ന്യൂഡൽഹി: അബേദ്കർ പരാമർശത്തിൽ ബി.ജെ.പി നേതാവും കേന്ദ്രമന്ത്രിയുമായ അമിത് ഷാക്കെതിരെ വീണ്ടും രൂക്ഷ വിമർശനവുമായി കോൺഗ്രസ്. അബേദ്കർ വിവാദം അവസാനിക്കണമെങ്കിൽ അമിത് ഷായെ പുറത്താക്കണമെന്ന് എ.ഐ.സി.സി ജനറൽ സെക്രട്ടറി ജയ്റാം രമേശ് പറഞ്ഞു. രാജ്യസഭയിൽ നടത്തിയ പരാമർശത്തിൽ കേന്ദ്ര മന്ത്രി മാപ്പ് പറയണമെന്നും ജയ്റാം രമേശ് ആവശ്യപ്പെട്ടു.
'അമിത് ഷായുടെ രാജി ആവശ്യപ്പെട്ട് രാജ്യത്താകമാനം നൂറോളം വാർത്താസമ്മേളനം നടത്തി. ഒരാഴ്ച ഡോ. അംബേദ്കർ സമ്മാൻ സപ്താഹ് ആയി ആചരിക്കും. ജില്ല അടിസ്ഥാനത്തിൽ നിവേദനങ്ങൾ തയാറാക്കി രാഷ്ട്രപതിക്ക് കൈമാറി. അംബേദ്കർ പരാമർശത്തിൽ കേന്ദ്ര മന്ത്രി മാപ്പ് പറയണം' -ജയ്റാം രമേശ് വ്യക്തമാക്കി.
ഡിസംബർ 26ന് കർണാടകയിലെ ബെലഗാവിയിൽ നടക്കുന്ന കോൺഗ്രസ് പ്രവർത്തക സമിതിയോഗത്തിൽ തുടർ പ്രതിഷേധ പരിപാടികൾക്ക് അന്തിമ രൂപം നൽകും. പ്രവർത്തക സമിതിയോഗത്തോടൊപ്പം കൂറ്റൻ റാലിയും സംഘടിപ്പിക്കുമെന്ന് കോൺഗ്രസ് അറിയിച്ചു.
രാജ്യസഭയിൽ രണ്ട് ദിവസത്തെ ഭരണഘടനാ ചർച്ചക്ക് സമാപനം കുറിച്ച് നടത്തിയ മറുപടി പ്രസംഗത്തിലാണ് അമിത് ഷാ വിവാദ പരാമർശം നടത്തിയത്. ‘അംബേദ്കർ, അംബേദ്കർ, അംബേദ്കർ, അംബേദ്കർ എന്ന് ഉരുവിട്ടു കൊണ്ടിരിക്കുന്നത് ഇപ്പോൾ ഫാഷനായിരിക്കുന്നു. ഇത്രയും തവണ ഭഗവാന്‍റെ നാമം ഉരുവിട്ടിരുന്നുവെങ്കിൽ ഏഴ് ജന്മത്തിലും സ്വർഗം ലഭിക്കുമായിരുന്നു’ -എന്നാണ് അമിത് ഷാ പറഞ്ഞത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.