വനത്തിൽ മനുഷ്യന്റെ തലയോട്ടി കണ്ടെത്തി

പുനലൂർ: തേക്ക് തോട്ടത്തിൽ മനുഷ്യന്റെ തലയോട്ടി കണ്ടെത്തി. ആര്യങ്കാവ് കോട്ടവാസൽ തേക്ക് പ്ലാന്റേഷനിലാണ് തലയോട്ടി കണ്ടെത്തിയത്. ഇയാളുടേതെന്ന് കരുതുന്ന ലുങ്കിയും മൊബൈൽ ഫോണും ചെരുപ്പും സമീപത്തുനിന്ന് ലഭിച്ചു. തേക്ക് പ്ലാന്റേഷനിൽ മാർക്കിങ് ജോലികൾ നടത്തുന്നതിനിടെ വനപാലകരാണ് ചൊവ്വാഴ്ച രാവിലെ തലയോട്ടി കണ്ടത്. കോട്ടവാസലിൽനിന്ന് രണ്ട് മാസം മുമ്പ് കാണാതായ യുവാവിന്‍റേതാണെന്ന് സംശയിക്കുന്നു. തെന്മല പൊലീസും കൊല്ലത്തുനിന്ന് ഫോറൻസിക് വിഭാഗവും എത്തി തലയോട്ടി വിദഗ്ധ പരിശോധനക്കായി വൈകീട്ടോടെ തിരുവനന്തപുരം മെഡിക്കൽ കോളജ് ആശുപത്രിയിലേക്ക് മാറ്റി. കാർ തലകീഴായി മറിഞ്ഞു പുനലൂർ: കാർ തലകീഴായി മറിഞ്ഞ്​ യാത്രക്കാരായ മൂന്നുപേർ അദ്​ഭുതകരമായി രക്ഷപ്പെട്ടു. കൊല്ലം-തിരുമംഗലം ദേശീയപാതയിൽ ഇടപ്പാളയത്ത് ക്ഷേത്രത്തിന് സമീപം തിങ്കളാഴ്ച വൈകീട്ടായിരുന്നു അപകടം. തെങ്കാശിയിലേക്ക് പോയ കാർ നിയന്ത്രണംവിട്ട് മൺതിട്ടയിലിടിച്ച് മറിയുകയായിരുന്നു. തലച്ചിറ സ്വദേശികളാണ് കാറിലുണ്ടായിരുന്നത്.