പുതിയ കോവിഡ്​ വകഭേദം 'ആൽഫ'യേക്കാൾ അപകടകാരി​; ഈ വാക്​സിൻ സഹായിക്കുമെന്ന്​

ന്യൂഡൽഹി: കഴിഞ്ഞ ദിവസമാണ്​ രാജ്യത്ത്​ കോറോണ വൈറസിന്‍റെ പുതിയ വകഭേദമായ B.1.1.28.2 കണ്ടെത്തിയത്​. എന്നാൽ ഇന്ത്യയിൽ തന്നെ നിർമിച്ച ഭാരത്​ ബയോടെകിന്‍റെ 'കോവാക്​സിൻ' പുതിയ വൈറസ്​ വകഭേദത്തെ ഫലപ്രദമായി പ്രതിരോധിക്കുമെന്നാണ്​ ബയോആർക്കെവിൽ പ്രസിദ്ധീകരിച്ച പഠനം സൂചിപ്പിക്കുന്നത്​.

ബ്രിട്ടനിൽ നിന്നും ബ്രസീലിൽ നിന്നുമെത്തിയവരുടെ സാംപിളുകൾ ഉ​പയോഗിച്ച്​ നടത്തിയ ജീനോം സീക്വൻസിലൂടെയാണ്​ പുണെയിലെ നാഷനൽ ഇൻസ്റ്റിറ്റ്യൂട്ട്​ ഓഫ്​ വൈറോളജി പുതിയ വകഭേദം കണ്ടെത്തിയത്​.

രോഗം ബാധിച്ചവരില്‍ ഗുരുതര രോഗലക്ഷണങ്ങളാണ് കണ്ടെത്തിയിരിക്കുന്നത്. മറ്റ് കോവിഡ് വകഭേദങ്ങളുടെ ലക്ഷണങ്ങളായ ഭാരം കുറയല്‍, കടുത്ത പനി തുടങ്ങിയവയും പുതിയ വകഭേദം ബാധിച്ചവരില്‍ പ്രകടമാകുന്നുണ്ട്. ഇത്​ കൂടാതെ പുതിയ വൈറസ്​ ശ്വസനനാളത്തിലും ശ്വാസകോശത്തിന്‍റെ അറകളിലും ഗുരുതര തകരാറുകൾ സൃഷ്​ടിക്കുന്നതായി എൻ.ഐ.വിയുടെ റിപ്പോർട്ടിൽ പറയുന്നത്​.

ഇൗ വകദേഭത്തിനെതിരെ കോവാക്​സിൻ ഫലപ്രദമാണെന്നാണ്​ സൂചന. രണ്ട് ഡോസ് കോവാക്സിൻ ആന്‍റിബോഡി ഗണ്യമായി വർധിപ്പിക്കുകയും വകഭേദത്തിന്‍റെ ഫലപ്രാപ്തി നിർവീര്യമാക്കുകയും ചെയ്യുന്നതായി എൻ.‌ഐ.വിയുടെ പഠനത്തിൽ പറയുന്നു.

പകര്‍ച്ചാ സാധ്യതയും പുതിയ വകഭേദത്തിൽ​ കൂടുതലാണെന്നും റിപ്പോര്‍ട്ടുകളുണ്ട്. ഇന്ത്യയിൽ രണ്ടാം തരംഗം രൂക്ഷമാക്കിയ ഡെൽറ്റാ വകഭേദവുമായി സാമ്യം പുലർത്തുന്നതാണ് പുതിയ വകഭേദം. ആൽഫ വകഭേദവുമായി താരതമ്യം ചെയ്യു​േമ്പാൾ ഇവ കൂടുതൽ അപകടകാരിയാണെന്നാണ് റിപ്പോർട്ട്.

പുതിയ വകഭേദം കണ്ടെത്തിയതോടെ രാജ്യം അതീവ ജാഗ്രതയിലാണ്. പുതിയ വൈറസ് വകഭേദം മൂലം രോഗം ബാധിച്ചവരെ കണ്ടെത്തി പ്രത്യേകം നിരീക്ഷണത്തിലാക്കിയിട്ടുണ്ട്. ഇ​തിനെക്കുറിച്ച്​ കൂടുതൽ പഠനങ്ങൾ ആരംഭിക്കുകയും ചെയ്​തു. ലോകത്തെമ്പാടുമുള്ള ലാബുകളിൽ പുതിയ വൈറസ് വകഭേദങ്ങളെ കണ്ടെത്താനുള്ള പഠനങ്ങൾ തുടരുകയാണ്. 15 രാജ്യങ്ങളിലെ ലാബുകളിൽ ഏകദേശം 30,000ത്തിലധികം സാംപിളുകളാണ് പുതിയ വൈറസ്​ വകഭേദങ്ങളെ കുറിച്ച്​ പഠിക്കാനായി സ്വീകരിച്ചിരിക്കുന്നത്​.