വയനാട് ഉരുള്‍പൊട്ടല്‍ ദുരന്തബാധിത പ്രദേശത്തെ കുട്ടികള്‍ക്കായി എം.ഇ.എസ് യൂത്ത് വിങ് സംസ്ഥാന കമ്മിറ്റി, ഫ്യൂച്ചറേസ് ഹോസ്പിറ്റല്‍, പി.ആര്‍.സി.ഐ കൊച്ചി ചാപ്റ്റര്‍ എന്നിവയുമായി സഹകരിച്ച് കൊച്ചി ഐ.എം.എ ഹാളില്‍ സംഘടിപ്പിച്ച ഓണാഘോഷ പരിപാടിയില്‍ കേരള ബ്ലാസ്റ്റേഴ്സ് ചീഫ് ഓപറേറ്റിങ് ഓഫിസര്‍ സുഷേന്‍ വസിഷ്ഠ് കുട്ടികളുമായി സംവദിക്കുന്നു
കൊച്ചി: ആട്ടവും പാട്ടും ഓണസദ്യയും ഐ.എസ്.എല്‍ ഫുട്‌ബാള്‍ മത്സരവും ആസ്വദിച്ച് ഉരുള്‍പൊട്ടല്‍ ദുരന്തബാധിതരായ വയനാട് മുണ്ടക്കൈ, ചൂരല്‍മല പ്രദേശത്തെ വിദ്യാര്‍ഥികള്‍. കേരളത്തെ കണ്ണീര്‍ക്കയത്തിലാക്കിയ ഉരുള്‍പൊട്ടലില്‍ സര്‍വതും നഷ്ടപ്പെട്ട കുട്ടികള്‍ക്കും കുടുംബങ്ങള്‍ക്കുമായി ‘ഒരുമിച്ചോണം; കൂടെയുണ്ട് എം.ഇ.എസ്’ എന്നപേരില്‍ മുസ്‌ലിം എജുക്കേഷന്‍ സൊസൈറ്റി (എം.ഇ.എസ്) നേതൃത്വത്തിലാണ് എറണാകുളത്ത് ഓണാഘോഷം സംഘടിപ്പിച്ചത്. ഉത്രാട ദിനത്തില്‍ പുലര്‍ച്ച 5.30ഓടെയാണ് 33 കുട്ടികളും കുടുംബാംഗങ്ങളും വയനാട്ടില്‍നിന്ന് യാത്ര തിരിച്ചത്.
കോഴിക്കോട്ടെത്തിയ കുട്ടികള്‍ക്ക് എം.ഇ.എസ് ആസ്ഥാനത്ത് സംസ്ഥാന പ്രസിഡന്റ് ഡോ. ഫസൽ ഗഫൂറിന്റെ നേതൃത്വത്തില്‍ ഓണക്കോടിയും കൈനീട്ടവും നല്‍കി. തുടര്‍ന്ന് എം.ഇ.എസ് യൂത്ത് വിങ്ങിന്റെ നേതൃത്വത്തില്‍ കുട്ടികളുമായി മിഠായിത്തെരുവും സന്ദര്‍ശിച്ച ശേഷമാണ് കൊച്ചിയിലേക്ക് തിരിച്ചത്. ആലുവ മെട്രോ സ്റ്റേഷനിലെത്തിയ കുട്ടികളെ സ്വീകരിച്ച് കലൂര്‍ സ്റ്റേഡിയത്തില്‍ എത്തിച്ചു. ഇവിടെ വൈകുന്നേരത്തെ മത്സരത്തിനായി താരങ്ങളെ സ്റ്റേഡിയത്തിലേക്ക് കൈപിടിച്ച് ആനയിക്കുന്നതിന്റെ ആദ്യഘട്ട റിഹേഴ്‌സല്‍ നടത്തി. തുടര്‍ന്ന് കുട്ടികളെ ഐ.എം.എ ഹൗസില്‍ എത്തിച്ചു. കേരള ബ്ലാസ്റ്റേഴ്സ് ടീം ഓഫീഷ്യല്‍സ് ഉള്‍പ്പെടെയുള്ളവരുമൊത്ത് ഇവിടെയായിരുന്നു ഇവര്‍ക്കായി ഓണാഘോഷവും കലാപരിപാടികളും ഓണസദ്യയുമെല്ലാം ഒരുക്കിയിരുന്നത്. എം.ഇ.എസ് സംസ്ഥാന സെക്രട്ടറി കെ. കെ. കുഞ്ഞുമൊയ്തീന്‍ ഓണാഘോഷം ഉദ്ഘാടനംചെയ്തു.
യൂത്ത് വിങ് സംസ്ഥാന പ്രസിഡന്റ് ആര്‍.കെ. ഷാഫി അധ്യക്ഷത വഹിച്ചു. സംസ്ഥാന വൈസ് പ്രസിഡന്റ് ടി.എം. സക്കീര്‍ ഹുസൈന്‍ മുഖ്യപ്രഭാഷണം നടത്തി. കേരള ബ്ലാസ്റ്റേഴ്സ് ചീഫ് ഓപറേറ്റിങ് ഓഫിസര്‍ സുഷേന്‍ വസിഷ്ഠ്, കേരള ബ്ലാസ്റ്റേഴ്സ് ചീഫ് റവന്യൂ ഓഫിസറും പിച്ച് മാനേജറുമായ ജോബി ജോസഫ്, ചീഫ് മാര്‍ക്കറ്റിങ് ഓഫിസര്‍ ആന്റണി മനു എന്നിവര്‍ മുഖ്യാതിഥികളായിരുന്നു. നടനും സംവിധായകനുമായ ശ്രീകാന്ത് മുരളി, പിന്നണിഗായിക സംഗീത ശ്രീകാന്ത് എന്നിവരുടെ നേതൃത്വത്തില്‍ കുട്ടികള്‍ക്കായി കലാപരിപാടികള്‍ നടത്തി. എം.ഇ.എസ് നേതാക്കളായ എം.എം. അഷ്‌റഫ്, ലിയാഖത്ത് അലിഖാന്‍, ഇ.എം. നിസാര്‍, എച്ച്.എസ്. അബ്ദുൽഷെരീഫ്, എം.ഐ. അബ്ദുൽഷെരീഫ്, ഷിബു അലിയാര്‍, എം. അഫ്‌സല്‍, ഡോ. മുഹമ്മദ് റിയാസ്, ടി.പി. അമീര്‍, അഡ്വ. മുഹമ്മദ് ഷഫീക്, ഷാഫി പുല്‍പ്പാറ, ഡോ. അന്‍വര്‍ ഹസൈന്‍, അമീര്‍ അലി, സംസ്ഥാന ട്രഷറര്‍ ശഹീം ശാഹുല്‍ എന്നിവര്‍ സംസാരിച്ചു. എം.ഇ.എസ് യൂത്ത് വിങ് സംസ്ഥാന ജനറല്‍ സെക്രട്ടറി ബി.എച്ച്. മുഹമ്മദ് നിസാര്‍ സ്വാഗതം പറഞ്ഞു. ഫ്യൂച്ചറേസ് ഹോസ്പിറ്റല്‍, പബ്ലിക് റിലേഷന്‍സ് കൗണ്‍സില്‍ ഓഫ് ഇന്ത്യ (പി.ആര്‍.സി.ഐ) കൊച്ചിന്‍ ചാപ്റ്റര്‍, കേരള ബ്ലാസ്റ്റേഴ്സ്, ലുലു എന്നിവരുടെ പിന്തുണയോടെയാണ് അതിജീവനത്തിന്റെയും കരുതലിന്റെയും പുതിയ പാഠം പകര്‍ന്നുനല്‍കി പരിപാടി നടന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.