അച്ഛനോടിയെത്തി, റിയ നേരെ ആശുപത്രിയിലേക്ക്​; ഒടുവിൽ എ ഗ്രേഡ്​

കൊല്ലം: കൂട്ടുകാരികളുടെ കൈപിടിച്ച്​ പടിയിറങ്ങി ഒരുവിധം താഴെയെത്തിയപ്പോഴേക്കും റിയ തെരേസ്​ ചുമച്ചുകുഴഞ്ഞിരുന്നു. വാതിലിൽ അക്ഷമനായി കാത്തുനിന്ന പിതാവ്​ സെബാസ്റ്റ്യൻ ജോണും അമ്മ നിഷ ജോണും മകളെ പുറത്തിറക്കിയപ്പോഴേക്കും അടുത്ത്​ കണ്ട പൈപ്പിൻ ചുവട്ടിലേക്ക്​ ചുമച്ചു തളർന്ന്​​ അവൾ കയറി. ​​

പൊന്നുമോളുടെ പിടപ്പ്​ കണ്ട പിതാവിന്‍റെ നെഞ്ച്​ നൊന്തതോടെ അതുവരെ കെട്ടിവെച്ച രോഷം മുഴുവൻ അധ്യാപകൻ കൂടിയായ സെബാസ്റ്റ്യൻ അവിടെ നിന്ന സംഘാടകരോട്​ ഇറക്കിവെച്ചു. ചുമ കാരണം പ്രയാസപ്പെട്ടിരുന്ന മകൾ കളിച്ചിറങ്ങുമ്പോൾ അസ്വസ്ഥത ഉണ്ടാകുമെന്ന്​ അറിയാവുന്നതിനാൽ തിരികെകൂട്ടാൻ മുകൾനിലയിലെ സ്​റ്റേജിന്​ പിറകിലേക്ക്​ കയറാൻ ഓടിയെത്തിയിട്ടും തടയപ്പെട്ട പിതാവിന്‍റെ പ്രതികരണം രൂക്ഷമാകാതിരിക്കുന്നതെങ്ങനെ.

സി.എസ്​.ഐ കൺവെൻഷൻ സെന്‍ററിലെ മൂന്നാം വേദിയിൽ എച്ച്​.എസ്​.എസ്​ മാർഗംകളി ആദ്യം കളിച്ചിറങ്ങിയ കോഴിക്കോട്​ സെന്‍റ്​ ജോസഫ്​സ്​ ആംഗ്ലോ ഇന്ത്യൻ ഗേൾസ്​ എച്ച്​.എസ്​.എസ്​ വിദ്യാർഥിനി റിയ തെരേസ്​ ആണ്​ ശ്വാസം കിട്ടാതെ ബുദ്ധിമുട്ടിയത്​. തന്നെ തടയാൻ വലിയ വാദം പറഞ്ഞ സംഘാടകരുടെ മുഖത്ത്​ നോക്കി ഫസ്റ്റ്​ എയ്​ഡ്​ എവിടെയെന്ന​ സെബാസ്റ്റ്യന്‍റെ ചോദ്യത്തിന്​ ഉത്തരമുണ്ടായില്ല. മറ്റ്​ കുട്ടികളുടെ രക്ഷിതാക്കളും സ്​കൂൾ അധികൃതരും കാഴ്ചക്കാരും സംഘാടകരു​ടെ കടുംപിടുത്തത്തിനെതിരെ കാര്യമായി പ്രതികരിച്ചു. വേദിക്ക്​ മുന്നിൽ തന്നെ ആംബുലൻസ്​ ഉണ്ടായിട്ടും ഡ്രൈവർ ഉണ്ടായിരുന്നില്ല. പുറത്തെ മെഡിക്കൽ കേന്ദ്രത്തിലെ നഴ്​സ്​ എത്തിയപ്പോഴേക്കും സ്വന്തം കാർ എത്തിച്ച്​ മാതാപിതാക്കൾ​ കുട്ടിയെ അടുത്തുള്ള ഉപാസന ആശുപത്രിയിലേക്ക്​ മാറ്റി. കുട്ടികൾ കളിച്ച്​ ഇറങ്ങിവരുന്ന ഭാഗത്തേക്ക്​ ആംബുലൻസ്​ മാറ്റിയിടാനുള്ള ബോധം ഇതോടെ സംഘാടകർക്ക്​ കിട്ടി. 

പിന്നീട്​ കുഴഞ്ഞുവീണവർക്കൊക്കെ ഇത്​ ആശ്വാസമായി. കുട്ടികളുടെ അവസ്ഥ മോശമാകുന്നത്​ സാധാരണമെങ്കിലും സംഘാടകരുടെ പെരുമാറ്റം മുറിപ്പെടുത്തി എന്ന പരിഭവമാണ്​ കോഴിക്കോടൻ സംഘത്തിനുണ്ടായത്​. റിയയുടെ അവസ്ഥകണ്ട്​ കരഞ്ഞ കൂട്ടുകാരികൾക്ക്​ അവൾ ആശുപത്രിയിൽ ഡ്രിപ്പിട്ട്സുഖമായി കിടക്കുന്നു എന്നറി​ഞ്ഞപ്പോഴാണ്​ ആശ്വാസമായത്​. പിന്നാലെ വൈകിട്ട്​ ഫലപ്രഖ്യാപനത്തിൽ ‘എ ഗ്രേഡ്​’ റിയക്കൊപ്പം ഒത്തൊരുമിച്ചിരുന്ന്​ കേട്ടതോടെ സന്തോഷം ഇരട്ടിയായി.