പെരിന്തൽമണ്ണ തെരഞ്ഞെടുപ്പ്: തപാൽ വോട്ട് സൂക്ഷിച്ച പെട്ടികൾ തുറന്ന് പരിശോധിക്കണമെന്ന് ഹൈകോടതി

കൊച്ചി: പെരിന്തൽമണ്ണ നിയമസഭ മണ്ഡലത്തിലെ ബാലറ്റ് പെട്ടികൾ സ്​ട്രോങ്​ റൂമിൽനിന്ന്​ കാണാതായ സംഭവത്തിൽ തെരഞ്ഞെടുപ്പ്​ കമീഷന്‍റെ അന്വേഷണത്തിന്​ ഉത്തരവിട്ട്​ ഹൈകോടതി. ഹൈകോടതിയിൽ സൂക്ഷിച്ച മണ്ഡലത്തിലെ ബാലറ്റ്​ പെട്ടിയടക്കം തെരഞ്ഞെടുപ്പ്​ രേഖകൾ കോടതി ഹാളിൽവെച്ച്​ തുറന്ന്​ പരിശോധിക്കാനും ജസ്റ്റിസ്​ എ. ബദറുദ്ദീൻ അനുമതി നൽകി. ബാലറ്റ് പെട്ടി കാണാതായ സംഭവത്തിൽ കോടതിയുടെയോ തെരഞ്ഞെടുപ്പ് കമീഷന്റെയോ മേൽനോട്ടത്തിൽ അന്വേഷണം ആവശ്യപ്പെടുന്ന നജീബ് കാന്തപുരം എം.എൽ.എയുടെ ഉപഹരജിയിലാണ്​ ഉത്തരവ്​.

പോസ്റ്റൽ ബാലറ്റുകൾ പെരിന്തൽമണ്ണ സബ് ട്രഷറിയിൽനിന്ന്​ മലപ്പുറം ജോ. രജിസ്ട്രാർ കാര്യാലയത്തിൽ എത്തിയത്​ എങ്ങനെ, ഇതിനു​ പിന്നിൽ പ്രവർത്തിച്ച ഉദ്യോഗസ്ഥർ ആരെല്ലാം, ഉത്തരവാദികളാര്​, പോസ്റ്റൽ ബാലറ്റടങ്ങിയ പാക്കറ്റിന് കേടുപാടുകളുണ്ടായിട്ടുണ്ടോ തുടങ്ങിയ കാര്യങ്ങളാണ്​ അന്വേഷിക്കേണ്ടത്​​. നാലാഴ്ചക്കകം ഇതിന്‍റെ റിപ്പോർട്ട് നൽകണം. ഫെബ്രുവരി 23ന് ഉച്ചക്ക്​ രണ്ടിന്​ ബാലറ്റ്​ പെട്ടിയടക്കം തുറന്ന്​ പരിശോധിക്കാനാണ്​ കക്ഷികൾക്ക്​ അനുമതി നൽകിയിരിക്കുന്നത്​.

348 പോസ്റ്റൽ വോട്ടുകൾ കാരണമില്ലാതെ എണ്ണാതിരുന്നെന്നും ഇതിൽ 300 വോട്ടെങ്കിലും തനിക്ക് കിട്ടുന്നതായിരുന്നുവെന്നും 38 വോട്ടിന്‍റെ ഭൂരിപക്ഷത്തിൽ വിജയിച്ച നജീബ്​ കാന്തപുര​ത്തിന്‍റെ തെരഞ്ഞെടുപ്പ്​ റദ്ദാക്കണമെന്നും ആവശ്യപ്പെട്ട്​ ഇടത്​ സ്വതന്ത്രനായിരുന്ന കെ.പി.എം. മുസ്തഫ നൽകിയ ഹരജിയാണ്​ കോടതിയുടെ പരിഗണനയിലുള്ളത്​. പോസ്റ്റൽ ബാലറ്റുകൾ ഉൾപ്പെടെയുള്ള തെരഞ്ഞെടുപ്പ് രേഖകൾ ഹാജരാക്കാൻ ഈ ഹരജിയിൽ നേരത്തേ സിംഗിൾബെഞ്ച് നിർദേശിച്ചിരുന്നു. എന്നാൽ, ഇവയിൽ സാധുവായ 482 പോസ്റ്റൽ വോട്ടുകൾ കാണാതായെന്ന് പെരിന്തൽമണ്ണ സബ് കലക്ടർ റിപ്പോർട്ട്​ നൽകി. അവശേഷിച്ചവ ഹൈകോടതിയിൽ സമർപ്പിക്കുകയും ചെയ്തു. തുടർന്നാണ്​ നജീബ്​ ഉപഹരജി നൽകിയത്​.

ഹൈകോടതിയിൽ സൂക്ഷിച്ചിരിക്കുന്ന ഇരുമ്പ് പെട്ടികൾ കഴിഞ്ഞ ദിവസം ജുഡീഷ്യൽ രജിസ്ട്രാറുടെ സാന്നിധ്യത്തിൽ കേസിലെ കക്ഷികളും തെരഞ്ഞെടുപ്പ് കമീഷന്റെ അഭിഭാഷകനും പരിശോധിച്ചിരുന്നു. എന്നാൽ, പെട്ടികൾ തുറന്ന് കാണിച്ചിരുന്നില്ല. വ്യാഴാഴ്ച ഇക്കാര്യം കക്ഷികൾ ഉന്നയിച്ചതിനെ തുടർന്നാണ്​ കോടതി ഹാളിൽവെച്ച്​ പെട്ടി തുറന്ന്​ പരിശോധിക്കാൻ ​അനുമതി നൽകിയത്​.