'ചട്ടങ്ങൾ തയാറാക്കുന്നത്​ ലക്ഷദ്വീപിനെക്കുറിച്ച്​ അറിയാത്തവർ'; കരട്​ പിൻവലിക്കാനാവശ്യപ്പെട്ട്​ അമിത്​ ഷാക്ക്​ കത്തയച്ച്​ മുൻ അഡ്​മിനിസ്​ട്രേറ്റർ

ചെന്നൈ: 'ലക്ഷദ്വീപ് ഡെവലപ്മെൻറ് അതോറിറ്റി റെഗുലേഷൻ 2021' കരട് പിൻവലിക്കണമെന്ന് മുൻ ലക്ഷദ്വീപ് അഡ്മിനിസ്ട്രേറ്റർ ഒമേഷ് സൈഗൽ കേന്ദ്ര ആഭ്യന്തരമന്ത്രി അമിത് ഷായോട് ആവശ്യപ്പെട്ടു. പ്രാദേശിക ജനങ്ങളോട് ആലോചിക്കാതെ കേന്ദ്രസർക്കാർ നിയന്ത്രണങ്ങളോ ചട്ടങ്ങളോ ഉണ്ടാക്കരുതെന്ന് അമിത്​ ഷാക്ക്​ അയച്ച കത്തിൽ സൈഗൽ വ്യക്​തമാക്കി. കരട് നിയമത്തിലെ ചില വ്യവസ്ഥകൾ മണ്ടത്തരങ്ങളാണെന്നും​ ഇത് ദ്വീപ് പ്രദേശത്തിന് അനുയോജ്യമല്ലെന്നും ഡൽഹി പോലുള്ള നഗരത്തിൽനിന്ന് പടച്ചുണ്ടാക്കുന്നതാണെന്നും അദ്ദേഹം പറഞ്ഞു.

'കരടിൽ നഗര-ഗ്രാമ പ്രദേശങ്ങളുടെ ചിട്ടയായതും പുരോഗമനപരവുമായ വികസനത്തെക്കുറിച്ചും ഭൂമി ഏറ്റെടുക്കലിനെ സംബന്ധിച്ചും പറയുന്നുണ്ട്​. ​എന്നാൽ, നഗര വികസനത്തിനുള്ള പ്രദേശങ്ങളോ ഭൂമി ഏറ്റെടുക്കാൻ കഴിയുന്ന രീതിയിലുള്ള സ്​ഥലമോ അവിടെയില്ല. നഗരവികസനം പോലുള്ള വാക്കുകൾ കരടിൽ ഉപയോഗിക്കണമെങ്കിൽ ഇത്​ തയാറാക്കിയ വ്യക്​തിക്ക്​ ദ്വീപിനെക്കുറിച്ച്​ ഒന്നും അറിയില്ലെന്ന്​ വ്യക്​തമാണ്​. 99 ശതമാനവും മണലുള്ള സ്​ഥലത്ത്​ മണ്ണിൽ കൃഷി വ്യാപകമാക്കുമെന്ന മണ്ടത്തരവും ഇതിലുണ്ട്​.

പുതിയ അഡ്മിനിസ്ട്രേറ്റർ അഞ്ച്​ മാസ​ത്തിനിടയിൽ കടുത്തതും വിപരീത ഫലങ്ങൾ വരുത്തുന്നതുമായ നിരവധി നടപടികളാണ്​ കൈക്കൊണ്ടിട്ടുള്ളത്​. ഇത് ദ്വീപിലെ സാധാരണ ജനജീവിതത്തെ ബാധിച്ചു. അംഗൻ‌വാടികൾ അടച്ചു. വർഷങ്ങളോളം ജോലി ചെയ്​ത നിരവധി പേരെ പിരിച്ചുവിട്ടു. സ്​കൂളുകളിൽ മാംസം നിരോധിച്ചു,

സുപ്രീം കോടതി നിയോഗിച്ച സമിതി തയാറാക്കിയ സംയോജിത ശാസ്ത്രീയ പദ്ധതി പ്രകാരം നിർമിച്ച ഡസൻ കണക്കിന് മത്സ്യത്തൊഴിലാളി ഷെഡ്ഡുകൾ പൊളിച്ചുമാറ്റി. കുറ്റകൃത്യങ്ങളില്ലാത്ത നാട്ടിൽ ഗുണ്ടാ ആക്റ്റ് കൊണ്ടുവന്നു. ഡയറി ഫാമുകൾ അടച്ചു. പഞ്ചായത്ത്​ നിയമങ്ങൾ ഭേദഗതി ചെയ്തു. ഇതിനെല്ലാം പുറമെ ലക്ഷദ്വീപ് വികസന ചട്ടങ്ങൾ 2021ലെ കരട് വ്യവസ്ഥകൾ എല്ലാവരെയും അസ്വസ്ഥമാക്കുകയാണെന്നും സൈഗൽ കത്തിൽ വ്യക്​തമാക്കി.

ലക്ഷദ്വീപ് അഡ്മിനിസ്ട്രേറ്ററായി മൂന്നുവർഷം സേവനമനുഷ്ഠിച്ചിട്ടുണ്ട്​ സൈഗൽ. ഇന്ത്യ ഫിലിംസ് ഡിവിഷനായി ലക്ഷദ്വീപിൽനിന്ന്​ രണ്ട് ചലച്ചിത്രങ്ങളും ദൂരദർശന്​ വേണ്ടി 'സാഗരിക' എന്ന സീരിയലും ഇദ്ദേഹം തയാറാക്കി. കൂടാതെ നാഷനൽ ബുക്ക് ട്രസ്റ്റിനായി 'ലക്ഷദ്വീപ്' എന്ന പേരിൽ പുസ്തകവും പ്രസിദ്ധീകരിച്ചു.