ഗുജറാത്ത്​ തെരഞ്ഞെടുപ്പ്​: മുസ്​ലിംകളെ ഭയക്കണമെന്ന സന്ദേശവുമായി വിഡിയോ പ്രചരിക്കുന്നു

അഹമ്മദാബാദ്: തെരഞ്ഞെടുപ്പ്​ അടുത്ത ഗുജറാത്തിൽ പ്രധാന എതിരാളികളായ ബി.ജെ.പിയും കോൺഗ്രസും തമ്മിൽ സോഷ്യൽ മീഡിയയിൽ യുദ്ധം തുടരുന്നതിനിടെ മുസ്​ലിംകൾക്കെതിരെ വിഡിയോയുമായി ബി.ജെ.പി. മുസ്​ലിംകളെ ഭയപ്പെടണമെന്ന സന്ദേശം നൽകുന്ന പുതിയ വിഡിയോയാണ്​ സാമൂഹിക മാധ്യമങ്ങളിൽ ഹിന്ദുത്വ ഗ്രൂപ്പുകൾ പ്രചരിപ്പിക്കുന്നത്​. ബാങ്കുവിളി കേട്ട്​ ഭയന്നോടുന്ന പെൺകുട്ടിയാണ്​ വിഡിയോയിലുള്ളത്​. 

ഗുജറാത്തിൽ വൈകീട്ട്​ ഏഴിനു ശേഷം സംഭവിക്കാവുന്നത്​ എന്ന്​ എഴുതിക്കാണിച്ച്​ തുടങ്ങുന്ന വിഡിയോക്ക്​ ഒന്നേകാൽ മിനുട്ട്​ ദൈർഘ്യമാണുള്ളത്​. ഒരു പെൺകുട്ടി റോഡിലൂടെ അതിവേഗത്തിൽ ഭയപ്പെട്ട്​ നടക്കുന്നു. ബാങ്കുവിളിയോട്​ സാമ്യമുള്ള ശബ്​ദം പശ്​ചാത്തലത്തിൽ കേൾക്കാം. അവളുടെ മാതാപിതാക്കൾ ഉത്​കണ്​ഠയോടെ വീട്ടിൽ കാത്തിരിക്കുന്നതും കാണിക്കുന്നു. രക്ഷിതാക്കളുടെ പിറകിൽ കൃഷ്​ണ വിഗ്രഹവും ദൃശ്യങ്ങളിൽ കാണാം. 

വീട്ടിലെത്തിയ അവൾ കോളിങ് ബെല്ലടിക്കുന്നു. അമ്മ വാതിൽ തുറന്നപ്പോൾ ഉടൻ അവരെ കെട്ടിപ്പിടിക്കുന്നു. അച്ഛൻ അവളെ ആശ്വസിപ്പിക്കുന്നതിനായി​ നെറുകയിൽ തലോടുന്നതും കാണാം. 

തുടർന്ന്​ അമ്മയുടെ ചോദ്യം: ഗുജറാത്തിൽ ഇങ്ങനെ സംഭവിക്കുമോ എന്ന്​ നിങ്ങൾ കരുതുന്നുണ്ടോ? 22 വർഷങ്ങൾക്ക്​ മുമ്പ്​ ഇത്​ പതിവായിരുന്നുവെന്നും അവർ വന്നാൽ ഇത്​  വീണ്ടും സംഭവിക്കുമെന്നുമായിരുന്നു അച്ഛ​​​െൻറ മറുപടി. ഭയ​െപ്പടേണ്ടതില്ല, മോദി ഇവിടെയുണ്ട്​. ആരും വരില്ലെന്നെും പറഞ്ഞ്​ മകളെ ആശ്വസിപ്പിക്കുന്നതും വിഡിയോയിൽ കാണാം. വിഡിയോ അവസാനിക്കു​േമ്പാൾ ‘നമ്മുടെ വോട്ട്​, നമ്മുടെ സുരക്ഷ’ എന്ന്​ എഴുതിക്കാണിക്കുകയും ചെയ്യുന്നു.

വിഡിയോ പ്രചരിക്കുന്നത്​ തടയണമെന്നാവശ്യപ്പെട്ട്​ മനുഷ്യാവകാശ പ്രവർത്തകൻ അഡ്വ. ഗോവിന്ദ്​ പാർമർ തെരഞ്ഞെടുപ്പ്​ കമീഷനും പൊലീസിനും പരാതി നൽകി. മുസ്​ലിംകൾക്കെതിരെ വിദ്വേഷം വളർത്തുന്ന വിഡിയോ തെരഞ്ഞെടുപ്പിനെ സ്വാധീനിക്കുമെന്ന്​ കാണിച്ചാണ്​ പരാതി നൽകിയത്​. വിഡിയോ മുസ്​ലിംകളെ ഭയക്കണമെന്ന വ്യക്​തമായ പ്രതീതി സൃഷ്​ടിക്കുന്നതാണെന്നും അത്​ പ്രചരിക്കുന്നത്​ തടയണമെന്നും അഡ്വ. പാർമർ ആവശ്യപ്പെടുന്നു. 

എന്നാൽ വിഡിയോ പ്രചരിപ്പിക്കുന്നുവെന്ന ആരോപണം ഗുജറാത്ത്​ ബി.ജെ.പി സാമൂഹിക മാധ്യമ വിഭാഗം നിഷേധിച്ചു.  ആരാണ്​ അത്​ നിർമിച്ചതെന്ന്​ തങ്ങൾക്കറിയില്ല. ബി.ജെ.പി അഭ്യുദയ കാംക്ഷികളാരെങ്കിലും നിർമിച്ചതാണോ എന്ന കാര്യം അറിയില്ലെന്നും നേതൃത്വം അറിയിച്ചു.