ന്യൂഡൽഹി: അലീഗഢ് മുസ്‍ലിം സർവകലാശാല നിയമത്തിലൂടെ സ്ഥാപിച്ചതാണെങ്കിൽ അത് ന്യൂനപക്ഷ സ്ഥാപനമാണെന്ന് ആ നിയമത്തിലുണ്ടോ എന്ന് ചീഫ് ജസ്റ്റിസ് ഡി.വൈ ചന്ദ്രചൂഡ് അധ്യക്ഷനായ സുപ്രീംകോടതിയുടെ ഏഴംഗ ഭരണഘടന ബെഞ്ചിന്റെ ചോദ്യം. അലീഗഢ് സർവകലാശാലക്കുള്ള മുസ്‍ലിം ന്യൂനപക്ഷ പദവിക്കെതിരായ കേസിൽ വാദം തുടങ്ങിയ ചൊവ്വാഴ്ചയാണ് ഏഴംഗ ബെഞ്ചിലെ ജസ്റ്റിസ് സഞ്ജീവ് ഖന്ന ഈ ചോദ്യമുന്നയിച്ചത്.
നിയമമൊരിക്കലും അങ്ങനെ പറയില്ലെന്ന് അലീഗഢിന്റെ അഭിഭാഷകനായ രാജീവ് ധവാൻ പ്രതികരിച്ചപ്പോൾ പ്രശ്നം അവിടെയാണെന്ന് ജസ്റ്റിസ് ഖന്ന പറഞ്ഞു. ന്യൂനപക്ഷ പദവി നിയമം കൊണ്ട് എടുത്തുകളയാവുന്ന ഒന്നാണെന്ന തരത്തിൽ ഭരണഘടനയുടെ 30ാം അനുഛേദം ഇത്ര കുടുസ്സായി വായിക്കരുതെന്ന് ധവാൻ തുടർന്നു. ന്യൂനപക്ഷ സ്ഥാപന നടത്തിപ്പുമായി ബന്ധപ്പെട്ട് സുപ്രീംകോടതി ഇതുവരെ പുറപ്പെടുവിച്ച വിധികൾ കുടുസ്സായിരുന്നില്ല, വിശാലമായിരുന്നു. ചരിത്രം പരതി സർവകലാശാലക്ക് ആ സമുദായവുമായുള്ള ബന്ധം കാണണമെന്നും ധവാൻ ഓർമിപ്പിച്ചു.
അലീഗഢ് മുസ്‍ലിം സർവകലാശാല എന്ന ന്യൂനപക്ഷ സ്ഥാപനത്തിന് അംഗീകാരം നൽകുകയാണ് നിയമത്തിലൂടെ പാർലമെന്റ് ചെയ്തതെന്ന് കപിൽ സിബലും കൂട്ടിച്ചേർത്തു. അംഗീകാരമില്ലാതെ ബിരുദം നൽകാനാകാത്തതുകൊണ്ടാണ് അംഗീകാരത്തിനായി നിയമമുണ്ടാക്കുന്നതെന്നും സിബൽ പറഞ്ഞു. നിയമമുണ്ടാക്കിയാലും ഭരണഘടനയുടെ 30ാം അനുഛേദം ഇല്ലാതാക്കാനാവില്ലെന്നും അലീഗഢുമായി ബന്ധപ്പെട്ട അസീസ് ബാഷ കേസിലെയും അലഹബാദ് ഹൈകോടതി വിധിയിലെയും തെറ്റ് ഇതാണെന്നും ധവാൻ വ്യക്തമാക്കി. അലഹബാദ് ഹൈകോടതി വിധിക്കെതിരായ അപ്പീൽ ദീർഘകാലമായി സുപ്രീംകോടതിയുടെ പരിഗണനയിലാണെന്നും ധവാൻ ബോധിപ്പിച്ചു.
എന്നാൽ, സൊസൈറ്റി ആക്റ്റ് പ്രകാരം നടത്തിയിരുന്ന സ്ഥാപനം സ്ഥിരം സംവിധാനമാക്കിയാൽ അതിന്റെ ന്യൂനപക്ഷ സ്വഭാവം നഷ്ടപ്പെടുമോ എന്നതാണ് വിഷയമെന്ന് ചീഫ് ജസ്റ്റിസ് വിശദീകരിച്ചു. ഏഴംഗ ബെഞ്ചിലേക്ക് വിട്ട പരിഗണന വിഷയവുമായി ബന്ധപ്പെട്ട തർക്കത്തോടെയാണ് കേസിൽ സുപ്രീംകോടതി ചൊവ്വാഴ്ച വാദം തുടങ്ങിയത്.
അലീഗഢിന്റെ ഭാഗത്തുനിന്ന് വാദം തുടങ്ങാൻ വിളിച്ചപ്പോഴേക്കും സോളിസിറ്റർ ജനറലും അറ്റോർണി ജനറലും പരിഗണന വിഷയങ്ങൾ നിർദേശിച്ചത് രാജീവ് ധവാനെ ചൊടിപ്പിച്ചു. സുപ്രീംകോടതിയിൽ ഒരിക്കലും കാണാത്തതാണ് ഇത്തരം നടപടികളെന്ന് ധവാൻ വിമർശിച്ചു.
ന്യൂഡൽഹി: ന്യൂനപക്ഷങ്ങളുടെ ഹൃദയവും ആത്മാവുമാണ് ഭരണഘടനയുടെ 30ാം അനുഛേദമെന്ന് അലീഗഢ് മുസ്‍ലിം സർവകലാശാലയുടെ ന്യൂനപക്ഷ പദവി ഭരണഘടനാപരമാണെന്ന് വാദിച്ച മുതിർന്ന അഭിഭാഷകൻ രാജീവ് ധവാൻ ഭരണഘടന ബെഞ്ചിനെ ഓർമിപ്പിച്ചു. അലീഗഢിന്റെ പച്ചനിറത്തിലുള്ള ഔദ്യോഗിക ചിഹ്നത്തിലുള്ളത് ഖുർആൻ വചനമാണ്. അലീഗഢ് സർവകലാശാലയുടേതായി മുസ്‍ലിം പള്ളിയുണ്ട്. ഇസ്‍ലാമിക ദൈവശാസ്ത്രം അവിടെ പാഠ്യവിഷയമാണ്. അതൊരു മുസ്‍ലിം ന്യൂനപക്ഷ സ്ഥാപനമാണെന്ന് തെളിയിക്കുന്ന എല്ലാ രേഖകളും അവിടെയുണ്ട്. ഭരണഘടനാപരമായി അലീഗഢിനെ പൂർണമായും സർക്കാർ നിയന്ത്രണത്തിലാക്കാനാവില്ലെന്നും ധവാൻ വാദിച്ചു.
നിയമമുണ്ടാക്കിയ ശേഷം ഇന്നോളം എല്ലാ അലീഗഢ് കോർട്ട് അംഗങ്ങളും ചാൻസലർമാരും 37ഓളം വൈസ് ചാൻസലർമാരും മുസ്‍ലിംകളാണ്. അക്കാദമിക് കൗൺസിലിലും എക്സിക്യൂട്ടീവ് കൗൺസിലിലും മുസ്‍ലിംകളാണ്. അലീഗഢ് സർവകലാശാലയിൽ മുസ്‍ലിംകളെ നിയമിക്കുന്നത് സർക്കാറാണ്. സ്വന്തം ഇഷ്ടപ്രകാരം വിദ്യാഭ്യാസ സ്ഥാപനങ്ങൾ നടത്താമെന്ന് പറയുന്ന ഭരണഘടന അനുഛേദത്തിലെ ‘ഇഷ്ടപ്രകാരം’ എന്ന പ്രയോഗത്തിന് അടിവരയിടണമെന്ന് ധവാൻ ആവശ്യപ്പെട്ടു.
ന്യൂനപക്ഷങ്ങൾക്ക് വിദ്യാഭ്യാസ സ്ഥാപനങ്ങൾ സ്ഥാപിക്കാനും നടത്താനുമുള്ള അവകാശമുണ്ട്. ഏതെങ്കിലും നിയമം കൊണ്ട് ഭരണഘടന അനുഛേദത്തെ മറികടക്കാനാകില്ലെന്നും യു.ജി.സി നിയമം പോലും ഭരണഘടനയുടെ 30ാം അനുഛേദത്തെ മറികടക്കുന്നില്ലെന്നും ധവാൻ ബോധിപ്പിച്ചു. വാദം ഇന്നും തുടരും. ചീഫ് ജസ്റ്റിസിന് പുറമെ ജസ്റ്റിസുമാരായ സഞ്ജീവ് ഖന്ന, സൂര്യകാന്ത്, ജെ.ബി പർദിവാല, ദീപാങ്കർ ദത്ത, മനോജ് മിശ്ര, സതീഷ് ചന്ദ്ര ശർമ എന്നിവരടങ്ങുന്ന ബെഞ്ചാണ് അലീഗഢിന്റെ ന്യൂനപക്ഷ പദവി പരിശോധിക്കുന്ന ഭരണഘടന ബെഞ്ചിലുള്ളത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.