തിരുവനന്തപുരം: സമകാലീന ഇന്ത്യൻ രാഷ്ട്രീയം, ആത്മീയത തുടങ്ങി പുസ്തകഭ്രാന്തും പെൺകരുത്തിന്റെ ശബ്ദങ്ങൾ വരെയുളള വിഷയങ്ങളിൽ പാനൽ ചർച്ചകളും നിയമസഭ അന്താരാഷ്ട്ര പുസ്തകോത്സവത്തിന്‍റെ ഭാഗമായി ഒരുക്കും. ജനുവരി 7 മുതൽ 13 വരെ നിയമസഭ സമുച്ചയത്തിലാണ് പുസ്തകമേളയുടെ മൂന്നാം പതിപ്പ്.
മന്ത്രിമാരായ കെ. രാജൻ, റോഷി അഗസ്റ്റിൻ, എം.എൽ.എമാരായ എം.വി. ഗോവിന്ദൻ മാസ്റ്റർ, രമേശ് ചെന്നിത്തല, പി. കെ. ബഷീർ, മാത്യു ടി. തോമസ് എന്നിവർ സമകാലീന ഇന്ത്യൻ രാഷ്ട്രീയത്തെക്കുറിച്ച് സംസാരിക്കും. ജോൺ ബ്രിട്ടാസ് എം.പി മോഡറേറ്ററാകുന്ന പാനൽ ചർച്ചയിൽ പി.കെ. കൃഷ്ണദാസും പങ്കെടുക്കും. സഹകരണമേഖലയും പ്രൊഫഷണലിസവും എന്ന വിഷയത്തിലെ ചർച്ചയിൽ മന്ത്രി വി.എൻ. വാസവൻ, കോലിയക്കോട് കൃഷ്ണൻനായർ, ഡോ. ബി.പി. പിള്ള, ഇ.ജി. രഞ്ജിത് കുമാർ, ബി. രാജേന്ദ്രകുമാർ, ഡോ. രാജേഷ് എസ് പൈങ്ങാവിൽ, ഡോ. രാജേഷ് കുമാർ എസ് എന്നിവർ പങ്കെടുക്കും.
മനുഷ്യനെ ചേർത്തുനിർത്തുന്ന ആത്മീയതയെക്കുറിച്ചുള്ള പാനൽ ചർച്ചയിൽ നിഷാന്ത് എം.വി മോഡറേറ്ററാകും. ഗീവർഗീസ് മാർ കൂറിലോസും മുസ്തഫ മൗലവിയും സ്വാമി ഗുരുരത്‌നം ജ്ഞാനതപസ്വിയും ഭാഗമാകും. പി.കെ. ശ്രീമതി ടീച്ചർ, ബി.എം. സുഹറ, ഡോ. രേഖാ രാജ്, ഷീബ അമീർ, ഡോ. അനു ഗോപിനാഥ് എന്നിവർ പങ്കെടുക്കുന്ന പെൺകരുത്തിന്റെ ശബ്ദങ്ങളെക്കുറിച്ചുള്ള ചർച്ച മാതു സജി നയിക്കും. അച്ചടി മാധ്യമത്തിന്റെ ആയുസ്സ് എന്ന വിഷയത്തിലെ ചർച്ചയിൽ സരസ്വതി നാഗരാജൻ മോഡറേറ്ററാകും. രാജഗോപാൽ ആർ, മനോജ് കെ. ദാസ്, ജോസ് പനച്ചിപ്പുറം, ആർ.എസ്. ബാബു എന്നിവർ പങ്കെടുക്കും.
എഴുത്തും തൊഴിലും ഇഴചേരുമ്പോൾ എന്ന വിഷയത്തിലെ ചർച്ചയിൽ അനു പാപ്പച്ചൻ മോഡറേറ്ററാകും. പ്രതാപൻ, സുഭാഷ് ഓട്ടുമ്പുറം, ധനുജ കുമാരി, ഇളവൂർ ശശി, റാസി എന്നിവർ പാനലിസ്റ്റുകളായെത്തും. സുജിത് കൊടക്കാട് ചർച്ച നയിക്കുന്ന പുസ്തകഭ്രാന്തിനെക്കുറിച്ചുള്ള ചർച്ചയിൽ കീർത്തി ജ്യോതിയും ആർ. അനന്തകൃഷ്ണനും ശരൺ രാജീവും ഭാഗമാകും. ബാലസാഹിത്യം- ഉണ്ണികളെ ഒരു കഥ പറയാം എന്ന ചർച്ചയിൽ ബിജു തുറയിൽകുന്ന് മോഡറേറ്ററാകും. ഡോ. കെ. ശ്രീകുമാറും കൃപ അമ്പാടിയും ഉണ്ണി അമ്മയമ്പലവും സിബിജോൺ തൂവലും പങ്കെടുക്കും.
വിവർത്തന സാഹിത്യത്തിന്റെ സൗന്ദര്യം എന്ന വിഷയത്തിലെ ചർച്ചയിൽ സുനീത ബാലകൃഷ്ണൻ മോഡറേറ്ററാകും. ഡോ. പ്രിയ കെ. നായരും പ്രൊഫ. എ. അരവിന്ദാക്ഷനും കബനി സിയും ഡോ. സണ്ണി എൻ.എമ്മും പങ്കെടുക്കും.
വായനയാണ് ലഹരി എന്ന പ്രമേയത്തിൽ ചിട്ടപ്പെടുത്തുന്ന പുസ്‌കോത്സവത്തിൽ 350 പുസ്തക പ്രകാശനങ്ങളും 60 ലധികം പുസ്തക ചർച്ചകളും നടക്കും. ടോക്ക്, ഡയലോഗ്, മീറ്റ് ദ ഓതർ, സ്മൃതിസന്ധ്യ, കവിയരങ്ങ്, കഥാപ്രസംഗം, കവിയും കവിതയും, കഥയരങ്ങ്, ഏകാംഗനാടകം, സിനിമയും ജീവിതവും തുടങ്ങി വിവിധ വിഭാഗങ്ങളിൽ 70ലധികം പരിപാടികൾക്ക് വേദിയാകും.
ദിവസവും വൈകിട്ട് 7 മുതൽ വിവിധ മാധ്യമങ്ങളുടെ നേതൃത്വത്തിലുള്ള മെഗാ ഷോയുമുണ്ടാവും. പുസ്തകോത്സവത്തിൽ പങ്കെടുക്കുന്നതിനും നിയമസഭ കാണുന്നതിനും പൊതുജനങ്ങൾക്ക് അവസരമുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.