representational image
ശാസ്താംകോട്ട: ഓടിക്കൊണ്ടിരിക്കുന്ന ബസില്‍നിന്നും തെറിച്ചുവീണ് വിദ്യാര്‍ഥിക്ക് ഗുരുതര പരിക്ക്. പെരുവേലിക്കര മധുമന്ദിരത്തില്‍ മുരളീധരന്‍പിള്ളയുടെ മകന്‍ ആദർശിനാണ് (14) ഗുരുതര പരിക്കേറ്റത്. ചൊവ്വാഴ്ച വൈകീട്ട് നാലിനാണ് സംഭവം.
പുന്നമൂട് ആര്‍.എച്ച്.എസ് സ്‌കൂളിലെ ഒമ്പതാം ക്ലാസ് വിദ്യാര്‍ഥിയായ ആദര്‍ശ് ക്ലാസ് കഴിഞ്ഞ് വീട്ടിലേക്ക് മടങ്ങവേ കടപുഴ പഴയ ബസ് സ്റ്റാൻഡിന് സമീപമായിരുന്നു അപകടം. ഇറങ്ങാനുള്ള സ്റ്റോപ് ആയപ്പോള്‍ സീറ്റില്‍നിന്ന് എഴുന്നേറ്റ് ബസിന്റെ പിന്‍വാതിലിന്റ അടുത്തേക്ക് നീങ്ങവേ ബസ് വളവ് തിരിയുകയും ആദര്‍ശ് തെറിച്ചു വെളിയിലേക്ക് വീഴുകയുമായിരുന്നു.
ബസില്‍ ഡോർ തുറന്ന് കിടക്കുകയായിരുന്നു. ഉടന്‍തന്നെ ശാസ്താംകോട്ടയിലെ സ്വകാര്യ ആശുപത്രിയില്‍ എത്തിച്ചെങ്കിലും പരിക്ക് ഗുരുതരമായതിനാല്‍ കൊല്ലത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്.
പിന്നാലെ കെ.എസ്.ആര്‍.ടി.സി ബസ് ഉണ്ടായിരുന്നതിനാല്‍ സ്വകാര്യ ബസ് അമിത വേഗത്തിലായിരുന്നതായും അപകടസ്ഥലത്ത് ബസ് നിര്‍ത്താതെ ഏറെദൂരം പിന്നിട്ടശേഷമാണ് നിര്‍ത്തിയതെന്നും നാട്ടുകാര്‍ പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.