കൊച്ചി: മാധ്യമപ്രവർത്തനത്തിന് മാർഗനിർദേശം വേണമെന്ന് ആവശ്യപ്പെട്ട് നൽകിയ ഹരജികൾ ഹൈകോടതിയുടെ അഞ്ചംഗ ബെഞ്ച് തള്ളി. മാധ്യമങ്ങളെ നേരിട്ട് നിയന്ത്രിക്കാനാവില്ലെന്നും എന്നാൽ, ഉത്തരവാദിത്തത്തോടെയുള്ള സമീപനം മാധ്യമങ്ങളുടെ ഭാഗത്തുനിന്ന് ഉണ്ടാകണമെന്നും ഹൈകോടതി ഉത്തരവിൽ വ്യക്തമാക്കി. മാധ്യമങ്ങളുടെ അവകാശം ഭരണഘടനാപരമാണെന്ന നിരീക്ഷണത്തോടെയാണ് കോടതി ഹരജികൾ തള്ളിയത്.
മാധ്യമ സ്വാതന്ത്ര്യവും വ്യക്തി സ്വാതന്ത്ര്യവും തമ്മിൽ സംഘർഷമുണ്ടാകുമ്പോൾ മാധ്യമ സ്വാതന്ത്ര്യം നിയന്ത്രിക്കണം. അത് ജുഡീഷ്യൽ അതോറിറ്റിയുടെ കർത്തവ്യമാണ്. വ്യക്തികളുടെ സ്വാതന്ത്ര്യം ഹനിക്കുന്ന മാധ്യമ ഇടപെടലുകൾ ഉണ്ടായാൽ കോടതിയെ സമീപിക്കാം. അഭിപ്രായ സ്വാതന്ത്ര്യം ഭരണഘടനാപരമാണ്. ഇതിനെ നിയന്ത്രിക്കാനുള്ള മാർഗവും ഭരണഘടനയിലുണ്ട്. ക്രിമിനൽ കേസുകളിൽ ആരെയെങ്കിലും കുറ്റക്കാരനെന്നോ നിരപരാധിയെന്നോ ചിത്രീകരിക്കുന്നത് മാധ്യമങ്ങൾ ഒഴിവാക്കണം. വിചാരണ കാത്തുകിടക്കുന്നതോ നടക്കുന്നതോ ആയ കേസുകളിൽ മാധ്യമങ്ങൾ തീർപ്പു കൽപ്പിച്ചാൽ ഭരണഘടനാപരമായി മാധ്യമങ്ങൾക്ക് ലഭിക്കുന്ന പരിരക്ഷ നഷ്ടമാകുമെന്നും കോടതി വ്യക്തമാക്കി.
മാധ്യമപ്രവർത്തകരും അഭിഭാഷകരും തമ്മിൽ പലപ്പോഴായി കോടതികളിൽ ഉൾപ്പെടെ ഉണ്ടായ സംഘർഷങ്ങളുടെ തുടർച്ചയായാണ് ഹൈകോടതിയിൽ ചില ഹരജികൾ എത്തിയത്. മാധ്യമ വിചാരണ വലിയ തോതിൽ നടക്കുന്നതിനാൽ മാധ്യമങ്ങളെ നിയന്ത്രിക്കണമെന്നായിരുന്നു ഹരജിക്കാരുടെ ആവശ്യം. നേരത്തെ കേസ് പരിഗണിച്ച മൂന്നംഗ ബെഞ്ച് കേസ് വിശാല ബെഞ്ചിന് കൈമാറുകയായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.