തൃശൂർ: കരുവന്നൂർ സഹകരണ ബാങ്കിലെ ക്രമക്കേടുകൾ സംബന്ധിച്ച് കൂടുതൽ വിവരങ്ങൾ പുറത്തുവരുന്നു. വൻകിട ലോണുകൾക്ക് പ്രത്യേക ഏജന്‍റുമാർ പ്രവർത്തിച്ചിരുന്നെന്നാണ് പുതുതായി പുറത്തുവരുന്ന വിവരം. വൻകിട ലോണുകൾ തരപ്പെടുത്തി കൊടുക്കാൻ പത്തു ശതമാനം വരെ കമീഷൻ ഈടാക്കുകയും ചെയ്തിരുന്നത്രെ.
ഈടില്ലാതെയും വ്യാജരേഖകളുണ്ടാക്കിയും ഇങ്ങനെ കോടികണക്കിന് രൂപയുടെ ലോണുകൾ നൽകിയിട്ടുണ്ട്. ഏജന്‍റുമാരുടെ ഇടപെടലിൽ പാസാക്കിയ വൻകിട ലോണുകൾ തേക്കടിയിലെ റിസോർട്ടിൽ നിക്ഷേപിച്ചതായാണ് പുറത്തുവരുന്ന വിവരം. ഏജന്‍റുമാരുടെ തന്നെ റിസോർട്ടിലാണ് ഈ പണം നിക്ഷേപിച്ചത്.
മുൻ ബ്രാഞ്ച് മാനേജർ ബിജു കരീം, കമീഷൻ ഏജന്‍റ് ബിജോയി എന്നിവർ ഇടനിലക്കാരായി പ്രവർത്തിച്ചാണ് വൻകിട ലോണുകൾ നൽകിയിരുന്നത്.
ഭരണസമിതി പിരിച്ചുവിട്ടതോടെ അഡ്മിനിസ്ട്രേറ്റർ ഭരണത്തിലായ കരുവന്നൂർ ബാങ്കിലെ ജപ്തി നടപടികൾ താൽകാലികമായി നിർത്തിവെച്ചിട്ടുണ്ട്.
വൻക്രമക്കേട് കണ്ടെത്തിയതിനെ തുടർന്നാണ് കഴിഞ്ഞ ദിവസമാണ് സി.പി.എം നേതാവ് കെ.കെ. ദിവാകരന്‍ പ്രസിഡൻറായുള്ള ഭരണസമിതി ജില്ല രജിസ്ട്രാര്‍ പിരിച്ചുവിട്ട് മുകുന്ദപുരം അസിസ്റ്റൻറ് രജിസ്ട്രാര്‍ (ജനറല്‍) എം.സി. അജിത്തിനെ അഡ്മിനിസ്‌ട്രേറ്ററായി നിയോഗിച്ചത്. 2011ല്‍ പ്രസിഡൻറായ കെ.കെ. ദിവാകരെൻറ നേതൃത്വത്തിലുള്ള ഭരണസമിതി 2016ല്‍ വീണ്ടും അധികാരത്തിലെത്തുകയായിരുന്നു. 2014 മുതൽ 2020 വരെയുള്ള കാലഘട്ടത്തിലാണ് ബാങ്കിൽ വൻ ക്രമക്കേട് നടന്നതായി കണ്ടെത്തിയത്.
വായ്പ തട്ടിപ്പുമായി ബന്ധപ്പെട്ട് ഉയര്‍ന്ന ആരോപണങ്ങളില്‍ സഹകരണ വകുപ്പ് നടത്തിയ അന്വേഷണത്തിലാണ് വ്യാപക ക്രമക്കേട് കണ്ടെത്തിയത്. ഇതിനെ തുടര്‍ന്ന് ബാങ്ക് സെക്രട്ടറിയടക്കം നാല് ജീവനക്കാരെ സസ്പെൻഡ് ചെയ്തിരുന്നു. ഇവരടക്കം ആറുപേര്‍ക്കെതിരെ കേസെടുക്കുകയും ചെയ്തിട്ടുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.