ഷോളയൂരിൽ വായിൽ വ്രണങ്ങളുമായി കാട്ടാന അവശനിലയിൽ

അഗളി: വായിൽ ഗുരുതര പരിക്കേറ്റ കാട്ടാനയെ സംസ്ഥാന അതിർത്തിയോട് ചേർന്ന കീരിപ്പതി വനമേഖലയിൽ കണ്ടെത്തി. ഷോളയൂരിലെ ഇരുപതോളം വീടുകൾ തകർത്ത 'ബുൾഡോസർ' എന്ന്​ വിളിപ്പേരുള്ള ആനയാണിത്.

മാസങ്ങളായി ഷോളയൂർ വരഗംപാടി പ്രദേശങ്ങളിൽ സ്വൈരവിഹാരം നടത്തിയിരുന്ന ആന അടുത്തിടെ അപ്രത്യക്ഷനായിരുന്നു. തിങ്കളാഴ്ച വൈകീട്ട് ആറോടെ ആനക്കട്ടിക്കു സമീപം അതിർത്തി പ്രദേശമായ തൂവയിലെത്തി.

തൂവ ഊരിലെ ആദിവാസികളാണ് പരിക്കേറ്റ ആനയെ കണ്ടെത്തിയതും വനംവകുപ്പിനെ അറിയിച്ചതും. ചൊവ്വാഴ്​ച ഉച്ചയോടെ ആന കീരിപ്പതി വനമേഖലയിലേക്ക് എത്തി.

ഭക്ഷണം കഴിക്കാനാകാതെ അവശ നിലയിലായതിനാൽ മയക്കുവെടി വെച്ച് ചികിത്സ നൽകാൻ സാധിക്കില്ലെന്നാണ് വെറ്ററിനറി ഡോക്​ടർമാർ അറിയിച്ചത്. നിരന്തരം വീടുകൾ തകർത്ത ആനക്ക് നാട്ടുകാരാണ് ബുൾഡോസർ എന്ന പേരിട്ടത്.

ആക്രമണം വർധിച്ചതോടെ റേഡിയോ കോളർ ഘടിപ്പിക്കാൻ വനം വകുപ്പ് നടപടി ആരംഭിച്ചിരുന്നു. പരിക്കിൽ ദുരൂഹതയുള്ളതായാണ്​ സൂചന. അടുത്തിടെ 17 ആനകളാണ് കോയമ്പത്തൂർ വനമേഖലയിൽ ​െചരിഞ്ഞത്.