റുബീനയുടെ ശിൽപങ്ങൾ പറയും, ഒരു അനുഗ്രഹീത വീട്ടമ്മയുടെ കഥ

നമ്മുടെ ഉള്ളിന്‍റെയുള്ളിൽ നാമറിയാതെ ചില കഴിവുകൾ ഒളിച്ചിരിക്കുന്നുണ്ടാകും. ചില സാഹചര്യങ്ങളിൽ ചെറിയ പരിശ്രമങ്ങൾ അത്തരം കഴിവുകൾ പുറത്തെത്തിക്കും. ഗൃഹനാഥമാരായി കഴിയുന്ന പലർക്കും അത്തരം അനുഭവങ്ങളുണ്ട്​. അത്തരത്തിൽ നിനച്ചിരിക്കാത്ത നേരത്ത്​ സ്വയം തിരിച്ചറിഞ്ഞ ഒരുനുഭവമാണ്​ 26വർഷമായി ദുബൈയിൽ കുടുംബത്തോടൊപ്പം കഴിയുന്ന തലശ്ശേരി സ്വദേശിനി റുബീനക്കുള്ളത്​. കുട്ടിക്കാലത്ത്​ ഫോട്ടോകൾ വെട്ടിയൊട്ടിച്ച്​ ചിത്രങ്ങൾ തീർത്തത്​ മാത്രമാണ്​ ഓർത്തെടുക്കാവുന്ന കാലാവിഷ്​കാരം. ചിത്രങ്ങൾ വരക്കുകയോ ശിൽപങ്ങൾ മെനയുകയോ ചെയ്ത്​ പരിചയമില്ല. അത്തരമൊന്ന്​ ആലോചിച്ചിട്ടുപോലുമില്ല.

എന്നാൽ 2018ൽ 'ഹോംമേകേഴ്​സ്​ ബ്ലിസ്​' എന്ന വാട്​സ്​ആപ്പ്​ ഗ്രൂപ്പിൽ ചേർന്നത്​ റുബീനക്ക്​ വഴിത്തിരിവായി​. വീട്ടമ്മമാരുടെ കരവിരുതിൽ രൂപപ്പെടുന്ന മനോഹരമായ സൃഷ്ടികൾ പരിചയപ്പെടുന്നത്​ അവിടെ വെച്ചാണ്​. പാഴ്വസ്തുക്കളിൽ നിന്ന്​ മനോഹരമായ ശിൽപ മാതൃകകൾ തീർക്കാനാകുമെന്ന തിരിച്ചറിവ്​ പരീക്ഷണത്തിന്​ മുതിരാൻ ​പ്രേരിപ്പിച്ചു. പാഴ്വസ്തുവായി കളയാൻ വെച്ച ജ്യൂസ്​ ബോട്ടിലിൽ നിന്നാണ്​ തുടക്കം. ഇതിൽ ചോക്ലേറ്റ്​ ബോക്സ്​ ഘടിപ്പിച്ചാണ്​ ആദ്യ കരവിരുത്​ ശിൽപം രൂപപ്പെടുത്തിയത്​.

പിന്നീട്​ പാഴ്വസ്തുക്കളായി ലഭിക്കുന്ന എന്തിലും ഒരു മനോഹര ശിൽപ മാതൃക കണ്ടെത്തിത്തുടങ്ങി. മുട്ടത്തോട്​, ഉള്ളിത്തോട്​, ചെടികളുടെ ചില്ല, ചട്ടി, മഗ്ഗ്​, ജഗ്ഗ്​, നുറുക്കരി, വാൾനട്ട്​, തേങ്ങയുടെ ഭാഗങ്ങൾ, ലിച്ചി ഫ്രൂട്ട്​ തൊലി, തോർത്ത്​, ടർക്കി... അങ്ങനെ തുടങ്ങി ഇറച്ചി കഴിച്ചാൽ ബാക്കിയാകുന്ന എല്ലടക്കം എല്ലാ പാഴ്വസ്തുക്കളും ഉപയോഗപ്പെടുത്തി ശിൽപങ്ങൾ തീർത്തു. സ്​പ്രേ പെയിൻറും ഹോട്​ ഗ്ലൂവും അക്രിലിക്​ പെയിന്‍റും ഉപയോഗിച്ച്​ ഇവയെല്ലാം മനോഹരമായ ശിൽപങ്ങളായി പരിവർത്തിപ്പിക്കും. സൃഷ്ടികൾ കണ്ട പലരും മനോഹരമെന്ന്​ വിധിയെഴുതുകയും വാങ്ങിക്കൊണ്ടുപോവുകയും ചെയ്തതോടെ പ്രചോദനമായി. കുടുംബത്തിലും സൗഹൃദത്തിലുമുള്ള ധാരാളം പേർക്ക്​ സമ്മാനമായി ഇത്തരം ശിൽപങ്ങൾ റീബീന നൽകിക്കഴിഞ്ഞു.

ദുബൈയിലും നാട്ടിലുമായി തന്‍റെ കരവിരുതിൽ വിരിഞ്ഞ ശിൽപങ്ങളുടെ മൂന്ന്​ എക്സിബിഷനുകൾ ഈ ഗൃഹനാഥ നടത്തിയിട്ടുണ്ട്​. പ്രദർശനങ്ങൾ ഏറെ പേർ സന്ദർശിക്കുകയും കഴിവിനെ പലരും അഭിനന്ദിക്കുകയുമുണ്ടായി. നിലവിൽ കുട്ടികൾക്കും മുതിർന്നവർക്കും ഓൺലൈനിലൂടെയും അല്ലാതെയും തനിക്ക്​ ലഭിച്ച കലാവിരുതിന്‍റെ പാഠങ്ങൾ പകർന്നു നൽകുന്നുമുണ്ട്​ ഇവർ. 'സമ്മർ ബഡ്​സ്​' പോലുള്ള കുട്ടികളുടെ ക്യാമ്പുകളിലും പരിശീലനത്തിന്​ ഇവർ ക്ഷണിതാവായി. തലശ്ശേരി സ്വദേശിയും ദുബൈയിൽ പ്രവാസിയുമായ ഭർത്താവ്​ ശബീറും മൂന്ന്​ മക്കളുമടങ്ങുന്ന കുടുംബം എല്ലാ പിന്തുണയും റുബീനക്ക്​ നൽകുന്നു​.