തിരുവനന്തപുരം: പുതുവർഷത്തലേന്ന് മദ്യം വാങ്ങി വരികയായിരുന്ന സ്വീഡിഷ് പൗരനെ അവഹേളിച്ച സംഭവത്തിൽ ഗ്രേഡ് എസ്.ഐയെ സസ്പെൻഡ് ചെയ്തതിനൊപ്പം മൂന്ന് പൊലീസ് ഉദ്യോഗസ്ഥർക്കെതിരെ വകുപ്പുതല അന്വേഷണം. കോവളം സ്റ്റേഷനിലെ പ്രിൻസിപ്പൽ എസ്.ഐ അനീഷ്, സിവിൽ പൊലീസ് ഓഫിസർമാരായ മനീഷ്, സജിത് എന്നിവർക്കെതിരെയാണ് അന്വേഷണം പ്രഖ്യാപിച്ചിരിക്കുന്നത്. ഗ്രേഡ് എസ്.ഐ ഷാജിയെ സസ്പെൻഡ് ചെയ്തിരുന്നു. സ്പെഷൽ ബ്രാഞ്ച് റിപ്പോർട്ടിന്‍റെ അടിസ്ഥാനത്തിൽ സിറ്റി പൊലീസ് കമീഷണർ സ്പർജൻകുമാറാണ് ഉത്തരവിട്ടത്. സംഭവത്തെക്കുറിച്ച് വിശദ അന്വേഷണം നടത്തും.
സ്റ്റേഷൻ ഹൗസ് ഓഫിസർക്ക് വീഴ്ചയുണ്ടായോ എന്ന കാര്യവും പരിശോധിക്കും. പൊലീസ് ഓഫിസേഴ്സ് അസോസിയേഷന്‍റെ ഇടപെടലുകൾ തള്ളിയാണ് വൈകീട്ടോടെ സസ്പെൻഷൻ ഉത്തരവിറക്കിയത്. കഴിഞ്ഞദിവസം കോവളം സ്റ്റേഷൻ പരിധിയിലാണ് സ്വീഡിഷ് പൗരനായ സ്റ്റിഗ് സ്റ്റീഫൻ ആസ്ബർഗിന് നേരെ പൊലീസിന്‍റെ മോശം നടപടിയുണ്ടായത്. ഇത് ദേശീയതലത്തിൽ ചർച്ചയായി.
പുതുവത്സരാഘോഷത്തിന് മദ്യവുമായി പോയ സ്റ്റീഫനെ പൊലീസ് തടയുകയായിരുന്നു. സ്‌കൂട്ടറില്‍ മൂന്ന് ബോട്ടില്‍ മദ്യം കണ്ടെടുത്ത പൊലീസ് ബില്ല് ആവശ്യപ്പെട്ടു. ബിവറേജില്‍നിന്ന് ബില്ല് വാങ്ങാന്‍ മറന്നെന്ന് സ്റ്റീഫന്‍ പറഞ്ഞെങ്കിലും പൊലീസ് വിട്ടില്ല. കുപ്പിയടക്കം വലിച്ചെറിയാന്‍ ആവശ്യപ്പെട്ടു. വിദേശി മദ്യം ഒഴിച്ചുകളയുന്ന ദൃശ്യം മാധ്യമങ്ങളിൽ വലിയ വാർത്തയായി. പൊലീസ് നടപടിക്കെതിരെ പ്രതിപക്ഷവും രംഗത്തെത്തി.
സംഭവം വിവാദമായതോടെ മുഖ്യമന്ത്രി പിണറായി വിജയൻ ഡി.ജി.പിയോട് റിപ്പോര്‍ട്ട് തേടി. സംഭവത്തെ അപലപിച്ച് മന്ത്രി മുഹമ്മദ് റിയാസ് രംഗത്തെത്തുകയും മന്ത്രി വി. ശിവൻകുട്ടി സ്റ്റീഫനെ വസതിയിലേക്ക് വിളിച്ചുവരുത്തി ഖേദം പ്രകടിപ്പിക്കുകയും ചെയ്തു. സിറ്റി പൊലീസ് കമീഷണറുടെ നിർദേശാനുസരണം സ്പെഷൽ ബ്രാഞ്ച് ഡിവൈ.എസ്.പി അന്വേഷണത്തിലാണ് നാല് ഉദ്യോഗസ്ഥരുടെ ഭാഗത്ത് വീഴ്ച കണ്ടെത്തിയത്.
ഗ്രേഡ് എസ്.ഐ ഷാജിയെ സസ്പെൻഡ് ചെയ്യാൻ ശനിയാഴ്ച രാവിലെ തീരുമാനിച്ചെങ്കിലും ഇതിനെതിരെ കേരള പൊലീസ് ഓഫിസേഴ്സ് അസോസിയേഷൻ രംഗത്തെത്തിയത് നടപടി വൈകിപ്പിച്ചു. വസ്തുതകള്‍ അന്വേഷിക്കാതെയാണ് സസ്പെന്‍ഷനെന്നും സമഗ്ര അന്വേഷണം വേണമെന്നുമുള്ള ആവശ്യമാണ് അസോസിയേഷന്‍ മുന്നോട്ടുവെച്ചത്. അന്വേഷണ റിപ്പോര്‍ട്ട് വരുംവരെ സസ്പെന്‍ഷന്‍ നടപടി മരവിപ്പിക്കണമെന്നും ആവശ്യപ്പെട്ടു. താമസസ്ഥലത്തേക്കല്ല, ബീച്ചിലേക്കാണ് വിദേശപൗരന്‍ മദ്യം കൊണ്ടുപോയതെന്നും അസോസിയേഷന്‍ ആരോപിച്ചു. എന്നാൽ ഇതെല്ലാം തള്ളിയാണ് വൈകുന്നേരത്തോടെ സസ്പെൻഷൻ ഉത്തരവ് പുറത്തിറങ്ങിയത്. അതിനുമുമ്പ് തന്നെ മന്ത്രി വി. ശിവൻകുട്ടി സ്റ്റീഫനുമായി കൂടിക്കാഴ്ച നടത്തി ഉചിതമായ നടപടി സ്വീകരിക്കുമെന്ന് ഉറപ്പും നൽകിയിരുന്നു.
തിരുവനന്തപുരം: താൻ തുടങ്ങിയ ഹോംസ്റ്റേയിൽ പലരും പ്രശ്നങ്ങളുണ്ടാക്കിയതിനെ തുടർന്ന് കോടതി പൊലീസ് സംരക്ഷണം അനുവദിച്ചെങ്കിലും നീതി ലഭിച്ചില്ലെന്ന് സ്വീഡിഷ് പൗരൻ സ്റ്റിഗ് സ്റ്റീഫൻ ആസ്ബെർഗ്. കേരള പൊലീസിൽനിന്ന് ഇത്തരമൊരു അനുഭവം പ്രതീക്ഷിച്ചില്ല. കേസെടുത്ത് അകത്തിടുമെന്ന് ഭീഷണിപ്പെടുത്തി. മൂന്ന് കുപ്പി മദ്യം തന്‍റെ കൈവശമുണ്ടായിരുന്നു. ബില്ല് ഇല്ലാത്തതിനാൽ മദ്യം കൊണ്ടുപോകാൻ അനുവദിച്ചില്ല. എറിഞ്ഞുകളയാൻ ആവശ്യപ്പെട്ടു. പ്ലാസ്റ്റിക് ബോട്ടിൽ ആയതിനാൽ മദ്യം ഒഴുക്കിക്കളയുകയായിരുന്നു.
തന്‍റെ നിരപരാധിത്വം തെളിയിക്കാനാണ് മദ്യം ഒഴുക്കിക്കളഞ്ഞിട്ടും ബില്ല് വാങ്ങി സ്റ്റേഷനിൽ കൊണ്ടുകൊടുത്തത്. നാലുവർഷമായി കേരളത്തിൽ ടൂറിസം രംഗത്ത് പ്രവർത്തിക്കുകയാണ്. എന്നാല്‍, നാട്ടുകാരിൽനിന്നും പൊലീസിൽനിന്നും നിരന്തരം പ്രശ്നങ്ങളാണ് നേരിടുന്നതെന്നും അദ്ദേഹം പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.