ഭോപാൽ: ആരോഗ്യപ്രശ്നം പറഞ്ഞ് മാേലഗാവ് സ്ഫോടനക്കേസിൽ കോടതിയിൽ ഹാജരാകാതിരുന്ന ബി.ജെ.പി എം.പി പ്രജ്ഞ സിങ് ഠാക്കൂർ വിവാഹ ചടങ്ങിനിടെ നൃത്തം ചെയ്യുന്ന വിഡിയോ പുറത്തുവന്നതോടെ രൂക്ഷവിമർശനവുമായി കോൺഗ്രസ്.
ഭോപാലിൽ നിർധന കുടുംബത്തിലെ യുവതിയുടെ വിവാഹ ചടങ്ങിനിടെയാണ് 51കാരിയായ പ്രജ്ഞ ചുവടുവെച്ചത്. ആഘോഷത്തിനിടെ നൃത്തം ചെയ്യുന്ന പ്രജ്ഞ മറ്റുള്ളവരെ ക്ഷണിക്കുകയും ചെയ്യുന്നതായി വിഡിയോയിൽ കാണാം.
'ബാസ്കറ്റ്ബാൾ കളിക്കുകയും പരസഹായമില്ലാതെ നടക്കുകയും ഇതുപോലെ സന്തോഷത്തോടെ നൃത്തം ചെയ്യുകയും ചെയ്യുന്ന ഭോപാൽ എം.പിയായ സഹോദരി പ്രജ്ഞ താക്കൂറിനെ കാണുന്നത് ഞങ്ങളെ സന്തോഷിപ്പിക്കുന്നു ...?' -മധ്യപ്രദേശ് കോൺഗ്രസ് വക്താവ് നരേന്ദ്ര സലുജ കളിയാക്കി.
ജൂലൈ ഒന്നിന് പ്രജ്ഞ ബാസ്കറ്റ്ബാൾ കളിക്കുന്ന വിഡിയോ സലുജയായിരുന്നു പുറത്തുവിട്ടത്. 'ഭോപാൽ എം.പി പ്രജ്ഞ താക്കൂറിനെ ഞങ്ങൾ വീൽചെയറിൽ മാത്രമേ കണ്ടിട്ടുള്ളൂ. എന്നാൽ ഇന്ന് ഭോപാൽ സ്റ്റേഡിയത്തിൽ ബാസ്കറ്റ്ബാൾ കളിക്കുന്നത് കാണാനായതിൽ ഞങ്ങൾക്ക് വളരെ സന്തോഷമുണ്ട് ... പരിക്ക് കാരണം നേരെ നിൽക്കാനോ നടക്കാനോ സാധിക്കുന്നില്ലെന്നായിരുന്നു കരുതിയത്... ദൈവം അവർക്ക് എല്ലായ്പ്പോഴും നല്ല ആരോഗ്യം പ്രദാനം ചെയ്യട്ടെ'-സലുജ ട്വീറ്റ് ചെയ്തു.
മകളുടെ വിവാഹം നടത്താൻ സാമ്പത്തികമായും അല്ലാതെയും ശേഷിയില്ലാതിരുന്ന തന്നെ സഹായിച്ച ഭോപാൽ എം.പിയോട് താനെന്നും കടപ്പെട്ടിരിക്കുമെന്ന് വധുവിന്‍റെ പിതാവ് പറഞ്ഞു. 'എനിക്കൊരു രണ്ടാം ജന്മം ലഭിച്ചതായാണ് തോന്നുന്നത്. ഞാൻ ഒരു പാവപ്പെട്ടവനാണ്. എന്‍റെ പെൺമക്കളുടെ വിവാഹം നടത്താൻ എനിക്ക് കഴിവില്ല. പ്രജ്ഞ ഠാക്കൂറാണ് ഞങ്ങളെ സഹായിച്ചത്. അവരുടെ ദീർഘായുസിന് വേണ്ടി പ്രാർഥിക്കും. ഞാൻ വളരെ സന്തോഷവാനാണ്' -പിതാവ് മാധ്യമപ്രാവർത്തകരോട് പറഞ്ഞു.
വിവാദ പരാമർശങ്ങൾ കൊണ്ട് സ്വന്തം പാർട്ടിയെ പോലും പലപ്പോഴും കുഴപ്പത്തിലാക്കിയ പ്രജ്ഞ 2008ലെ മാലേഗാവ് സ്ഫോടനക്കേസിലെ പ്രതിയാണ്. 2017ൽ ജാമ്യത്തിലിറങ്ങുന്നത് വരെ ഒമ്പത് വർഷം ജയിലിലായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.