സവർക്കർക്കെതിരെ ലേഖനം: മാപ്പ്​ പറഞ്ഞ്​​ 'ദ വീക്ക്​'; എഴുതിയതിൽ ഉറച്ചുനിൽക്കുന്നുവെന്ന്​ ലേഖകൻ

ന്യൂഡൽഹി: വി.ഡി. സവർക്കറിനെ കുറിച്ച്​ അഞ്ച്​ വർഷങ്ങൾക്ക്​​ മുമ്പ്​ പ്രസിദ്ധീകരിച്ച​ ലേഖനത്തിൽ ​'ദ വീക്ക്​' വാരിക മാപ്പ്​ പറഞ്ഞ്​ തടിയൂരി. 'സിംഹവൽക്കരിച്ച ഒരു ആട്ടിൻകുട്ടി' എന്ന പേരിൽ നിരഞ്​ജൻ ടാക്​ലെ എഴുതിയ ലേഖനത്തിനാണ്​ മാപ്പ്​ പറഞ്ഞത്​. എന്നാൽ, വാരികയുടെ ഭാഗത്ത്​ നിന്നുണ്ടായ നടപടിയിൽ ഞെട്ടിപ്പോയെന്ന്​ ലേഖകൻ പ്രതികരിച്ചു. ലേഖനത്തിൽ പറഞ്ഞ കാര്യങ്ങളിൽ ഉറച്ചു നിൽക്കുന്നു. വിഷയത്തിൽ മാപ്പുപറയില്ലെന്നും കോടതിയിൽ കേസ്​ ജയിക്കാൻ വേണ്ടി പോരാടുമെന്നും ടാക്​ലെ പറഞ്ഞു.

'മലയാള മനോരമ'യുടെ ഉടമസ്​ഥതയിലുള്ളതാണ്​ വാരിക. വി.ഡി സവർക്കർ ബഹുമാന്യനാണെന്നും ലേഖനം കാരണം കുടുംബത്തിനുണ്ടായ വിഷമങ്ങൾക്ക്​ ക്ഷമാപണം നടത്തുന്നുവെന്നും 'ദ വീക്ക്​' മേയ്​ 23 ലക്കത്തിൽ മാനേജ്​മെന്‍റ്​ പ്രസിദ്ധീകരിച്ച കുറിപ്പിൽ പറയുന്നു. ലേഖനത്തിൽ വസ്​തു​തകൾ മനപ്പൂർവ്വം തമസ്​കരിച്ചുവെന്നും സവർക്കറെ അപകീർത്തിപ്പെടുത്തിയെന്നും കാണിച്ച്​ ചെറുമകനായ രഞ്​ജിത്​ സവർക്കർ 2016ൽ മാനനഷ്​ടക്കേസ്​ നൽകിയിരുന്നു. ഇതേതുടർന്നാണ്​ മാപ്പ്​ പറഞ്ഞത്​.

'നിയമപ്രകാരം അവർ ശിക്ഷിക്കപ്പെടണമെന്ന് ഞാൻ ആഗ്രഹിക്കുന്നു. ഇനി സവർക്കറെ കുറിച്ച് ആരും തെറ്റായ കാര്യങ്ങൾ എഴുതാൻ ധൈര്യപ്പെടരുത്​' -2016ൽ 'സൺഡേ ഗാർഡി'യനോട്​ രഞ്​ജിത്​ സവർക്കർ പറഞ്ഞു. ലേഖകൻ തെറ്റായ കാര്യങ്ങളാണ്​ എഴുതി പിടിപ്പിച്ചിരിക്കുന്നതെന്നും പ്രസിദ്ധീകരിക്കുന്നതിന്​ മുമ്പ്​ കുടുംബവുമായി ബന്ധപ്പെടാമായിരുന്നുവെന്നും രഞ്​ജിത്​ പറഞ്ഞു. എന്നാൽ, സവർക്കറെ കുറിച്ച്​ എഴുതപ്പെട്ടതും ചരിത്ര വസ്​തുതകളുമാണ്​ താൻ എഴുതിയിരിക്കുന്നതെന്നായിരുന്നു ടാക്​ലെയുടെ പ്രതികരണം. വക്കീൽ നോട്ടീസോ മറ്റോ തനിക്ക്​ ലഭിച്ചിട്ടില്ലെന്നും മാധ്യമങ്ങളിലൂടെയാണ്​ വിവരമറിഞ്ഞതെന്നും അദ്ദേഹം പ്രതികരിച്ചിരുന്നു. നാല്​ വർഷങ്ങൾക്ക്​ ശേഷവും തനിക്ക്​ പരാതിയുടെ ​പകർപ്പ് ഔദ്യോഗികമായി​ ലഭിച്ചില്ലെന്ന്​ അദ്ദേഹം 'ന്യൂസ്​ലോൺഡ്രി'യോട്​ വ്യക്തമാക്കി.

വാരികയുടെ ചുമതലയുള്ള എഡിറ്റർ വി.എസ്. ജയചന്ദ്രൻ കേസ്​ ഒത്തുതീർപ്പാക്കുകയായിരുന്നു. 'ഞങ്ങൾ കുറച്ചുകാലമായി കേസ്​ നടത്തി വരുന്നു. കേസ് തുടരുന്നത് വളരെ ബുദ്ധിമുട്ടായി' ജയചന്ദ്രൻ ന്യൂസ്​ ലോൺഡ്രിയോട് പറഞ്ഞു. 'കേസ്​ ഒത്തുതീർപ്പാക്കാനുള്ള പ്രധാന കാരണം ലേഖനം എഴുതിയ വ്യക്തി ഇപ്പോൾ ഞങ്ങളുടെ സ്​ഥാപനത്തിൽ ഇല്ല. ലേഖനം പ്രസിദ്ധീകരിച്ച വേളയിൽ ചുമതലയിലുണ്ടായിരുന്ന എഡിറ്റർ ടി.ആർ. ഗോപാലകൃഷ്ണനും ഞങ്ങൾക്കൊപ്പമില്ല. ഈ കാരണങ്ങൾ എല്ലാം പരിഗണിച്ച്​ കേസ് അവസാനിപ്പിക്കാൻ ശുപാർശ ചെയ്യുകയായിരുന്നു'-ജയചന്ദ്രൻ പറഞ്ഞു.

'ഹരജി നൽകിയ വ്യക്തിയുമായി ഞങ്ങൾ ബന്ധപ്പെട്ടു. തിരുത്തലോ ക്ഷമാപണമോ നൽകുമെന്ന് സമ്മതിച്ചത്​ പ്രകാരമാണ്​ ഇത്​ പ്രസിദ്ധീകരിച്ചത്. ഇനി ഞങ്ങൾ കോടതിയിൽ ഹാജരാകേണ്ടതില്ലെന്ന് പ്രതീക്ഷിക്കുന്നു' -അദ്ദേഹം കൂട്ടിച്ചേർത്തു.