ശാസ്താംകോട്ട: മനുഷ്യ മനഃസാക്ഷിയെ മരവിപ്പിച്ച ശാസ്താംകോട്ട കായൽദുരന്തം നടന്നിട്ട് 42 ആണ്ട്. 1982 ജനുവരിയിൽ മകരപ്പൊങ്കലിന്റെ തലേദിവസം ശാസ്താംകോട്ട കായലിൽ വള്ളംമുങ്ങി 24 പേർ മരിച്ച സംഭവമാണ് ശാസ്താംകോട്ടകായൽ ദുരന്തം. ശാസ്താംകോട്ട ചന്തയിലെത്തി സാധനങ്ങൾ വിൽക്കുന്നതിനും വാങ്ങുന്നതിനും ക്ഷേത്രദർശനം നടത്തുന്നതിനും എത്തിയ പടിഞ്ഞാറേകല്ലട സ്വദേശികളായ 24പേരിൽ 22പേരും പടി.കല്ലടയിലെ വിളന്തറ ദേശക്കാരായിരുന്നു. ശാസ്താംകോട്ട അമ്പലക്കടവിൽനിന്ന് പടി.കല്ലടയിലെ വെട്ടോലിക്കടവിലേക്ക് കടത്ത് വള്ളത്തിൽ കൂടുതൽ ആളുകൾ കയറി. കടത്തുകാർ മുന്നറിയിപ്പ് നൽകിയിട്ടും ആരും വകവച്ചില്ല.
കായലിന്‍റെ നടുക്കെത്തി വള്ളം ആടിയുലഞ്ഞതുകണ്ട് തീരത്തുനിന്ന് മറ്റൊരു വള്ളം വന്നു. ഉടൻ എല്ലാവരും ഈ വള്ളത്തിൽ കയറാൻ തിക്കിത്തിതിരക്കി. അങ്ങനെ രണ്ട് വള്ളങ്ങളും മറിഞ്ഞു. വള്ളക്കാരും നീന്തൽ അറിയാവുന്നവരും ഏറെപ്പേരെ രക്ഷപ്പെടുത്തിയെങ്കിലും 24 പേർ ശാസ്താംകോട്ട കായലിന്‍റെ കാണാക്കയത്തിൽ മുങ്ങിത്താണു. രക്ഷാപ്രവർത്തനം നടത്തിയ ചിലരും മരണപ്പെട്ടു. കൊച്ചിയിൽനിന്ന് മുങ്ങൽ വിദഗ്ധരെത്തിയാണ് മൃതദേഹങ്ങൾ കണ്ടെടുത്തത്. നമ്മുടെ കായൽ കൂട്ടായ്മ പ്രവർത്തകരുടെ നേതൃത്വത്തിൽ ഇപ്പോഴും ദുരന്തം നടന്ന ദിവസം അനുസ്മരണങ്ങൾ സംഘടിപ്പിക്കാറുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.