ബ്ലാക്ക്മാൻ ഇറങ്ങിയെന്ന് വാട്സ്ആപ്പിൽ വ്യാജ പ്രചരണം: മുക്കത്ത്​ യുവാവ് അറസ്​റ്റിൽ

മുക്കം: ബ്ലാക്ക്മാൻ ഇറങ്ങിയെന്ന് വാട്സ്ആപ്പ് വഴി മുക്കം നഗരസഭയിലെ വിവിധ പ്രദേശങ്ങളിൽ വ്യാജ പ്രചരണം നടത്തി ഭീതി പടർത്തിയ യുവാവിനെ മുക്കം പൊലീസ്​ അറസ്​റ്റ്​ ചെയ്തു. മുത്തേരി സ്വദേശി രാഗേഷിനെയാണ്​ (34) മുക്കം സി.ഐ ബി.കെ. സിജു വി​​െൻറ നേതൃത്വത്തിലുള്ള പൊലീസി​​െൻറ സൈബർ വിഭാഗം വലയിലാക്കിയത്. നഗരസഭയിലെ നീലേശ്വരം, മുത്തേരി, മണാശ്ശേരി, പൊറ്റശ്ശേരി തുടങ്ങി ഒട്ടേറെ ഗ്രാമപ്രദേശങ്ങളിൽ ബ്ലാക്ക്മാൻ ഇറങ്ങിയിട്ടുണ്ടെന്നും പിടികൂടിയതായുമാണ്​ യുവാവ്​ വ്യാജ സന്ദേശങ്ങളിലൂടെ പ്രചരിപ്പിച്ചത്. ഞായറാഴ്ച രാത്രി 11 മണിയോടുകൂടി മുത്തേരി ഭാഗത്തെ ഒരുവീട്ടിൽ കയറിയ ബ്ലാക്ക്മാനെ നാട്ടുകാരും മുക്കം പോലീസും ചേർന്ന് പിടികൂടിയെന്നാണ്​ ഇയാൾ സ്വന്തം ശബ്ദത്തിൽ പ്രചരിപ്പിച്ചത്. 

വാർത്ത നാട്ടിലെ വിവിധ ഗ്രൂപ്പുകളിൽ പ്രചരിച്ചതോടെ പ്രദേശത്തേക്ക് ആളുകൾ കൂട്ടമായെത്തി. വിവരമറിഞ്ഞ് സ്ഥലത്തെത്തിയ മുക്കം പോലീസ്​ വാർത്ത വ്യാജമാണെന്ന് സ്ഥിരീകരിച്ചു. തുടർന്ന് ജനങ്ങളെ പ്രദേശത്തു നിന്ന്​ പറഞ്ഞയച്ചു. ശേഷം അന്വേഷണം ആരംഭിച്ച പൊലീസ് വ്യാജ സന്ദേശത്തി​​െൻറ ഉറവിടം മനസിലാക്കുകയും തിങ്കളാഴ്ച്ച രാവിലെ പ്രതിയെ കസ്​റ്റഡിയിലെടുക്കുകയുമായിരുന്നു. സന്ദേശം മായ്​ച്​കളഞ്ഞ്​ ഉറവിടം കണ്ടെത്താതിരിക്കുന്നതിനുള്ള ശ്രമം നടത്തിയെങ്കിലും പൊലീസ് ഇവ റിക്കവർ ചെയ്തെടുക്കുകയായിരുന്നു. 

ഇയാളെ വിശദമായി ചോദ്യം ചെയ്തതിൽ നിന്ന്​ വ്യാജ സന്ദേശം പ്രചരിപ്പിച്ച ആളുകളെയും ഇത്തരം സന്ദേശങ്ങൾ പ്രചരിക്കുന്നത് ശ്രദ്ധയിൽ പെട്ടിട്ടും അതുതടയുന്നതിന് വേണ്ട നടപടി സ്വീകരിക്കാത്ത വാട്സാപ്പ് ഗ്രൂപ്പ്‌ അഡ്‌മിനെയും പോലീസ് അന്വേഷിക്കുന്നുണ്ട്​. ഇവരെ പിടികൂടി നിയമ നടപടികൾ സ്വീകരിക്കുമെന്നും കോവിഡ് കാലഘട്ടത്തിൽ ജനങ്ങളെ ഭീതിയിലാഴ്ത്തുന്ന ഇത്തരം സന്ദേശം പ്രചരിപ്പിച്ച പ്രതിക്കെതിരെ നിയമനടപടികൾ സ്വീകരിച്ചു വരികയാണെന്നും പൊലീസ്​ അറിയിച്ചു. കേരള പോലീസ് ആക്ട് 118 (ബി) പ്രകാരം മൂന്നുവർഷം വരെ തടവും 10,000 രൂപവരെ പിഴയും ലഭിക്കുന്ന കുറ്റവും കൂടാതെ ഐ.ടി ആക്ട് പ്രകാരവുമുള്ള കുറ്റവുമാണ്​ ഇയാൾക്കെതിരെ ചുമത്തിയത്​. എസ്.ഐ കെ. ഷാജിദ്, എ.എസ്.ഐ സലീം മുട്ടത്ത്, സീനിയർ സിവിൽ പൊലീസ് ഓഫീസർ ലിനേഷ്, സിവിൽ പൊലീസ് ഓഫീസർമാരായ ഷഫീഖ് നീലിയാനിക്കൽ, അനൂപ് തറോൽ, എം. അരുൺ എന്നിവരും പൊലീസ്​ സംഘത്തിലുണ്ടായിരുന്നു.