ഭാരതപ്പുഴയിൽ കക്ക വാരാനിറങ്ങിയ സംഘത്തിന്‍റെ തോണി അപകടത്തിൽപ്പെട്ടെന്നറിഞ്ഞെത്തിയ പൊലീസും റെസ്ക്യൂ സംഘവും നാട്ടുകാരും
തിരൂർ: പുറത്തൂർ ഭാരതപ്പുഴയിൽ കക്ക വാരാനിറങ്ങിയ സംഘത്തിന്‍റെ തോണി മറിഞ്ഞ് ബന്ധുക്കളായ രണ്ട് സ്ത്രീകൾ മരണപ്പെട്ടു. പുതുപ്പള്ളി നമ്പ്രം സ്വദേശിനികളായ ഈന്തു കാട്ടിൽ ഹംസയുടെ ഭാര്യ റുഖിയ (65), പരേതനായ വിളക്കത്ര വളപ്പിൽ മുഹമ്മദിന്‍റെ ഭാര്യ സൈനബ (54) എന്നിവരാണ് അപകടത്തിൽ മരണപ്പെട്ടത്. പുറത്തൂർ പുതുപ്പള്ളി നമ്പ്രം കടവിൽ കക്ക വാരാനിറങ്ങിയ ആറംഗ സംഘമാണ് അപകടത്തിൽപെട്ടത്.
ശനിയാഴ്ച വൈകീട്ട് 6.30 ഓടെയാണ് അപകടം. അപകടത്തിൽ രണ്ട് പേരെ കാണാതായി. കുയ്യിനി പറമ്പിൽ അബൂബക്കർ (55), ഇട്ടിക പറമ്പിൽ സലാം (54) എന്നിവരെയാണ് കാണാതായത്. കാണാതായവർക്കായി നാട്ടുകാരും അഗ്നിരക്ഷാസേനയും പൊലീസ്, റവന്യൂ സംഘങ്ങളും ചേർന്ന് രാത്രി വൈകിയും തിരച്ചിൽ തുടരുകയാണ്.
അപകടത്തിൽ പെട്ട രണ്ട് പേരെ നാട്ടുകാർ രക്ഷപ്പെടുത്തി ആലത്തിയൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇവർ തീവ്രപരിചരണ വിഭാഗത്തിൽ ചികിത്സയിലാണ്. ഉറുങ്ങാട്ടിൽ ബീപാത്തു (60), മകൾ റസിയ (42) എന്നിവരാണ് തീവ്രപരിചരണ വിഭാഗത്തിൽ ചികിത്സയിലുള്ളത്.
സലീം, നസീമ, അഷ്റഫ് എന്നിവരാണ് റുഖിയയുടെ മക്കൾ. മരുമക്കൾ: ജമീല, റാഫി, ജമീല. ബാബു, ജാഫർ എന്നിവരാണ് സൈനബയുടെ മക്കൾ. മൃതദേഹങ്ങൾ തിരൂർ ജില്ല ആശുപത്രിയിലെ മോർച്ചറിയിലേക്ക് മാറ്റി. പോസ്റ്റ്മോർട്ടത്തിന് ശേഷം ബന്ധുക്കൾക്ക് കൈമാറും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.