ന്യൂഡൽഹി: മുഖ്യമന്ത്രി യോഗി ആദിത്യനാഥിന്‍റെ നേതൃത്വത്തിലുള്ള ഉത്തർപ്രദേശ് സർക്കാറിനെ രൂക്ഷമായി വിമർശിച്ച് ബി.ജെ.പി എം.പി വരുൺ ഗാന്ധി. കനത്ത മഴയിൽ ജനങ്ങൾ ദുരിതം അനുഭവിക്കുന്നതിനെ തുടർന്നായിരുന്നു വരുണിന്‍റെ പ്രതികരണം.
കനത്ത മഴ നാശം വിതക്കുേമ്പാൾ പൗരന്മാർ സ്വന്തം കാര്യം സ്വയം നോക്കണമെങ്കിൽ പിന്നെ എന്തിനാണ് ഒരു ഭരണസംവിധാനം എന്നായിരുന്നു വരുണിന്‍റെ ചോദ്യം.
വരുണിന്‍റെ പിലിബിത് മണ്ഡലത്തിൽ കനത്ത മഴ നാശം വിതച്ചിരുന്നു. കഴിഞ്ഞ രണ്ടുദിവസമായി പെയ്ത മഴയിൽ ബറേലി, പിലിബിത് ജില്ലകളിലായി മൂന്നുപേർക്ക് ജീവൻ നഷ്ടമാകുകയും 100ഓളം പേർക്ക് വീടുകൾ നഷ്ടമാകുകയും ചെയ്തിരുന്നു.
ശാരദ, ദോഹ എന്നീ നദികൾ കരകവിഞ്ഞ് ഒഴുകി. നദിക്കരയിലെ നിരവധി ഗ്രാമത്തിൽ വെള്ളത്തിനടിയിലാകുകയും ചെയ്തിരുന്നു. ശാരദ നദിയിൽ വെള്ളം കൂടിയതോടെ 500ഓളം പേരുടെ വീടുകളാണ് വെള്ളത്തിനടിയിലായത്. ചൊവ്വാഴ്ച രാത്രി പിലിബിത്ത് ജില്ല ഭരണകൂടം ആർമിയുടെ സഹായം തേടിയിരുന്നു. 26ഓളം പേരെയാണ് സുരക്ഷസേന ബുധനാഴ്ച രാവിലെ എയർലിഫ്റ്റ് ചെയ്തത്.
വെള്ളപ്പൊക്കത്തിൽ വിള നാശം സംഭവിച്ച കർഷകർക്ക് നഷ്ടപരിഹാരം നൽകണമെന്ന ആവശ്യവുമായി വരുൺ ഗാന്ധി യോഗി ആദിത്യനാഥിന് കത്തെഴുതിയിരുന്നു.
ബി.ജെ.പി എം.പിയാണെങ്കിലും പാർട്ടി നേതൃത്വവുമായി ഇടഞ്ഞുനിൽക്കുകയാണ് വരുൺ ഗാന്ധി. കർഷകസമരവും യു.പി ലഖിംപൂർ ഖേരി കർഷക കൊലയുമായി ബന്ധെപ്പട്ടും ബി.ജെ.പിയോട് കടുത്ത അതൃപ്തി രേഖപ്പെടുത്തിയിരുന്നു. ലഖിംപൂർ ഖേരി കർഷക കൊലയിൽ കേന്ദ്രമന്ത്രി അജയ് മിശ്രക്കും മകൻ ആശിഷ് മിശ്രക്കും എതിരെയും വരുൺ ഗാന്ധി രംഗത്തെത്തിയിരുന്നു. കർഷകർക്ക് നീതി ലഭ്യമാക്കണമെന്ന് ആവശ്യപ്പെട്ടായിരുന്നു വരുൺ ഗാന്ധിയുടെ പ്രതികരണം.
ഇതിനുപിന്നാലെ, പ്രതികാര നടപടിയെന്നോണം വരുൺ ഗാന്ധിയെയും മാതാവ് മനേക ഗാന്ധിയെയും ബി.ജെ.പി ദേശീയ നിർവാഹക സമിതിയിൽനിന്ന് ഒഴിവാക്കിയിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.