ഇംഫാൽ: ആദിവാസി ഇതര വിഭാഗമായ മെയ്തേയി വിഭാഗത്തിന് പട്ടിക വർഗ പദവി നൽകാനുള്ള കേന്ദ്രസർക്കാർ നീക്കത്തിനെതിരെയുള്ള പ്രതിഷേധം സംഘർഷത്തിൽ കലാശിച്ച മണിപ്പൂരിൽ നിന്ന് സഹായം തേടി ലോക ബോക്സിങ് ജേതാവായ മേരി കോം. തീവെപ്പും ഏറ്റുമുട്ടലും നടക്കുന്ന മണിപ്പൂരിനെ ശാന്തമാക്കാൻ സഹായിക്കണമെന്നാവശ്യപ്പെട്ട് പ്രധാന മന്ത്രി നരേന്ദ്രമോദി, ആഭ്യന്തരമന്ത്രി അമിത് ഷാ, പ്രതിരോധ മന്ത്രി രാജ്നാഥ്സിംഗ് എന്നിവരെ ടാഗ് ചെയ്ത് ട്വിറ്ററിലാണ് താരത്തിന്റെ സഹായാഭ്യാർഥന.
‘എന്റെ സംസ്ഥാനമായ മണിപ്പൂർ കത്തുകയാണ്, ദയവായി സഹായിക്കൂ നരേന്ദ്രമോദി, അമിത് ഷാ, രാജ്നാഥ്സിംഗ്’ എന്നാണ് മേരികോമിന്റെ ട്വീറ്റ്. മാധ്യമങ്ങളെയും ഇതിൽ അവർ ടാഗ് ചെയ്തിട്ടുണ്ട്. നഗരത്തിൽ കടകളും വീടുകളും സ്ഥാപനങ്ങളും അഗ്നിക്കിരയാക്കുന്ന ചിത്രങ്ങളും ഇതോടൊപ്പം പങ്കുവെച്ചിട്ടുണ്ട്.
മണിപ്പൂരിൽ ഭൂരിപക്ഷം വരുന്ന മെയ്തേയി സമുദായത്തെ പട്ടികവർഗ വിഭാഗത്തിൽ ഉൾപ്പെടുത്താനുള്ള നീക്കത്തിനെതിരെയാണ് തദ്ദേശീയ ആദിവാസികളുടെ നേതൃത്വത്തിൽ പ്രതിഷേധം ഉയരുന്നത്. പട്ടിക വർഗ പദവി നൽകുന്നതിനെതിരെ ഓൾ ട്രൈബൽ സ്റ്റുഡന്റ്സ് യൂനിയന്റെ ആഭിമുഖ്യത്തിൽ (എ.ടി.എസ്‌.യു.എം) കഴിഞ്ഞ ദിവസം കൂറ്റൻ പ്രതിഷേധറാലി നടത്തിയിരുന്നു.
ഇതിന് പിന്നാലെയാണ് സംഘർഷം പൊട്ടിപ്പുറപ്പെട്ടത്. ഇന്നലെ രാത്രി ഇംഫാൽ, ചുരാചന്ദ്പുർ, കാങ്പോക്പി മേഖലകളിൽ സംഘർഷം രൂക്ഷമായതിനെ തുടർന്ന് മണിപ്പൂരിലെ എട്ടു ജില്ലകളിൽ കർഫ്യൂ പ്രഖ്യാപിച്ചു. സംസ്ഥാനത്ത് അടുത്ത അഞ്ചു ദിവസത്തേക്ക് മൊബൈൽ ഇന്റർനെറ്റ് സേവനങ്ങൾ നിരോധിച്ചു.
മണിപ്പൂരിൽ സംഘർഷം നടന്ന മേഖകളിൽ സൈന്യം ഇന്ന് റൂട്ട്മാർച്ച് നടത്തി. സംഘർഷം നിയന്ത്രിക്കാനായി നിയോഗിച്ച സൈന്യവും അസം റൈഫിൾസുമാണ് ഫ്ലാഗ് മാർച്ച് നടത്തിയത്. സംഘർഷ ബാധിത പ്രദേശത്തുനിന്നുള്ള 4000 ഓളം പേരെ സൈനിക ക്യാമ്പുകളിലേക്ക് മാറ്റിപ്പാർപ്പിച്ചു.
സംസ്ഥാന ജനസംഖ്യയുടെ 53 ശതമാനം വരുന്ന സമൂഹമാണ് മെയ്തേയി സമുദായം. നിലവിലെ നിയമമനുസരിച്ച് മെയ്തേയി വിഭാഗത്തിന് സംസ്ഥാനത്തെ മലനിര പ്രദേശങ്ങളിൽ താമസിക്കാൻ അനുവാദമില്ല. എന്നാൽ, പട്ടിക വർഗ പദവി നൽകുന്നതോടെ ഈ നിയന്ത്രണം ഇല്ലാതാകും. ഇതടക്കമുള്ള പ്രത്യാഘാതങ്ങളാണ് ആദിവാസി ഗോത്രവിഭാഗങ്ങളെ തെരുവിലിറക്കിയത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.