ഇനി സൈക്കിളിലേറി കൊച്ചി കാണാം

കൊച്ചി: സൈക്കിൾ ചവിട്ടി സുരക്ഷിതമായി നഗരം ചുറ്റാൻ സഹായകരമായി കൊച്ചിയിലെ ​റോഡുകളിൽ സൈക്കിൾ ലൈൻ രേ​ഖപ്പെടുത്തി തുടങ്ങി. കൊച്ചി സ്​മാർട്ട്​ മിഷൻ ലിമിറ്റഡ്​ സ്​മാർട്ട്​റോഡുകളായി വികസിപ്പിക്കുന്ന പാതകളിലാണ്​ ലൈനുകൾ​. ഇത്​ രേഖപ്പെടുത്തുന്നത്​ ഈമാസം 25ന്​ പൂർത്തിയാകും.

മാർച്ച്​ 31ന്​ സ്​മാർട്ട്​ റോഡുകളിൽ സൈക്കിൾ ട്രാക്ക്​ തുറക്കും. ജർമൻ വികസന ഏജൻസി 'ജിസ്​' സഹകരണത്തോടെ ഇന്ത്യ സൈക്കിൾസ്​ ഫോർ ചെയ്​ഞ്ച്​ കാമ്പയിനി​െൻറ ഭാഗമായാണിത്​. ഗോശ്രീപാലം തുടങ്ങുന്നത്​ മുതൽ ഹൈകോടതി ജങ്​ഷൻ വരെയാണ്​ എബ്രഹാം മാടമാക്കൽ റോഡിൽ സൈക്കിൾ ട്രാക്ക്​ രേഖപ്പെടുത്തിയത്​. കൊച്ചിയിലും ഫോർട്ട്​കൊച്ചിയിലുമായി അഞ്ച്​ സ്​മാർട്ട്​ റോഡുകളിലാണ്​ സൈക്കിൾ ലൈനുകൾ വരുക.

'ഭാവിയിൽ കൊച്ചിയിലെ എല്ലാ റോഡുകളും സൈക്കിൾ യാത്രികർക്ക്​ സൗഹൃദമാക്കുകയാണ്​ ലക്ഷ്യം. കോർപറേഷൻ, മോ​ട്ടോർ വാഹന വകുപ്പ്​, പൊലീസ്​, അർബൻ പ്ലാനർമാർ എന്നിവയെയെല്ലാം കൂട്ടിയിണക്കിയാണ്​ പദ്ധതി നടപ്പാക്കുന്നത്​. ജനത്തെ സൈക്കിളിലേക്ക്​ ആകർഷിക്കാൻ ആദ്യപടിയാണ് ​സ്ഥിരമായ സൈക്കിൾ ട്രാക്കുകൾ. ഇതിലൂടെ സൈക്കിൾ സൗഹൃദ റോഡുകൾ വികസിപ്പിക്കാൻ കഴിയുമെന്ന്​ സി.എസ്​.എം.എൽ സി.ഇ.ഒ ജാഫർ മാലിക്​ പറഞ്ഞു. ട്രാക്കുകൾക്ക്​ പുറമെ ബസ്​ബേ, വാക്​വേ, റോഡരികിൽ ഇരിപ്പിടങ്ങൾ, സീബ്രാ ക്രോസിങ്​ ഉൾപ്പെടെ സ്​മാർട്ട്​ റോഡുകളിൽ സജ്ജമാക്കും.

എൽ.ഇ.ഡി ലൈറ്റുകൾ, പൂച്ചെടികൾ, കാഴ്​ച വൈകല്യമുള്ളവർക്ക്​ സുരക്ഷിത യാത്രക്ക്​ സംവിധാനം എല്ലാം ഈ റോഡുകളിൽ ഒരുക്കുന്നുണ്ട്​. ബാനർജി റോഡ്​, ഷൺമുഖം റോഡ്​, പാർക്​ അവന്യൂ റോഡ്​, ഡി.എച്ച്​ റോഡ്​, സൗത്ത്​ റെയിൽ​വേ സ്​റ്റേഷൻ റോഡ്​ എന്നിവ സ്​മാർട്ട്​ റോഡുകളാക്കുന്ന പണികൾ പുരോഗമിക്കുകയാണ്​.