അന്തർ സംസ്ഥാന ലഹരി കടത്ത്​ സംഘത്തിലെ പ്രധാനി പിടിയിൽ

പുനലൂർ: തമിഴ്നാട്ടിൽനിന്ന് മാരകമായ ലഹരിഗുളിക കേരളത്തിലേക്ക് കടത്തുന്ന സംഘത്തിലെ മുഖ്യകണ്ണിയായ യുവാവിനെ എക്സൈസ് സ്പെഷൽ സ്ക്വാഡ് അറസ്​റ്റ് ചെയ്തു. ആലപ്പുഴ വെള്ളക്കിണർ വാർഡിൽ വള്ളക്കടവ് സ്വദേശി ടി. നഹാസ് (35) ആണ് പിടിയിലായത്. ആലപ്പുഴ കേന്ദ്രീകരിച്ചുള്ള അന്തർസംസ്ഥാന ലഹരി കടത്ത്​ റാക്കറ്റിലെ പ്രധാന കണ്ണിയാണ് ഇയാളെന്ന് അന്വേഷണസംഘം അറിയിച്ചു. ഈ സംഘത്തിലെ മറ്റ് മൂന്നുപേർ തമിഴ്നാട്ടിലടക്കം നിരീക്ഷണത്തിലാണ്.

കഴിഞ്ഞ മാസം 13ന് തമിഴ്നാട്ടിൽനിന്നും വാഴക്കുല കയറ്റിവന്ന വാഹനത്തിൽനിന്ന്​ വലിയ തോതിൽ മാരക ലഹരി ഗുളികയായ ട്രമഡോർ ആര്യങ്കാവ് എക്സൈസ് ചെക്പോസ്​റ്റ്​ സി.ഐ ബിനുവും സംഘവും പിടികൂടിയിരുന്നു. ഡ്രൈവർ തമിഴ്നാട് സ്വദേശി സെന്തിൽ അറസ്​റ്റിലാകുകയും ചെയ്​തു.

ഇയാളെ ചോദ്യംചെയ്തതിൽ നിന്നാണ് ആലപ്പുഴ കേന്ദ്രീകരിച്ച് നഹാസിെൻറ നേതൃത്വത്തിലുള്ള സംഘത്തെക്കുറിച്ച് സൂചന ലഭിച്ചത്. കേന്ദ്ര സർക്കാർ 2016ൽ നിരോധിച്ചതാണ് അതിമാരക വിഭാഗത്തിലുള്ള ഈ ഗുളിക. ഒരുവർഷമായി സംഘം ഈ ഗുളിക കേരളത്തിലേക്ക് കടത്തുന്നുണ്ട്. തമിഴ്നാട്ടിലെ ചില മെഡിക്കൽ സ്​റ്റോറുകളിൽ നിന്നാണ് ഗുളിക ശേഖരിക്കുന്നത്. അത്തരം മെഡിക്കൽ സ്​റ്റോറുകളെ കുറിച്ചുള്ള വിവരവും അന്വേഷണസംഘത്തിന് ലഭിച്ചു.

കഴിഞ്ഞ നാലുമാസത്തിനിടെ നാലുതവണ ഗുളിക കടത്തി. തമിഴ്നാട്ടിൽ നിന്നും എത്തിക്കുന്ന ഗുളികൾ തെന്മല, പുനലൂർ, കായംകുളം എന്നിവിടങ്ങളിലാണ് മറ്റുള്ളവർക്ക് കൈമാറുന്നത്. ചെക്പോസ്​റ്റിൽ ഗുളിക പിടിച്ചതോടെ കൊല്ലം എക്സൈസ് അസി. കമീഷണർ ബി. സുരേഷിെൻറ നേതൃത്വത്തിൽ പ്രത്യേക സംഘം രൂപവത്കരിച്ച് ആലപ്പുഴ എക്സൈസ് ഇൻറലിജൻസ് ഇൻസപെക്ടർ പ്രശാന്തിെൻറ ചുതലയിൽ അന്വേഷണം നടത്തിയാണ് രണ്ടാംപ്രതിയായ നഹാസിനെ അറസ്​റ്റ് ചെയ്തത്.

ഇവരുടെ ഫോൺകോളുകൾ, വഴികളിലെ സി.സി.ടി.വി ദൃശ്യങ്ങൾ എന്നിവ പരിശോധിച്ചാണ് പ്രധാനപ്രതിയെ കുടുക്കിയത്. പ്രിവൻറീവ് ഓഫിസർമാരായ അലക്സ്, ഗിരീഷ്, സി.ഇ.ഒ ക്രിസ്​റ്റൻ, വനിത സി.ഇ.ഒമാരായ ശാലിനി ശശി, ബീന, ഷാഡോസംഘത്തിലെ അശ്വന്ത്, എസ്. സുന്ദരം, അരുൺ വിജയ് എന്നിവരും അന്വേഷണസംഘത്തിലുണ്ടായിരുന്നു.