മോദിയോട്​ ഒന്നേ പറയാനുള്ളു, നേരുംനെറിയുമുള്ള ആളാവുക -ഫാറൂഖ്​ അബ്​ദുള്ള

ഡൽഹി: തടങ്കലിൽ നിന്നുള്ള മോചനത്തിന്​ ശേഷം ദേശീയ മാധ്യമത്തിന്​ നൽകിയ അഭിമുഖത്തിൽ പൊട്ടിത്തെറിച്ച്​ നാഷനൽ കോൺഫറൻസ്​ എം.പി ഫാറൂഖ്​ അബ്​ദുല്ല. മോദി സർക്കാർ തങ്ങളെ സമ്പൂർണമായി വഞ്ചിച്ചതായും ഇനിയിവരെ വിശ്വസിക്കാനാവി​െല്ലന്നും അദ്ദേഹം പറഞ്ഞു.

'ആർക്കും ഇൗ സർക്കാരിനെ വിശ്വസിക്കാൻ കഴിയില്ല. അവർ നുണ പറയാത്ത ഒരു ദിവസവുമില്ല. ഇത് ഗാന്ധിയുടെ ഇന്ത്യയല്ല'-അദ്ദേഹം പറഞ്ഞു. കാശ്​മീരിലെ അസാധാരണ സൈനിക നീക്കം നടക്കുന്നതിന്​ ഒരു ദിവസം മുമ്പ്​ താൻ പ്രധാനമന്ത്രി മോദിയുമായി കൂടിക്കാഴ്ച നടത്തിയെന്ന്​ ഫാറൂഖ് അബ്ദുല്ല പറഞ്ഞു.

'പുതിയ സംഭവവികാസങ്ങൾക്ക്​ ഒരു ദിവസം മുമ്പ് ഞാൻ പ്രധാനമന്ത്രിയെ കണ്ടു. അദ്ദേഹം ഞങ്ങൾക്ക് ഒരു സൂചനയും നൽകിയില്ല. ധാരാളം സൈനികരെ കശ്​മീരിലേക്ക്​ നീക്കിയിട്ടുണ്ടെന്ന് ഞാൻ അദ്ദേഹത്തോട് പറഞ്ഞു. എന്താണ് ഇതി​െൻറയൊക്കെ ആവശ്യമെന്നും ചോദിച്ചു. വിനോദസഞ്ചാരികളെ കശ്​മീരിൽ നിന്ന്​പുറത്താക്കുന്നുണ്ടായിരുന്നു. അമർനാഥ്​ തീർഥാടനം മാറ്റിവച്ചു. ഇതെല്ലാം വിചിത്രമായിരുന്നു. പാകിസ്ഥാനുമായുള്ള യുദ്ധമോ മറ്റോ ഉണ്ടോ എന്നും മോദിയോട്​ ഞാൻ ചോദിച്ചിരുന്നു'-അദ്ദേഹം പറയുന്നു.

'ഞങ്ങൾ പ്രധാനമന്ത്രിയോട് കാര്യങ്ങൾ ചോദിച്ചപ്പോൾ അദ്ദേഹം ഒന്നും പറഞ്ഞില്ല. പക്ഷേ മറ്റുചില കാര്യങ്ങൾ പറഞ്ഞു. അതിപ്പോൾ പുറത്തുപറയാൻ ഉദ്ദേശിക്കുന്നില്ല. അദ്ദേഹം തികച്ചും നല്ലവനായാണ്​ ഞങ്ങളോട്​ പെരുമാറിയത്​'-ഫാറൂഖ്​ അബ്​ദുല്ല പറഞ്ഞു. എന്താണ്​ ഇപ്പോൾ താങ്കൾക്ക്​ പ്രധാനമന്ത്രിയോട്​ പറയാനുള്ളത്​ എന്ന ചോദ്യത്തിന്​ 'കാപട്യം അവസാനിപ്പിച്ച്​ കൂടുതൽ സത്യസന്ധത പുലർത്താനും വസ്തുതകളെ ശരിയായി മനസിലാക്കാനും ശ്രമിക്കണം' എന്ന്​ പറയാനാണ്​ ഇഷ്​ടപ്പെടുന്നതെന്നും ഫാറുഖ്​ അബ്​ദുല്ല പറഞ്ഞു.

83 കാരനായ അബ്​ദുല്ലയെ മാർച്ചിലാണ്​ തടങ്കലിൽ നിന്ന്​ വിട്ടയച്ചത്. കഴിഞ്ഞ വർഷം ഓഗസ്റ്റ് അഞ്ചിന്​ മകൻ ഒമർ അബ്ദുല്ല, പിഡിപി നേതാവ്​ മെഹ്ബൂബ മുഫ്തി എന്നിവരുൾപ്പെടെ നിരവധി നേതാക്കളോടൊപ്പം ഇദ്ദേഹത്തെ കസ്റ്റഡിയിലെടുക്കുകയായിരുന്നു. വിചാരണ കൂടാതെ തടങ്കലിൽ വയ്ക്കാൻ അനുവദിക്കുന്ന പബ്ലിക് സേഫ്റ്റി ആക്റ്റ് അല്ലെങ്കിൽ പി‌.എസ്‌.എ പ്രകാരം ഏഴ് മാസത്തിലേറെ അദ്ദേഹത്തെ സർക്കാർ കസ്​റ്റഡിയിൽവച്ചിരുന്നു.