അക്ഷരവീട്​ ‘ഥ’ അപ്പു മുട്ടറക്ക്​ സമർപ്പിച്ചു

നെടുമ്പന (കൊല്ലം): അക്ഷരവീട്​ പദ്ധതിയിലെ പുതിയ​ ഭവനം എഴുത്തിലും അഭിനയ-കലാപ്രവർത്തനങ്ങളിലും ശ്രദ്ധേയനായ അപ്പു മുട്ടറക്ക്​ സമർപ്പിച്ചു. മലയാളത്തിന്‍റെ മധുരാക്ഷരങ്ങൾ ചേർത്തുനിർത്തി ‘മാധ്യമ’വും അഭിനേതാക്കളുടെ സംഘടനയായ അമ്മയും യൂനിമണി-എൻ.എം.സി ഗ്രൂപ്പും സംയുക്തമായി സമർപ്പിക്കുന്ന അക്ഷരവീട്​ പദ്ധതിയുടെ 35ാമത്​ ഭവനമായ ‘ഥ’ ആണ്​ കൊല്ലം നെടുമ്പനയിൽ നടന്ന ചടങ്ങിൽ അപ്പു മുട്ടറക്ക്​ നൽകിയത്​. മാധ്യമം സി.ഇ.ഒ പി.എം. സാലിഹിന്‍റെ അധ്യക്ഷതയിൽ ചേർന്ന യോഗത്തിൽ കുണ്ടറ എം.എൽ.എ പി.സി. വിഷ്‌ണുനാഥ്‌ അപ്പു മുട്ടറക്ക് ഭവനവും പ്രശസ്തിപത്രവും കൈമാറി.

നെടുമ്പന പഞ്ചായത്ത്​ പ്രസിഡന്‍റ്​ ഗിരിജകുമാരി പൊന്നാടയണിയിച്ചു. പഞ്ചായത്തംഗം അനിൽകുമാർ, മാധ്യമം ജില്ല രക്ഷാധികാരി അനീഷ്​ യൂസുഫ്​, മാധ്യമം ഡെപ്യൂട്ടി ജനറൽ മാനേജർ ഹാരിസ്​ വള്ളിൽ, ജില്ല കോഓഡിനേറ്റർ ഡോ. അയൂബ്​ ഖാൻ എന്നിവർ ആശംസ നേർന്നു. ഭവന നിർമാണത്തിനായി പ്രവർത്തിച്ച മാധ്യമം ഏരിയ ഫീൽഡ്​ കോഓഡിനേറ്റർ ഇല്ല്യാസ്​ കരുവ, ഹാബി ഇൻഡസ്​ട്രിയൽ കൺസൾട്ടൻസി മാനേജിങ്​ ഡയറക്ടർ സമദ്​ കണ്ണനല്ലൂർ, കോൺട്രാക്ടർ എൽ. ബിജുകുമാർ എന്നിവർക്ക്​ പി.എം. സാലിഹ്​ ഉപഹാരം സമർപ്പിച്ചു.

മാധ്യമം തിരുവനന്തപുരം റീജനൽ മാനേജർ ബി. ജയപ്രകാശ് സ്വാഗതവും കൊല്ലം ബ്യൂറോ ചീഫ്​ എം. ഷറഫുല്ലാഖാൻ നന്ദിയും പറഞ്ഞു. കുരീപ്പള്ളി സലീം, കണ്ണനല്ലൂർ എ.എൽ. നിസാമുദ്ദീൻ, നാസിമുദ്ദീൻ ലബ്ബ, ബിജു പഴങ്ങാലം, പ്രസന്ന രാമ​ചന്ദ്രൻ, ശിവദാസൻ, ഹാഷിം, പെരുമ്പുഴ ഗോപാലകൃഷ്ണപിള്ള, സുരേഷ്​ സിദ്ദാർഥ, യൂസുഫ്​ കുഞ്ഞ്​, പി.ജെ. ഉണ്ണികൃഷ്ണൻ, അഡ്വ. കെ.പി സജിനാഥ്​, ശശിധരൻ കുണ്ടറ, സിറാജ്​ കണ്ണനല്ലൂർ, വി. സുരേന്ദ്രൻ, ഇ.കെ.സിറാജുദ്ദീൻ, പഞ്ചായത്ത്​ വൈസ്​പ്രസിഡന്‍റ്​ ബി. സുധാകരൻ നായർ എന്നിവർ സന്നിഹിതരായിരുന്നു.

വിവിധ മേഖലകളിലായി 35 പ്രതിഭകൾക്കുള്ള അക്ഷരവീടുകൾ സംസ്ഥാനത്തെ വിവിധ ഇടങ്ങളിലായി ഇതിനകം സമർപ്പിച്ചു. കൊല്ലം ജില്ലയിലെ രണ്ടാമത്തെ അക്ഷരവീടാണിത്​. അധ്യാപന രംഗത്തുള്ള അപ്പു മുട്ടറ ‘നമുക്കൊന്ന് മിണ്ടാം’, വെളിച്ചം വന്നുപറഞ്ഞത്, ‘മരണത്തിന്റെ ബാക്കി’ കവിത സമാഹാരങ്ങളുൾപ്പെടെ അഞ്ച്​ പുസ്തകങ്ങളുടെ രചയിതാവാണ്.