ഗവ. മെഡിക്കല്‍ കോളജിലെ കെട്ടിടങ്ങളുടെ നിര്‍മാണ പ്രവര്‍ത്തനങ്ങളുമായി ബന്ധപ്പെട്ട് മന്ത്രി എ.കെ. ബാലെൻറ അധ്യക്ഷതയില്‍ ചേര്‍ന്ന അവലോകന യോഗം
പാലക്കാട്: ഗവ. മെഡിക്കല്‍ കോളജിലെ കെട്ടിടങ്ങളുടെ നിര്‍മാണ പ്രവര്‍ത്തനങ്ങള്‍ വേഗത്തിലാക്കാന്‍ ഉദ്യോഗസ്ഥര്, കരാറുകാര്‍ എന്നിവര്‍ക്ക് മന്ത്രി എ.കെ. ബാലന്‍ നിര്‍ദേശം നല്‍കി. ഒ.പി ബ്ലോക്ക് ഉദ്ഘാടനം 2021 ജനുവരി 20നും ക്ലിനിക്കല്‍ ഒ.പിയുടെ ഉദ്ഘാടനം മാര്‍ച്ച് 31നും നടത്താനാണ് തീരുമാനം. കെട്ടിടങ്ങളുടെ നിര്‍മാണം വേഗത്തിലാക്കുന്നതിനും ആവശ്യമെങ്കില്‍ കൂടുതല്‍ തൊഴിലാളികളെ ഉപയോഗിക്കുന്നതിനും മന്ത്രി നിർദേശം നല്‍കി. മെഡിക്കല്‍ കോളജില്‍ ചേര്‍ന്ന അവലോകന യോഗത്തിലാണ് തീരുമാനം.
പീഡിയാട്രിക്, ഗൈനക്കോളജി, സര്‍ജറി, ജനറല്‍ മെഡിസിന്‍ വിഭാഗങ്ങളിലെ ഒ.പിയാണ് ആദ്യഘട്ടത്തില്‍ ആരംഭിക്കുക. ആകെ 12 വിഭാഗങ്ങളിലായാണ് ഒ.പിയുള്ളത്. കെട്ടിടങ്ങളുടെ നിര്‍മാണം പൂര്‍ത്തിയാകുന്നതിനനുസരിച്ച് ഒ.പികളുടെ എണ്ണം വര്‍ധിപ്പിക്കും. അവലോകന യോഗത്തിനുശേഷം കെട്ടിടങ്ങളുടെ നിര്‍മാണ പ്രവര്‍ത്തനങ്ങള്‍ സന്ദര്‍ശിച്ച് മന്ത്രി നിര്‍മാണ പുരോഗതി വിലയിരുത്തി.
കെട്ടിടങ്ങളുടെ കരാറുകാര്‍ക്ക് നല്‍കാനുള്ള കുടിശ്ശിക സംബന്ധിച്ച് എസ്.സി, എസ്.ടി പ്രിന്‍സിപ്പല്‍ സെക്രട്ടറി, പി.ഡബ്ല്യൂ.ഡി സെക്രട്ടറി എന്നിവരുമായി ചര്‍ച്ച ചെയ്ത് തീരുമാനമെടുക്കാനും മന്ത്രി നിർദേശിച്ചു. യോഗത്തില്‍ എസ്.സി, എസ്.ടി പ്രിന്‍സിപ്പല്‍ സെക്രട്ടറി പുനീത് കുമാര്‍, പി.ഡബ്ല്യൂ.ഡി പ്രിന്‍സിപ്പല്‍ സെക്രട്ടറി ആനന്ദ് സിങ്, എസ്.സി, എസ്.ടി ഡയറക്ടര്‍ ശ്രീവിദ്യ, പാലക്കാട് ഗവ. മെഡിക്കല്‍ കോളജ് ഡയറക്ടര്‍ ഡോ. എം.എസ്. പത്മനാഭന്‍, മെഡിക്കല്‍ കോളജ് പ്രിന്‍സിപ്പല്‍ ഡോ. ഇഗ്‌നേഷ്യസ്, മറ്റ് ഉദ്യോഗസ്ഥര് എന്നിവര്‍ പങ്കെടുത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.