കൊച്ചി: ആർദ്രമധുരമായ ഗസൽ സംഗീതത്തിെൻറ മലയാളി മുഖം ഉമ്പായി (പി.എ. ഇബ്രാഹീം-68) അന്തരിച്ചു. അർബുദ ബാധയെത്തുടർന്ന് ഏറെനാളായി ചികിത്സയിലായിരുന്നു. ആലുവയിലെ സ്വകാര്യ ആശുപത്രിയിൽ ബുധനാഴ്ച വൈകീട്ട് 4.40നാണ് അന്ത്യം. വ്യാഴാഴ്ച രാവിലെ എട്ടുമുതൽ കൽവത്തി കമ്യൂണിറ്റിഹാളിൽ മൃതദേഹം പൊതുദർശനത്തിന് വെക്കും. ഖബറടക്കം ഉച്ചക്ക് 12ന്കൽവത്തി ജുമാമസ്ജിദ് ഖബർസ്ഥാനിൽ.
മട്ടാഞ്ചേരി പടിഞ്ഞാറെ വീട്ടിൽ അബുവിെൻറയും ഫാത്തിമയുടെയും മകനായി 1950 ജൂൺ 10നാണ് ഉമ്പായി ജനിച്ചത്. ഫോർട്ട്കൊച്ചി കൂവപ്പാടം ശാന്തിനഗറിലായിരുന്നു താമസം. ഭാര്യ: ഹഫ്സത്ത്. മക്കൾ: ഷൈല, സബിത, സമീർ. മരുമക്കൾ: നൗഷാദ്, നൗഫൽ. ഏക സഹോദരി: സുഹ്റ.
മട്ടാഞ്ചേരിയിലെ ഹാജി ഇൗസ ഹാജി മൂസ മെമ്മോറിയൽ ഹൈസ്കൂളിലായിരുന്നു പ്രാഥമിക വിദ്യാഭ്യാസം. കുട്ടിക്കാലത്തു തന്നെ സംഗീതത്തിൽ താൽപര്യമുണ്ടായിരുന്ന ഉമ്പായി പിന്നീട് തബലയും ഹാർമോണിയവും പഠിച്ചു. മുംബൈയിൽ ഏഴുവർഷത്തോളം ഉസ്താദ് മുജാവർ അലിഖാെൻറ കീഴിൽ ഹിന്ദുസ്ഥാനി സംഗീതവും അഭ്യസിച്ചു.
തീക്ഷ്ണമായ ജീവിതാനുഭവങ്ങൾ താണ്ടിയ ഉമ്പായി, ഗസലിെൻറ വിഷാദ സൗന്ദര്യവും വശ്യതയും മലയാളിക്ക് പകർന്നുനൽകിയ ജനകീയ ഗായകൻ കൂടിയാണ്. പഴയ മലയാള സിനിമഗാനങ്ങളുടെ ഗസൽസ്പർശമുള്ള പുനരാവിഷ്കാരത്തിലൂടെയും സ്വന്തമായി പുറത്തിറക്കിയ ഗസൽ ആൽബങ്ങളിലൂടെയും കുറഞ്ഞകാലംകൊണ്ട് അദ്ദേഹം സംഗീതാസ്വാദകരുടെ മനസ്സിൽ ഇടംപിടിച്ചു. ഹോട്ടലുകളിലെ പാട്ടുകാരനായി ജോലി ചെയ്തും സംഗീതപരിപാടികളുമായും രാജ്യത്തിെൻറ വിവിധ ഭാഗങ്ങളിൽ സഞ്ചരിച്ചു. ഒരുകാലത്ത് പിന്നണിഗായകൻ മഹ്ബൂബിെൻറ ഗാനമേളകളിലെ സ്ഥിരംസാന്നിധ്യമായിരുന്നു. ജോൺ എബ്രഹാമിെൻറ ‘അമ്മ അറിയാൻ’ എന്ന ചിത്രത്തിനുവേണ്ടി ഗസൽ ആലപിച്ചിട്ടുണ്ട്.
ഹസ്രത് ജയ്പുരി രചിച്ച ഉര്‍ദു ഗസലുകൾ ഉൾപ്പെടുത്തി 1988ൽ ‘ആദാബ്’ എന്ന ആദ്യ ആൽബം പുറത്തിറക്കി. പിൽക്കാലത്ത് ഒ.എൻ.വി കുറുപ്പ്, സച്ചിദാനന്ദൻ, യൂസുഫലി കേച്ചേരി, വേണു വി. ദേശം എന്നിവരുടെ രചനകളുമായി ഉമ്പായി പുറത്തിറക്കിയ ആൽബങ്ങൾ ഗസൽ എന്ന സംഗീതശാഖക്ക് മലയാളത്തിൽ പുതിയൊരു വഴി തുറന്നുകൊടുത്തു. അകലെ മൗനം പോൽ, പാടുക സൈഗാൾ പാടുക, ഗസൽ മാല, പ്രണാമം, ഹൃദയരാഗം, ഇതുവരെ സഖി നിന്നെ കാത്തിരുന്നു, മധുരമീ ഗാനം, മഹ്ബൂബ്, നന്ദി പ്രിയസഖീ നന്ദി, ഒരിക്കൽ നീ പറഞ്ഞു, ഒരു മുഖം മാത്രം, ഭിർ വഹീ ശാ‌മ് എന്നിവയാണ് പ്രധാന ആൽബങ്ങൾ.
‘നോവൽ’ എന്ന സിനിമക്കുവേണ്ടി എം. ജയചന്ദ്രനുമായി ചേർന്ന് ഗാനങ്ങൾ ചിട്ടപ്പെടുത്തി. നാലരപ്പതിറ്റാണ്ട് പിന്നിട്ട സംഗീത ജീവിതത്തിനിടയിൽ കേരളത്തിനകത്തും പുറത്തും വിദേശരാജ്യങ്ങളിലുമായി നിരവധി പരിപാടികൾ അവതരിപ്പിച്ചു. മകൻ സമീർ ഗിത്താറിസ്റ്റാണ്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.