കണ്ണൂര്‍: വെള്ളാപ്പള്ളി നടേശൻെറ പുതിയപാർട്ടി ആർ.എസ്.എസിൻെറ ഉപവിഭാഗമാണെന്ന് പ്രതിപക്ഷനേതാവ് വി.എസ് അച്യുതാനന്ദൻ. ശ്രീനാരായണ ഗുരുവിനെ നടേശന്‍ പണ്ടേ ഉപേക്ഷിച്ചിട്ടുള്ളതാണെന്നും വി.എസ് പറഞ്ഞു.
വിഎസ് കുലം കുത്തിയാണെന്നാണ് വെള്ളാപ്പള്ളി പറഞ്ഞത്. കുലംകുത്തി ആരാണെന്ന് കോടതി വിധി വരുമ്പോൾ അറിയാം. പൊതുമേഖലാ ബാങ്കില്‍നിന്നും പിന്നാക്ക വികസന ബാങ്കില്‍നിന്നുമായി കോടികൾ എടുത്താണ് വെള്ളാപ്പള്ളി തട്ടിപ്പ് നടത്തിയത്. പാവപ്പെട്ട സഹോദരിമാർക്ക് പലിശക്ക് പണം വായ്പ നൽകി. 18 ശതമാനം പലിശയാണ് ഈടാക്കിയത്. ആ സഹോദരിമാരുടെ കണ്ണീര് കണ്ടാണ് വെള്ളാപ്പള്ളിക്കെതിരെ താന്‍ കേസ് കൊടുത്തതെന്നും വി എസ് വ്യക്തമാക്കി.
നായാടി മുതൽ നമ്പൂതിരി വരെയുള്ളവരുടെ സമത്വം എന്ന് പറഞ്ഞ് ആരംഭിച്ച ജാഥയിൽ ഉയർത്തിക്കാട്ടിയത് ഐ.എസ്.ആർ.ഒ മുൻ മേധാവി ജി. മാധവൻ നായരെയാണ്. എന്നാൽ ജാഥയുടെ രക്ഷാധികാരിയായിരുന്ന മാധവൻ നായർ ഇപ്പോൾ ജാഥക്കൊപ്പമില്ല. ഇങ്ങനെയാണെങ്കിൽ ജാഥ തിരുവനന്തപുരത്തെത്തുന്നതിമുമ്പേ തന്നെ ജലസമാധിയാകുമെന്നും വി.എസ് ചൂണ്ടിക്കാട്ടി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.