പാർക്​​ ചെയ്​തിരുന്ന കാർ ഭൂമി പിളർന്ന്​ താഴേക്ക്​; കനത്ത മഴയിൽ ദുരന്തഭൂമിയായി മുംബൈ

മുംബൈ: കുറച്ചു ദിവസങ്ങളായി കനത്ത മഴ ലഭിക്കുന്ന മുംബൈയിലെ റെസിഡൻഷ്യൽ കോംപ്ലക്‌സിൽ പാർക്ക് ചെയ്​തിരുന്ന കാർ ഭൂമി പിളർന്ന്​ അപ്രത്യക്ഷമായി. ഒാട തകർന്നാണ്​ കാർ പൂർണമായും അതിനുള്ളിലായത്​. സംഭവത്തി​െൻറ വീഡിയോ സമൂഹമാധ്യമങ്ങളിൽ എത്തിയതോടെ വൈറലായിട്ടുണ്ട്​. മുംബൈ ഘട്കോപറിലാണ്​ സംഭവം. കാർ പതിയെ ഒാടയിലേക്ക്​ ഭൂമി പിളർന്ന്​ അപ്രത്യക്ഷമാവുന്നതാണ്​ വീഡിയോയിൽ കാണുന്നത്​. കാറി​െൻറ ബോണറ്റും മുൻ ചക്രങ്ങളും ആദ്യം സിങ്ക്ഹോളിലേക്ക് പ്രവേശിക്കുകയും പിൻഭാഗം ഉൾപ്പടെ പതിയെ കുഴിയിലേക്ക്​ ആണ്ടുപോവുകയുമായിരുന്നു.

കാറിനടുത്ത് നിർത്തിയിട്ടിരിക്കുന്ന മറ്റ് വാഹനങ്ങൾക്ക്​ കേടുപാടൊന്നും സംഭവിച്ചിട്ടില്ല. മുംബൈയ്‌ക്കൊപ്പം തീരദേശ മഹാരാഷ്ട്രയിലെ മറ്റ് പ്രദേശങ്ങളിലും ദിവസങ്ങളായി കനത്ത മഴയാണ്​. വാരാന്ത്യത്തിൽ നഗരത്തിൽ കനത്ത മഴയുണ്ടാകുമെന്ന് കാലാവസ്ഥാ വകുപ്പ് ശനിയാഴ്​ച പ്രവചിച്ചിരുന്നു. ശനിയാഴ്ച ഓറഞ്ച് അലേർട്ട് നൽകിയപ്പോൾ ഞായറാഴ്ച റെഡ് അലർട്ടും പ്രഖ്യാപിച്ചു. കുറച്ച് ദിവസങ്ങളായി പെയ്യുന്ന മഴ പല പ്രദേശങ്ങളിലും വെള്ളക്കെട്ടിലേക്ക് നയിക്കുകയും പവായ് തടാകം കവിഞ്ഞൊഴുകുകയും ചെയ്​തു.

വാരാന്ത്യത്തിലെ കാലാവസ്ഥാ വകുപ്പി​െൻറ മഴ പ്രവചനം കണക്കിലെടുത്ത്, ബ്രിഹൻമുംബൈ മുനിസിപ്പൽ കോർപ്പറേഷൻ പവർ യൂട്ടിലിറ്റി സ്ഥാപനങ്ങൾ ഉൾപ്പെടെ എല്ലാ ഏജൻസികൾക്കും മുന്നറിയിപ്പ്​ നൽകിയിരുന്നു. തീരസംരക്ഷണ സേന, നേവി, എൻ‌ഡി‌ആർ‌എഫ് എന്നിവരും ജാഗ്രതയിലാണ്​.