ചാ​ല​ക്കു​ടി അ​ടി​പ്പാ​ത; മ​ണ്ണും നി​ർ​മാ​ണ​വും വേ​ണം, എ​ങ്ങ​നെ​?

ചാ​ല​ക്കു​ടി: ദീ​ർ​ഘ​കാ​ല​മാ​യി യാ​ത്ര​ക്കാ​ർ​ക്ക് ബു​ദ്ധി​മു​ട്ട് സൃ​ഷ്ടി​ക്കു​ന്ന ദേ​ശീ​യ​പാ​ത ചാ​ല​ക്കു​ടി അ​ടി​പ്പാ​ത നി​ർ​മാ​ണം വേ​ഗം പൂ​ർ​ത്തീ​ക​രി​ക്ക​ണം, എ​ന്നാ​ൽ, അ​തി​നാ​വ​ശ്യ​മാ​യ മ​ണ്ണ് കോ​ട്ട​മ​ല​യി​ൽ നി​ന്നെ​ടു​ക്കു​ന്ന​തി​ൽ ആ​ശ​ങ്ക​യു​മു​ണ്ട്. കോ​ട്ടാ​മ​ല​യി​ലെ മ​ണ്ണെ​ടു​പ്പി​നെ​തി​രെ​യു​ള്ള പ്ര​തി​ഷേ​ധം അ​ടി​പ്പാ​ത നി​ർ​മാ​ണ​ത്തെ ബാ​ധി​ക്കു​മോ​യെ​ന്നും ആ​ശ​ങ്ക​യു​ണ്ട്. നി​ർ​മാ​ണം മു​ട​ങ്ങി​ക്കി​ട​ന്ന അ​ടി​പ്പാ​ത​യു​ടെ ജോ​ലി പു​തി​യ ക​രാ​റു​കാ​ര​ൻ ഏ​റ്റെ​ടു​ത്ത​തോ​ടെ വേ​ഗ​ത കൈ​വ​രി​ച്ചി​രു​ന്നു.

അ​ടി​പ്പാ​ത​യു​ടെ പ്ര​ധാ​ന കോ​ൺ​ക്രീ​റ്റി​ങ് പെ​ട്ടെ​ന്ന് പൂ​ർ​ത്തി​യാ​യ​ത് പ്ര​തീ​ക്ഷ ന​ൽ​കി​യി​രു​ന്നു. ഫെ​ബ്രു​വ​രി​യോ​ടെ പ​ണി​ക​ൾ തീ​രാ​നു​ള്ള സാ​ധ്യ​ത​യാ​ണ് ഉ​ണ്ടാ​യി​രു​ന്ന​ത്. തു​ട​ർ​ന്ന് ഇ​രു​വ​ശ​വും മ​ണ്ണി​ട്ട് ഉ​യ​ർ​ത്തി​ക്കൊ​ണ്ട് വ​രു​ന്ന പ്ര​വൃ​ത്തി​യാ​ണ് അ​വ​ശേ​ഷി​ച്ചി​രു​ന്ന​ത്. ഏ​ക​ദേ​ശം 5000 ലോ​റി മ​ണ്ണാ​ണ് ഇ​തി​ന് ആ​വ​ശ്യം വ​രു​ന്ന​ത്.

ഇ​ത് മു​ഴു​വ​നും കോ​ട്ടാ​മ​ല​യി​ടി​ച്ച് കൊ​ണ്ടു​വ​രാ​നാ​ണ് അ​ധി​കൃ​ത​ർ ല​ക്ഷ്യ​മി​ടു​ന്ന​ത്. ഇ​ത് പ​രി​യാ​രം പ​ഞ്ചാ​യ​ത്തി​ലെ മോ​തി​ര​ക്ക​ണ്ണി പ്ര​ദേ​ശ​ത്ത് പ്ര​തി​ഷേ​ധം ഉ​യ​ർ​ത്തി. പ്ര​തി​ഷേ​ധ​ത്തെ തു​ട​ർ​ന്ന് പ​ണി ത​ട​സ്സ​പ്പെ​ടാ​ൻ സാ​ധ്യ​ത​യേ​റെ​യാ​ണ്. അ​ടി​പ്പാ​ത​ക്ക് ആ​വ​ശ്യ​മാ​യ മ​ണ്ണ് മ​റ്റെ​വി​ടെ​യെ​ങ്കി​ലും​നി​ന്ന് ക​ണ്ടെ​ത്തും​വ​രെ പ​ണി​ക​ൾ​ക്ക് പ്ര​തി​സ​ന്ധി​യു​ണ്ടാ​കാം.

കോ​ട്ട​മ​ല​യി​ൽ നി​ന്ന് മ​ണ്ണെ​ടു​ക്കു​ന്ന​തി​നെ​തി​രെ പ്ര​ക​ട​മാ​യ പ്ര​തി​ഷേ​ധ​വു​മാ​യി രം​ഗ​ത്തു​ള്ള​ത് എ​ൽ.​ജെ.​ഡി മാ​ത്ര​മാ​ണ്. ഇ​തോ​ടെ സി.​പി.​എം, കോ​ൺ​ഗ്ര​സ്, സി.​പി.​ഐ, ബി.​ജെ.​പി എ​ന്നീ പാ​ർ​ട്ടി​ക​ൾ​ക്കും ഈ ​വി​ഷ​യ​ത്തി​ൽ ന​യം വ്യ​ക്ത​മാ​ക്കേ​ണ്ടി വ​രും. മ​ണ്ണെ​ടു​പ്പി​ന് ത​ട​സ്സം നേ​രി​ട്ടാ​ൽ ക​രാ​റു​കാ​ര​ന് ബ​ദ​ൽ മാ​ർ​ഗ​ങ്ങ​ൾ തേ​ടേ​ണ്ടി വ​രും. 

കോ​ട്ടാ​മ​ല​യി​ലെ മ​ണ്ണെ​ടു​പ്പി​ന് അ​നു​മ​തി​യു​ണ്ട് -ത​ഹ​സി​ൽ​ദാ​ർ

ചാ​ല​ക്കു​ടി: കോ​ട്ടാ​മ​ല​യി​ലെ മ​ണ്ണെ​ടു​പ്പ് ജി​യോ​ള​ജി വ​കു​പ്പി​​ന്റെ അ​നു​മ​തി​യോ​ടെ​യാ​യ​തി​നാ​ൽ ത​ട​യാ​നാ​വി​ല്ലെ​ന്ന് ചാ​ല​ക്കു​ടി ത​ഹ​സി​ൽ​ദാ​ർ ഇ.​എ​ൻ. രാ​ജു. താ​ലൂ​ക്ക് വി​ക​സ​ന സ​മി​തി യോ​ഗ​ത്തി​ൽ അം​ഗ​ങ്ങ​ൾ ഈ ​വി​ഷ​യ​ത്തി​ൽ പ്ര​ശ്ന​മു​ന്ന​യി​ച്ച​പ്പോ​ഴാ​ണ് ത​ഹ​സി​ൽ​ദാ​ർ ഇ​ങ്ങ​നെ പ്ര​തി​ക​രി​ച്ച​ത്.

കോ​ട്ടാ​മ​ല​യി​ലെ മ​ണ്ണെ​ടു​പ്പി​നെ കു​റി​ച്ച് ചാ​ല​ക്കു​ടി താ​ലൂ​ക്ക് വി​ക​സ​ന സ​മി​തി യോ​ഗ​ത്തി​ൽ സ​ജീ​വ​മാ​യ ച​ർ​ച്ച​യാ​യി. കോ​ട്ടാ​മ​ല​യി​ലെ മ​ണ്ണെ​ടു​പ്പ് ഉ​ണ്ടാ​ക്കു​ന്ന പ​രി​സ്ഥി​തി പ്ര​ശ്ന​ങ്ങ​ൾ ശ്ര​ദ്ധ​യി​ൽ​പെ​ട്ടി​ട്ടി​ല്ലെ​ന്നും വൈ​കാ​തെ പ്ര​ശ്നം ക​ല​ക്ട​റു​ടെ ശ്ര​ദ്ധ​യി​ൽ പെ​ടു​ത്താ​മെ​ന്നും അ​ദ്ദേ​ഹം വ്യ​ക്ത​മാ​ക്കി.

ചാ​ല​ക്കു​ടി ദേ​ശീ​യ​പാ​ത​യി​ൽ ഇ​പ്പോ​ൾ അ​പ​ക​ട​ങ്ങ​ൾ ന​ട​ന്നു​കൊ​ണ്ടി​രി​ക്കു​ന്ന​തി​നാ​ൽ അ​ടി​പ്പാ​ത​യു​ടെ നി​ർ​മാ​ണ​ത്തി​നാ​ണ് പ്രാ​ധാ​ന്യം കൊ​ടു​ക്കേ​ണ്ട​തെ​ന്ന് ചാ​ല​ക്കു​ടി ബ്ലോ​ക്ക് പ​ഞ്ചാ​യ​ത്ത് പ്ര​സി​ഡ​ന്റ് വേ​ണു ക​ണ്ഠ​രു​മ​ഠ​ത്തി​ൽ അ​ഭി​പ്രാ​യ​പ്പെ​ട്ടു. മ​ണ്ണെ​ടു​പ്പ് മൂ​ലം മോ​തി​ര​ക്ക​ണ്ണി മേ​ഖ​ല​യി​ൽ വ​ൻ​ദു​ര​ന്തം സം​ഭ​വി​ക്കാ​തി​രി​ക്കാ​ൻ ഉ​ട​ൻ മ​ണ്ണെ​ടു​പ്പ് നി​ർ​ത്തി​വ​യ്ക്ക​ണ​മെ​ന്നും അ​ധി​കാ​രി​ക​ൾ പ്ര​ശ്നം പ​ഠി​ക്ക​ണ​മെ​ന്നും എ​ൽ.​ജെ.​ഡി പ്ര​തി​നി​ധി ജോ​ർ​ജ് വി. ​ഐ​നി​ക്ക​ൽ ആ​വ​ശ്യ​പ്പെ​ട്ടു.

മേ​ലൂ​ർ പ​ഞ്ചാ​യ​ത്ത് പ്ര​സി​ഡ​ന്റ് എം.​എ​സ്. സു​നി​ത, കാ​ടു​കു​റ്റി പ​ഞ്ചാ​യ​ത്ത് പ്ര​സി​ഡ​ന്റ് പ്രി​ൻ​സി ഫ്രാ​ൻ​സി​സ്, ഐ.​ഐ. അ​ബ്ദു​ൽ മ​ജീ​ദ്, ഉ​ദ്യോ​ഗ​സ്ഥ പ്ര​തി​നി​ധി​ക​ൾ എ​ന്നി​വ​ർ പ​ങ്കെ​ടു​ത്തു.