പഞ്ചാബിലെ സിഖുകാർ കർഷക പ്രക്ഷോഭത്തെ മുന്നിൽനിന്ന്​ നയിക്കുന്നത്​ എന്തുകൊണ്ട്​​?

നരേന്ദ്ര മോദി സർക്കാർ കൊണ്ടുവന്ന പുതിയ കാർഷിക നിയമങ്ങൾക്കെതിരെ കർഷകർ തുടരുന്ന പ്രതി​ഷേധം താങ്ങുവില ഉറപ്പാക്കാനോ മൂന്നു നിയമങ്ങളും പിൻവലിക്കാനോ മാത്രം ലക്ഷ്യമിട്ടു​ള്ള പോരാട്ടമല്ല. കർഷക​െൻറ തൊഴിൽ ശേഷി അർഹമായ വേതനം നൽകാതെ കവർന്നെടുക്കാൻ രാജ്യത്തെ അതിസമ്പന്നരായ കുത്തകകൾ നടത്തുന്ന ശ്രമം അവസാനിപ്പിക്കാൻ കൂടിയുള്ള സമരമാണ്​- ഈ പോരാട്ടത്തെ മുന്നിൽനിന്ന്​ നയിക്കുന്നത്​ പഞ്ചാബിലെ കർഷക സമൂഹമായതിന്​ കാരണങ്ങൾ പലതുണ്ട്​.

ചർച്ചകൾ പോലുമില്ലാതെയും കർഷക സംഘടനകളെ വിശ്വാസത്തിലെടുക്കാതെയും മൂന്ന്​ വിവാദ ബില്ലുകൾ തിടുക്കപ്പെട്ട്​ പാർലമെൻറ്​ പാസാക്കു​േമ്പാൾ അപകടം ആദ്യം മണത്തത്​ പഞ്ചാബിലെ സിഖ്​ കർഷകരായിരുന്നു. 1980കളിലായിരുന്നു അവസാനമായി പഞ്ചാബിലെ സിഖുകാർ സമാനമായി സർക്കാറിനെതിരെ പോർമുഖത്തിറങ്ങിയത്​. പുതുതായി ശക്​തിയാർജിക്കുന്ന തീവ്രവാദത്തെ മുളയിലേ നുള്ളാൻ ഇന്ദിര ഗാന്ധി സർക്കാർ സംസ്​ഥാന​േ​ത്തക്ക്​ പട്ടാളത്തെ അയച്ചപ്പോഴായിരുന്നു അത്​. വളർന്നുതുടങ്ങിയ ഖലിസ്​ഥാൻ പ്രസ്​ഥാനത്തിന്​ അന്ന്​ വ്യാപക പിന്തുണ ലഭിക്കാതെ പോയെങ്കിൽ, ഇന്ന് പക്ഷേ സിഖ്​ കർഷകർ മുന്നോട്ടുവെക്കുന്നത്​ ന്യായമായ ലക്ഷ്യമാണ്​- എന്നു മാത്രമല്ല, രാജ്യത്തെ കർഷക സമൂഹത്തെ പിന്നിൽ അണിനിരത്തുന്നതിലും രാജ്യത്തി​െൻറ മൊത്തം പിന്തുണ ആർജിക്കുന്നതിലും അവർ വിജയം വരിക്കുകയും ചെയ്​തിരിക്കുന്നു. ദേശീയ ചരി​​ത്രത്തിൽ കർഷക പ്രസ്​ഥാനത്തി​െൻറ മുന്നണിപ്പോരാളികളായി അവർ അടയാളപ്പെടുക തന്നെ ചെയ്യും.

ഒപ്പത്തിനൊപ്പം

രാഷ്​ട്രീയ സ്വയംസേവക്​സംഘും (ആർ.എസ്​.എസ്​) ഭാരതീയ ജനത പാർട്ടി (ബി.ജെ.പി) സർക്കാറും- കങ്കണ റണാവത്തിനെ പോലെ ചില കാമ്പയിൻ മാനേജർമാരുടെ സഹായത്തോടെ- പഞ്ചാബിലെ സിഖ്​ കർഷകരെ 'ഖലിസ്​ഥാൻ ഭീകരരാ'യി മുദ്ര കുത്താൻ ശ്രമം നടത്തുകയാണ്​. അതുപക്ഷേ, അനായാസം നടക്കുമെന്ന്​ തോന്നുന്നില്ല. സിഖ്​ കർഷക യുവത്വം കൂടുതൽ വിദ്യാ സമ്പന്നരാണെന്ന്​ മാത്രമല്ല കാരണം, ലോകം മുഴുക്കെ പടർന്നുനിൽക്കുന്നവരും ഹിന്ദുത്വ സേന​ക്ക്​ ചുട്ട മറുപടി നൽകാൻ ശേഷിയുള്ളവരുമാണ്​. 370ാം വകുപ്പ്​ റദ്ദാക്കിയ ഉടൻ കശ്​മീരികൾക്കെതിരെ പരീക്ഷിച്ച പോലെ ഈ കൂലിപ്പട്ടാളത്തെ ഇവർക്കു പിന്നാലെയും മേയാൻ വിട്ടാൽ രാജ്യം തന്നെ അപകടത്തിലാകും. രാജ്യത്ത്​ ​മറ്റേതൊരു കാർഷിക സമൂഹത്തിനും സാധ്യമാകാത്തത്ര കരുത്തോടെ പോരു ജയിക്കാൻ സിഖ്​ കർഷകർക്കാകും.

രാഷ്​ട്രീയ ചതുരുപായങ്ങളെ കുറിച്ച്​ അവർക്ക്​ കൃത്യമായ ബോധ്യമുണ്ട്​. ന്യൂഡൽഹിയിലെ ഒരു ഗുരുദ്വാരയിൽ കുതിച്ചെത്തി ഗുരു ഗ്രന്ഥ്​ സാഹിബിനു മുമ്പാകെ മോദി മുട്ടുകുത്തി നിന്നത്​ എന്തിനായിരുന്നുവെന്ന്​ അവരുടെ​ ലളിത യുക്​തി കൃത്യമായി വായിച്ചെടുത്തു. അതുകൊണ്ടുതന്നെ, അവർ അനങ്ങിയതേയില്ല. ഈ ബോധ്യത്തിനും വിശ്വാസത്തിനും മുന്നിൽ ഹിന്ദുത്വ ആക്രമണത്തിന്​ ചുവടുപിഴച്ചു. മാത്രവുമല്ല, രാജ്യം മുഴുക്കെ കർഷകർ പിന്നാലെ അണിനിരക്കുകയും ചെയ്​തു. 'ഖലിസ്​ഥാനി ഭീകരർ' പോലുള്ള പദാവലികൾ നിരന്തരമായി പ്രയോഗിച്ച കങ്കണയെ പോലുള്ളവരുടെ തന്ത്രങ്ങൾ അവർക്ക്​ നന്നായി അറിയാം.

ബോളിവുഡ്​ ഉൾപെടെ സിനിമ തട്ടകങ്ങളും കർഷകർക്ക്​ നീതിയും അതിജീവനവും ഉറപ്പാക്കാൻ രംഗത്തെത്തിയിട്ടുണ്ട്​. രാജ്യത്തി​െൻറ 'ഭക്ഷ്യവിഭവ സൈന്യ'മെന്നാണ്​ അവർ ഇവരെ വി​േശേഷിപ്പിച്ചത്​- അത്​ ശരിയുമാണ്​. 'കൃഷി ചെയ്യുന്ന പട്ടാളം' ഭക്ഷണം ഉൽപാദിപ്പിച്ചില്ലെങ്കിൽ അതിർത്തി കാക്കാൻ 'നിൽക്കുന്ന സേന' ഉണ്ടാകില്ല. ആർ.എസ്​.എസ്​- ബി.ജെ.പി സർക്കാർ പക്ഷേ, ഈ കർഷക സൈന്യത്തെ ദേശീയവാദികളായി തിരിച്ചറിയുന്നതിന്​ പകരം ഇപ്പോഴും വൻകിട വ്യവസായ കുലങ്ങളെ തെരഞ്ഞുപിടിച്ച്​ ദേശീയവാദികളായി എഴുന്നള്ളിക്കുന്ന തിരക്കിലാണ്​.

തൊഴിൽ മാന്യത

സിഖ്​ കർഷകർ അങ്കത്തട്ട്​ ഉണർത്താൻ മറ്റൊരു കാരണം, സിഖ്​ മതം അനുശാസിക്കുന്ന പോലെ തൊഴിലി​െൻറ മാന്യത ​പ്രതിരോധിക്കാൻ കൂടിയാണ്​. സിഖ്​ മതത്തിൽ ആപേക്ഷികമായെങ്കിലും ജാതി ഇല്ലാതാക്കുന്നതിലുമുണ്ട്​ തൊഴിലിന്​ പങ്ക്​.

സിഖ്​ കർഷകരിലേറെയും ജാട്ടുകളാണ്​. ചരിത്രപരമായി അവർ ശൂദ്ര വർണാശ്രമക്കാരും. ഐക്യ പഞ്ചാബിൽ ധ്വിജ വിഭാഗങ്ങളിൽനിന്ന്​ (ബ്രാഹ്​മണർ, ബനിയർ, ഖത്രികൾ) പീഡനങ്ങളേറെ ഏറ്റുവാങ്ങിയവർ. ഗുരു നാനക്​ ദേവ സിഖ്​ മതം സ്​ഥാപിക്കുകയും ത​െൻറയും ഇതര സിഖ്​ ഗുരുക്കന്മാരുടെയും പുണ്യഗീതങ്ങൾ ചേർത്ത്​ ഗുരു ഗ്രന്ഥ്​ സാഹിബ്​ എന്ന വേദഗ്രന്ഥം രചിക്കുകയും ചെയ്​തതോടെ ശരിക്കും മോചനമായത്​ വർണാശ്രമത്തിനും തൊഴിലി​െൻറ പേരിലെ അനീതികൾക്കുമാണ്​.

ശൂദ്ര തൊഴിലാളികളിൽ അത്​ ആത്​മാഭിമാനം പകർന്നു. ശ്രേണീബദ്ധമായ സമൂഹത്തിലെ താഴെത്തട്ടിൽ അപമാനിതരായി കഴിഞ്ഞവരെന്നതു മാറി സമത്വവും മാന്യതയുമുള്ളവരായി അവർ വളർന്നു. രാജ്യത്ത്​ ഇന്ന്​ ജാട്ട്​ സിഖുകാരോളം സ്വാഭിമാനം പുലർത്തുന്നവർ വേറെയുണ്ടാകണമെന്നില്ല. മസ്​ഹബി സിഖുകാർ എന്നുകൂടി വിളിക്കപ്പെ​ടുന്ന ഇൗ ദളിത്​ സിഖുകാർ പഞ്ചാബിൽ സാമൂഹിക വിവേചനത്തിന്​ തീരെ ഇരകളല്ലെന്ന്​ അർഥമൊന്നുമില്ല ഇതിന്​. അവരും അനുഭവിക്കുന്നുണ്ട്​.

പക്ഷേ, ഹിന്ദുത്വവാദികളോളം ജാതി വാദം രൂഢമായി പാലിക്കുന്ന​വരോ വർണാശ്രമ വാദികളോ അല്ല സിഖ്​ സമൂഹം. ലോകത്തുടനീളം സ്വന്തമായി 'രവിദാസി ഗുരുദ്വാരകൾ' സ്​ഥാപിച്ചവരാണ്​ ദളിത്​ സിഖുകാർ. ഇന്ത്യയിൽ ​മറ്റേത്​ ദളിത്​ വിഭാഗങ്ങളെക്കാളും വിദ്യ​ അഭ്യസിച്ചവർ. സിഖ്​മതത്തി​െൻറ ഭാഗമായിരിക്കെ തന്നെ സ്വന്തവും സ്വതന്ത്രവുമായി ആത്​മീയ, സാമൂഹിക സ്വത്വം പ്രകടിപ്പിക്കുന്നവർ. സിഖ്​മതത്തെ ഹിന്ദുമതത്തി​െൻറ ഭാഗമായി ചിത്രീകരിക്കാൻ ഹിന്ദുത്വവാദികൾ രംഗത്ത്​ സജീവമാണെങ്കിലും ഇനിയും വേണ്ടത്ര ഫലം കണ്ടിട്ടില്ല, കാരണം, തങ്ങളെ കൂടി സ്വന്തം ഭാഗമാക്കാനാണ്​ ശ്രമമെന്ന്​ അവർ തിരിച്ചറിയുന്നു. ഒരു സ്വതന്ത്ര മതമെന്ന്​ എന്നേ ലോകം അംഗീകരിച്ചതാണ്​ സിഖ്​ മതത്തെ.

മാത്രവുമല്ല, ഗുരു ഗ്രന്ഥ്​ സാഹിബിൽ അവഗാഹം ആർജിച്ച ആർക്കും ലിംഗഭേദമില്ലാതെ ഒരു ഗ്രന്ഥിയാകാം, ഹിന്ദുമതത്തിൽ പക്ഷേ, അതു സാധ്യമാകില്ല. ​േശ്ലാകം ചൊല്ലാനും വിവാഹ ചടങ്ങുകൾ നിർവഹിക്കാനും സ്​ത്രീകൾക്ക്​ ആര്യ സമാജം അനുമതി നൽകുന്നുണ്ടെങ്കിലും ഈ വിഭാഗങ്ങളിൽ പോലും തൊഴിൽ പങ്കാളിത്തത്തിന്​ സ്​ത്രീ അനുമതിയും മോചനവും നേടിയിട്ടില്ല. ഹിന്ദു-ഇസ്​ലാം മതങ്ങളിൽനിന്ന്​ ഭിന്നമായി, ലിംഗ ഭേദം മറന്ന്​ ആത്​മീയ- ഉൽപാദന മേഖലകളിൽ വനിതകൾക്ക്​ ലഭിച്ച പ്രാതിനിധ്യവും ക്ഷമതയുമാണ്​ പഞ്ചാബിനെ ഇന്ത്യയുടെ ഭക്ഷ്യ കലവറയാക്കിയത്​. കാർഷിക ഉൽപാദനത്തിൽ ആർ.എസ്​.എസ്​- ബി.ജെ.പി കക്ഷികൾ ഒരിക്കലും ജാതി മുക്​തവും ലിംഗ ഭേദമില്ലാത്തതുമായ പങ്കാളിത്തം ഉന്നയിച്ചിട്ടില്ല. പകരം, വർണ ധർമത്തി​െൻറ പരമ്പര നിലനിർത്താനാണ്​ അവരുടെ ഊന്നൽ.

കാർഷിക മേഖലയിൽ പണിയെടുക്കുന്ന ഓരോരുത്തനും അനുഭവിക്കുന്ന സാമൂഹിക അടിത്തറയിൽ നിന്നാണ്​​ പഞ്ചാബ്​ കാർഷിക ​േമേഖല ഈ വലിയ നേട്ടങ്ങളിലേക്ക്​ ചുവടുവെച്ചത്​. അങ്ങനെ ഇന്ത്യൻ ഫെഡറൽ വ്യവസ്​ഥയിൽ തന്നെ പഞ്ചാബ്​ വേറിട്ട ഒരു സാംസ്​കാരിക അസ്​തിത്വമായി തലയെടുപ്പോടെ നിൽക്കുന്നു. സംസ്​ഥാനം ധാരാളമായി ഉൽപാദിപ്പിക്കുന്നുണ്ട്​ ഗോതമ്പും പാലും. തൊഴിൽ എന്ന സേവനത്തിന്​ അഥവാ കർസേവക്കായി ഗുരുദ്വാരകളിൽനിന്ന്​ പോലും പങ്കുവെക്കുന്ന ദർശനം ആഗോള ശ്രദ്ധ നേടു​കയും ചെയ്​തു.

ഗുരുദ്വാരകൾ- വിശിഷ്യാ, അമൃതസർ സുവർണക്ഷേത്രം- സന്ദർശകർക്ക്​ നൽകുന്ന സൗജന്യഭക്ഷണമായ 'ലംഗാറു'കൾക്ക്​ പ്രശസ്​തമാണ്​. സമ്പന്ന സിഖ്​ കുടുംബാംഗങ്ങൾ പോലും ഇവിടെ സൗജന്യ സേവനവുമായി സജീവമായുണ്ടാകും. ജാതി സ്വത്വങ്ങൾ ആവേശിക്കാത്ത ഈ സൗജന്യ സേവന സംസ്​കാരം പക്ഷേ, ആർ.എസ്​.എസ്​- ബി.ജെ.പിക്ക്​ ഒരിക്കലുമില്ല. തങ്ങൾ ഹിന്ദു ദേശീയവാദികളെന്ന്​ നിരന്തരം കുരവയിട്ട്​ അവർ സജീവമാണെങ്കിലും. രാജ്യത്തെ ഭരണ വിഭാഗം തന്നെ തൊഴിൽ മാന്യതയെ പ്രോൽസാഹിപ്പിക്കുന്നില്ലെങ്കിൽ ഒരിക്കലും ഒരു രാജ്യവും വികസിക്കില്ല. സ്വഛ്​ ഭാരത്​, ആത്​മനിർഭർ ഭാരത്​ പോലുള്ള മുദ്രാവാക്യങ്ങൾ സർക്കാർ മുഴക്കിക്കൊണ്ടേയിരിക്കുന്നു​ണ്ടെങ്കിലും ആത്​മീയ-മത സംവിധാനത്തിൽ അടിസ്​ഥാനപരമായി തൊഴിലി​െൻറ മഹത്വം എല്ലാവരിലുമെത്തിക്കാൻ ഒന്നും ചെയ്യുന്നില്ല.

ജീവിക്കുന്ന വൈരുധ്യം

'സർബത്​ ഡ ഭല്ല' (ഏവരുടെയും പൊതുനന്മക്കായി പ്രവർത്തിക്കുക), കർ സേവ (പൊതുനന്മക്ക്​ ശാരീരിക ​അധ്വാനം) എന്നിവയിലാണ്​ സിഖ്​ മതം ഊന്നിനിൽക്കുന്നത്​. ഗുരു ഗ്രന്ഥ്​ ആത്​മീയ ദർശനത്തി​െൻറ ഭാഗമാണ്​ ഈ രണ്ട്​ ആശയധാരകളും. ഇതാക​ട്ടെ, ഹിന്ദുത്വ ശക്​തികൾ മുന്നോട്ടുവെക്കുന്ന വർണാശ്രമത്തിന്​ നേർവിപരീതവും. ബ്രാഹ്​മണ കോയ്​മയുള്ള ആത്​മീയ, സാമൂഹിക, രാഷ്​ട്രീയ ദർശനങ്ങൾക്ക്​ തൊഴിൽ മാന്യത ഒട്ടും പരിചിതമല്ലാത്ത ഘട്ടത്തിലാണ്​ സിഖ്​ ഗുരുക്കൾ തൊഴിൽ മാന്യതയുടെ സങ്കൽപം സ്​ഥാപിക്കുന്നത്​.

ഹിന്ദുത്വ ദർശനത്തിൽ ശൂദ്ര/ദളിത്​ കർഷകർ അവമതി നേരിടുന്നവരാണെന്ന്​ മാത്രമല്ല ഒട്ടും മാന്യത അർഹിക്കാത്ത മാനുഷിക വിഭാഗങ്ങളുമാണ്​. പഞ്ചാബിന്​ പുറത്തും ഇന്ത്യൻ ഭക്ഷണോൽപാദന സംവിധാനത്തി​െൻറ തൂണുകളാണ്​ അവർ എന്നിരിക്കെയാണിത്​. ജാതിയും വർണവും ഭരിക്കുന്ന ഈ മൗലിക വിശ്വാസത്തെ പൊളിച്ചെഴുതാനും ആത്​മീയ- സാമൂഹിക സംവിധാനത്തിൽ കാർഷിക വൃത്തി മാന്യതയുള്ളതായി പരിഗണിക്കപ്പെടാനും മോദി സർക്കാർ ഒരു നടപടിയും സ്വീകരിച്ചിട്ടില്ല. പകരം, നടപ്പാക്കിയത്​ കുത്തക മുതലാളിമാർക്ക്​ ഈ പാവം കർഷകരെ ഒന്നുകൂടി ആഴത്തിൽ ചൂഷണം ചെയ്യാൻ വാതായനങ്ങൾ തുറന്നിടുകയാണ്​. സാമൂഹിക- സാമ്പത്തിക പരിവർത്തന പ്രക്രിയയിൽ പങ്കാളികളാകുകയോ പൊതുജന നന്മക്കായി വല്ലതും ചെയ്യുകയോ ഈ കുത്തകകൾ ചെയ്യാതിരിക്കെയാണിത്​.

കാർഷികോൽപാദന വിജ്​ഞാനീയം ന​ട്ടെല്ലായി നിലനിർത്തിയ അതിശക്​തരായ ആഗോള സമൂഹമാണിന്ന്​ സിഖ്​ കർഷകർ. യു.എസ്​, കാനഡ, ആസ്​ട്രേലിയ തുടങ്ങി പല രാജ്യങ്ങളിൽ കുടിയേറിയവർ. അവിടങ്ങളിൽ വനഭൂമികൾ ഉഴുതുമറിച്ച്​ കൃഷിയുടെ തട്ടകങ്ങളാക്കിയെടുത്ത്​ ആദരം നേടിയവർ. കാനഡയിൽ അവർ കരുത്ത്​ തെളിയിച്ച രാഷ്​ട്രീയ ശക്​തിയാണ്​. അവരിൽനിന്ന്​ പഠിക്കാൻ ഇന്ത്യ താൽപര്യം കാണിക്കണം. സിഖ്​ സമുദായത്തെ ഭീകര മുദ്ര ചാർത്താൻ പാഞ്ഞുനടക്കുന്ന അണികളെ ആർ.എസ്​.എസ്​-ബി.ജെ.പി പിടിച്ചുകെട്ടണം. ഇതിൽ എത്ര പിഴക്കുന്നോ അത്രയും ലോകം അവരെ ശരിക്കും തിരിച്ചറിയും, ഇന്ത്യ മാത്രമല്ലെന്ന്​ ഉറപ്പ്​.

(theprint.in പ്രസിദ്ധീകരിച്ച ലേഖനത്തിന്‍റെ സ്വതന്ത്ര വിവർത്തനം)

മൊഴിമാറ്റം: കെ.പി. മൻസൂർ അലി