ശിവഗിരി: ശിവഗിരി സന്ദർശിച്ച കോൺഗ്രസ് നേതാവ് രാഹുൽ ഗാന്ധിക്ക് ഊഷ്മള സ്വീകരണം നൽകിയെങ്കിലും കോൺഗ്രസ് എം.എല്‍.എമാരിൽ ശ്രീനാരായണീയര്‍ കുറവാണെന്ന അതൃപ്തി അറിയിച്ച് ശിവഗിരി ധർമസംഘം ട്രസ്റ്റ്. ശ്രീനാരായണീയരുടെ പ്രാതിനിധ്യം കോണ്‍ഗ്രസില്‍ കുറവാണെന്ന് പ്രസിഡന്‍റ് സ്വാമി സച്ചിദാനന്ദ വ്യക്തമാക്കി.
28 ശതമാനം ശ്രീനാരായണീയര്‍ ഉണ്ടായിട്ടും സമുദായത്തിൽ നിന്ന് കോൺഗ്രസിന് ഒരു എം.എല്‍.എ മാത്രമാണുള്ളതെന്ന അതൃപ്തി രാഹുലിനെ അറിയിച്ചതായും അദ്ദേഹം വ്യക്തമാക്കി.
ക്ഷണിക്കപ്പെടാതെ തന്നെ രാഹുൽ എത്തിയതിൽ അതിയായ സന്തോഷമുണ്ടെന്ന് സ്വാമി സച്ചിദാനന്ദ പറഞ്ഞു. നേരത്തെ, പല ഘട്ടത്തിലും രാഹുലിനെ ക്ഷണിച്ചിട്ടുണ്ട്. തിരക്കുകള്‍ കാരണം എത്താന്‍ കഴിഞ്ഞില്ല. ശിവഗിരി മഠത്തില്‍ നരേന്ദ്ര മോദിയെന്നോ രാഹുല്‍ ഗാന്ധിയെന്നോ വ്യത്യാസമില്ല. എല്ലാവരെയും സ്വീകരിക്കുന്ന നിലപാടാണ്. രാഹുലുമായി രാഷ്ട്രീയം സംസാരിച്ചില്ലെന്നും അദ്ദേഹം കൂട്ടിച്ചേർത്തു.
രാഹുലിന്‍റെ ശിവഗിരി സന്ദർശനത്തിൽ രാഷ്ട്രീയമില്ലെന്ന് പ്രതിപക്ഷ നേതാവ് വി.ഡി. സതീശനും വ്യക്തമാക്കി.
കന്യാകുമാരി മുതൽ കശ്മീർ വരെയുള്ള ഭാരത് ജോഡോ യാത്രയുടെ കൊല്ലം ജില്ലയിലെ പര്യടനം തുടങ്ങും മുമ്പാണ് യാത്രയുടെ നായകനായ രാഹുൽ ഗാന്ധി ശിവഗിരി സന്ദർശിച്ചത്. രാവിലെ ആറരയോടെ ശിവഗിരിയിലെത്തിയ അദ്ദേഹം ശ്രീനാരായണഗുരു സമാധിയിലും ശാരദാമഠത്തിലും പ്രാർഥന നടത്തി.
തുടർന്ന് സ്വാമിമാരുമായി കൂടിക്കാഴ്ചയും നടത്തി. ഇതാദ്യമായി ശിവഗിരി സന്ദർശിച്ച രാഹുലിന് ഊഷ്മള സ്വീകരണം ഒരുക്കിയ സ്വാമിമാർ, ഗുരുവിന്‍റെ പുസ്തകങ്ങളും സമ്മാനിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.