പൊന്നോമനകളേ​ വിട; ഹൃദയം നുറുങ്ങി കേരളം

മഞ്ചേരി: ഉമ്മവെച്ച്​ താലോലിക്കേണ്ട കുരുന്നുകളുടെ ജീവനറ്റ ശരീരവും കൈയ്യിലേന്തി ഖബറിനരികിൽ ശരീഫ്​ നിന്നു. അവസാനമായി മൂന്ന് പിടി മണ്ണ് വാരിയിട്ട്​ പ്രാർഥനാനിരതനായ ആ പിതാവിനെ കണ്ടുനിൽക്കാനാവാതെ കൂടെയുണ്ടായിരുന്നവരുടെ ഹൃദയം നുറുങ്ങി.

ചികിത്സിക്കാൻ ആശുപത്രികൾ വിസമ്മതിച്ചതിനെ തുടർന്ന്​ മരിച്ച കൊണ്ടോട്ടി കിഴിശ്ശേരി സ്വദേശി മുഹമ്മദ് ഷരീഫ്-ഷഹ്​ല തസ്​നി ദമ്പതികളുടെ ഗർഭസ്​ഥ ശിശുക്കൾക്കാണ്​ വേദനയോടെ വിടനൽകിയത്​. ഞായറാഴ്ച ശസ്ത്രക്രിയയിലൂടെ പുറത്തെടുത്ത കുട്ടികൾക്ക് ജീവൻ നഷ്​ടമായിരുന്നു. മെഡിക്കൽ കോളജിൽനിന്ന്​ മൃതദേഹം ഉച്ചയോടെ കിഴിശ്ശേരി തവനൂർ ജുമുഅത്ത് പള്ളി ഖബർസ്ഥാനിൽ ഖബറടക്കി. ആദ്യത്തെ കൺമണികളെ താലോലിക്കാൻ കാത്തിരുന്നവൻ അവരുടെ ഖബറിനരികിൽ നിൽക്കുന്ന കാഴ്​ച കണ്ടവരുടെയൊക്കെ കണ്ണുനിറച്ചു.

അധികൃതരുടെ അനാസ്​ഥയാണ്​ കുട്ടികളുടെ മരണത്തിന്​ ഇടയാക്കിയത്​. അതുകൊണ്ട്​ തന്നെയാണ് 'എ​െൻറ മക്കളെ കൊന്നതാണെന്ന്' ആ പിതാവിന്​ ഉറക്കെ വിളിച്ചുപ​റയേണ്ടി വന്നതും. ശനിയാഴ്ച പുലർച്ച നാലിന് മഞ്ചേരി മെഡിക്കൽ േകാളജിലാണ് ഇവർ ആദ്യം ചികിത്സ തേടിയെത്തിയത്. എന്നാൽ, മെഡിക്കൽ േകാളജ് കോവിഡ് ആശുപത്രിയാണെന്നും യുവതി കോവിഡ് നെഗറ്റിവ് ആയതിനാൽ മറ്റ്​ ആശുപത്രികളെ സമീപിക്കണമെന്നും അധികൃതർ പറഞ്ഞു. ഇതോടെ മറ്റ്​ ആശുപത്രികളെ സമീപിച്ചെങ്കിലും ചികിത്സക്ക് ആൻറിജൻ ഫലം പോരെന്നും ആർ.ടി.പി.സി.ആർ ഫലം തന്നെ വേണമെന്നും ഇവർ നിർബന്ധം പിടിച്ചു.

ഇതോടെ 14 മണിക്കൂറാണ് യുവതിയും കുടുംബവും ചികിത്സ തേടി ആശുപത്രികൾ കയറിയിറങ്ങിയത്. ഒടുവിൽ കോഴിക്കോട് മെഡിക്കൽ കോളജിൽ എത്തിച്ചെങ്കിലും കുഞ്ഞുങ്ങളുടെ ഹൃദയമിടിപ്പ്​ നിലച്ചതായി സ്​ഥിരീകരിക്കുകയായിരുന്നു. അമിത രക്തസ്രാവത്തെ തുടർന്ന് തീവ്രപരിചരണ വിഭാഗത്തിൽ പ്രവേശിപ്പിച്ചിരുന്ന മാതാവിനെ ഐ.സി.യുവിൽനിന്ന്​ മുറിയിലേക്ക് മാറ്റിയിട്ടുണ്ട്.