്യേക മോഡലുകൾക്ക്​ മോഹവിലയും ലഭിക്കും. പഴകുംതോറും വീര്യംകൂടുന്ന വീഞ്ഞുപോലെയാണ്​ റോയൽ. എത്ര പഴക്കവും പഴയ ഫിറ്റിങ്​സുകളും ഉണ്ടെങ്കിൽ വാങ്ങാനായി വാഹനപ്രേമികളുടെ നീണ്ടനിര നിങ്ങളുടെ വീട്ടുപടിക്കൽ ഉണ്ടായിരിക്കും.