എടനീര്‍ സ്വാമിജീസ് ഹയര്‍ സെക്കന്‍ഡറി സ്കൂൾ
വിദ്യാര്‍ഥികള്‍ വെതര്‍ സ്റ്റേഷനില്‍
ദിനാന്തരീക്ഷ സ്ഥിതി നിരീക്ഷിക്കുന്നു
കാസർകോട്: ദൃശ്യ-ശ്രാവ്യ മാധ്യമങ്ങളിലൂടെയും പത്രത്തിലൂടെയും മാത്രം അറിഞ്ഞിരുന്ന പ്രാദേശിക കാലാവസ്ഥ വിവരങ്ങള്‍ വിദ്യാര്‍ഥികള്‍ക്ക് കേരള സ്‌കൂള്‍ വെതര്‍ സ്റ്റേഷന്‍ പദ്ധതിയിലൂടെ സ്വന്തമായി നിരീക്ഷിച്ച് കണ്ടെത്താൻ അവസരം. ക്ലാസ് മുറിയിലെ പഠനത്തിനൊപ്പം ഓരോ ദിവസത്തെയും കാലാവസ്ഥാ മാറ്റങ്ങള്‍ തിരിച്ചറിഞ്ഞ് മറ്റുള്ളവര്‍ക്കു മുന്നില്‍ അവതരിപ്പിക്കാം.
പൊതുവിദ്യാഭ്യാസ വകുപ്പ് സമഗ്ര ശിക്ഷ കേരളം വഴി നടപ്പിലാക്കുന്ന പദ്ധതിയായ കേരള സ്‌കൂള്‍ വെതര്‍ സ്റ്റേഷന്‍ ജില്ലയിലെ 11 സ്‌കൂളുകളില്‍ തുടങ്ങി. പരിസ്ഥിതി സന്തുലനാവസ്ഥ നിലനിര്‍ത്തുന്നതില്‍ നിര്‍ണായക പങ്കുവഹിക്കുന്ന കാലാവസ്ഥയെ കുറിച്ച് സ്‌കൂള്‍തലം മുതൽ ബോധവല്‍കരിക്കുക എന്ന ലക്ഷ്യത്തോടെയാണ് കേരള സ്‌കൂള്‍ വെതര്‍ സ്റ്റേഷന്‍ പദ്ധതി നടപ്പാക്കുന്നത്.
സംസ്ഥാനത്തെ 258 സ്‌കൂളുകളില്‍ നടപ്പാക്കുന്ന പദ്ധതിക്ക് കേന്ദ്ര ഭൗമശാസ്ത്ര മന്ത്രാലയത്തിന്റെ കീഴിലുള്ള ഇന്ത്യന്‍ കാലാവസ്ഥാ നിരീക്ഷണ കേന്ദ്രത്തിന്റെ അംഗീകാരം ലഭിച്ചിട്ടുണ്ട്. പ്രൈമറിതലം മുതല്‍ ഹയര്‍ സെക്കന്‍ഡറിതലം വരെ സോഷ്യല്‍ സയന്‍സിന്റെയും ഭൂമി ശാസ്ത്രത്തിന്റെയും ഭാഗമായി പഠിക്കുന്ന കാലാവസ്ഥാ ശാസ്ത്രത്തിന് പദ്ധതി ഏറെ മുതല്‍ക്കൂട്ടാവും.
സ്‌കൂള്‍ പരിസരത്ത് സ്ഥാപിച്ചിരിക്കുന്ന വെതര്‍ സ്റ്റേഷനില്‍ മഴ മാപിനി, മിനിമം മാക്സിമം തെര്‍മോമീറ്റര്‍, വെറ്റ് ആന്‍ഡ് ഡ്രൈ ബള്‍ബ് തെര്‍മോമീറ്റര്‍, വിന്‍ഡ് വെയിന്‍, അനിമോ മീറ്റര്‍ എന്നിവയാണ് സജ്ജീകരിച്ചിരിക്കുന്നത്. എല്ലാ ദിവസവും രാവിലെ 11 മണിക്ക് വെതര്‍ സ്റ്റേഷനിലെത്തുന്ന വിദ്യാര്‍ഥികള്‍ പ്രാദേശിക ദിനാവസ്ഥ വിവരങ്ങള്‍ കുറിച്ചെടുത്ത് പ്രത്യേകം തയ്യാറാക്കിയ വെതര്‍ ഡാറ്റാ ബുക്കില്‍ രേഖപ്പെടുത്തും.
സ്‌കൂളുകളിലെ ഭൂമിശാസ്ത്ര അധ്യാപകന്‍ നേതൃത്വം നല്‍കുന്ന പ്രവര്‍ത്തനങ്ങളുടെ ഭാഗമായി കാലാവസ്ഥ റിപ്പോര്‍ട്ട് തയ്യാറാക്കുന്നത് ഹയര്‍ സെക്കന്‍ഡറി വിദ്യാര്‍ഥികളാണ്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.