വളരുന്നു, തെളിവു​ നശിപ്പിക്കൽ വ്യവസായം

രാജ്യവ്യാപകമായി ഉയർന്ന ജനരോഷത്തിനുമുന്നിൽ ഉത്തർപ്രദേശിലെ യോഗി ആദ്യത്യനാഥ്​ സർക്കാർ അൽപമൊന്ന്​ അയഞ്ഞിരിക്കുന്നു. ഹാഥറസ്​ കേസിൽ സി.ബി.ഐ അന്വേഷണത്തിന്​ തയാറായത്​ തീർച്ചയായും സർക്കാറി​െൻറ സൗമനസ്യമല്ല. പീഡനത്തിനിരയായി കൊല്ലപ്പെട്ട പെൺകുട്ടിക്ക്​ നീതി ആവശ്യപ്പെട്ട്​ നാടെങ്ങും മുറവിളി ഉയർന്നു. രാഷ്​ട്രീയ നേതൃത്വങ്ങളും മനുഷ്യാവകാശ പ്രവർത്തകരുമെല്ലാം ഒരു സ്വതന്ത്ര അന്വേഷണത്തിനാണ്​ മുറവിളി ഉയർത്തുന്നത്​. സി.ബി.ഐ അന്വേഷണം നീതിക്കായുള്ള ആവശ്യത്തെ തൃപ്​തിപ്പെടുത്തില്ലെന്നാണ്​ ഇതിനകം വന്ന പ്രതികരണങ്ങൾ സൂചിപ്പിക്കുന്നത്​.

എന്നാൽ, ഇതുപോലും നിർബന്ധിതാവസ്​ഥയിൽ ചെയ്യേണ്ടിവന്നതാണ്​ യു.പി സർക്കാറിന്​. കോൺഗ്രസ്​ നേതാക്കളായ രാഹുൽ ഗാന്ധിയും പ്രിയങ്ക ഗാന്ധിയും സന്തപ്​ത കുടുംബത്തെ സന്ദർശിക്കുന്നതു​വരെ ചെറുത്ത അധികൃതർ തുടക്കം മുതൽ കുറ്റകൃത്യവും കുറ്റവാളികളെയും മറച്ചുവെക്കാനാണ്​ ശ്രമിച്ചുവന്നിട്ടുള്ളത്​. കുടുംബത്തെ ആശ്വസിപ്പിക്കാനെത്തിയവരെപ്പോലും തടഞ്ഞു. മാധ്യമങ്ങളെ വിലക്കി. കുടുംബത്തെ പൂട്ടിയിട്ടു. ഫോണുകൾ പിടിച്ചുവെച്ചു. ഇതിനെയെല്ലാം മറികടന്ന്​ രാജ്യത്തി​െൻറ മനസ്സാക്ഷി നീതിക്കായി ഉയർത്തുന്ന ശബ്​ദം കുറച്ചെങ്കിലും കേൾക്കാതെ പറ്റില്ലായിരുന്നു. എന്നാൽ, നീതി ലഭ്യമാക്കാൻ ഇതു മതിയാകുമോ? സി.ബി.ഐ ഏറ്റെടുത്ത കേസുകളിൽ സത്യം കണ്ടെത്താനാകുമെന്ന്​ ഉറപ്പുണ്ടായിരുന്ന കാലം എന്നോ കഴിഞ്ഞു.

കൂട്ടിലെ തത്ത എന്നാണ്​, അധികാരികളുടെ ആജ്​ഞാനുവർത്തികളായ സി.ബി.ഐയെ സുപ്രീംകോടതിപോലും വിശേഷിപ്പിച്ചിട്ടുള്ളത്​. സുപ്രീംകോടതിയുടെ മേൽനോട്ടത്തിൽ അന്വേഷണം നടത്തണമെന്ന്​ സന്തപ്​തകുടുംബം ആവശ്യപ്പെട്ടിട്ടുണ്ട്​. പൗരന്മാർക്ക്​ നമ്മുടെ അന്വേഷണ ഏജൻസികളിലും പൊലീസ്​ സംവിധാനങ്ങളിലും വിശ്വാസം വളരെയൊന്നും അവശേഷിക്കുന്നില്ല എന്നു​ കൂടി ഇത്തരം കേസുകളിലെല്ലാം വ്യക്​തമാകുന്നുണ്ട്​. ഹാഥറസ്​​ കേസിൽ ഇതു കൂടുതൽ വ്യക്​തമാണെന്നുമാത്രം. വല്ല സംശയവുമുള്ളവർക്കായി, ഹാഥറസിലെ ബി.ജെ.പി നേതാവ്​ രജ്​വീർ സിങ്​ പഹൽവൻ അന്തിമ കണ്ടെത്തൽ ആദ്യമേ പറഞ്ഞുവെച്ചിരിക്കുന്നു- ബലാത്സംഗം നടത്തിയിട്ടില്ലത്രെ; ആരോപിതർ നിരപരാധികളാണത്രെ; അവരുടെ നിരപരാധിത്വം സി.ബി.ഐ തെളിയിക്കുമത്രെ.

ഉത്തർപ്രദേശിലെ സ്​ത്രീപീഡനങ്ങളുടെ നീണ്ട പട്ടികയിൽ ഒന്നുമാത്രമാണ്​ ഹാഥറസി​ലേത്​. അനേകം ദലിത്​ പീഡനങ്ങളിലും ഒന്നുമാത്രം. ഇത്തരം കേസുകളിൽ നിയമം മേലാളരുടെ വഴിക്കുനീങ്ങുന്ന തുടർക്കഥക്ക്​ യോഗി ആദിത്യനാഥി​െൻറ ഭരണത്തിൽ ആക്കംകൂടിയിരിക്കുകയാണ്​. ഒപ്പം ഒന്നുകൂടി സംഭവിക്കുന്നു. കുറ്റവാളികൾക്ക്​ പൂർണ സ്വാതന്ത്ര്യം ലഭിക്കുന്നുവെന്നുമാത്രമല്ല, തെളിവുകളെല്ലാം നശിപ്പിച്ച്​ കുറ്റവാളികളെ രക്ഷിക്കുന്ന രീതി സ്​ഥാപനവത്​കരിക്കപ്പെട്ടുകൊണ്ടിരിക്കുകയാണ്​. പുതിയ ഇന്ത്യയിൽ ഇത്​ വ്യാപകമാണെങ്കിലും യു.പിയിലാണ്​ അതൊരു വ്യവസായമായി വളർന്നുകൊണ്ടിരിക്കുന്നത്​. ഹാഥറസിൽ ഇത്​ ലജ്ജയില്ലാത്തവിധം പരസ്യമായി എന്നുമാത്രം. ഇരക്ക്​ സുരക്ഷ ലഭിച്ചില്ലെന്നു മാത്രമല്ല, മരണാനന്തര നീതിയും നിഷേധിക്കപ്പെട്ടു.

സെപ്​റ്റംബർ 14ന്​ കുറ്റം നടന്നശേഷം അത്​ മറച്ചുവെക്കാനും കുറ്റവാളികളെ രക്ഷപ്പെടുത്താനും നടന്ന ശ്രമങ്ങൾ ആ കൊലപാതക​െത്തപ്പോലെത്തന്നെ ഞെട്ടിക്കുന്നതാണ്​. ജില്ല മജിസ്​ട്രേറ്റ്​ പാതിരാക്ക്​ ഇരയുടെ മൃതദേഹം ബലംപ്രയോഗിച്ച്​ കത്തിച്ചു. ബന്ധുക്കളെ കാണിച്ചില്ല. കുടുംബാചാരപ്രകാരം പൂജാരി ഉണ്ടായിരുന്നില്ല. പീഡനത്തി​െൻറ ഇരകളുടെ ദേഹം ഇങ്ങനെ ഇരുട്ടിലേക്കെടുത്ത്​ പൊലീസിന്​ കത്തിക്കാൻ പറ്റുമെങ്കിൽ എന്തിനാണ്​ നിയമങ്ങൾ? കേസും തെളിവും അന്വേഷണവുമെല്ലാം പൊലീസി​െൻറ തന്നിഷ്​ടമാകാമെന്ന്​ ഏതു നാട്ടിലാണ്​ നിയമമുള്ളത്? തെളിവു നശിപ്പിക്കാനുള്ള സൂത്രം തന്നെയായിരുന്നു അത്​. അതുപോരെങ്കിൽ കേസ്​ തോൽക്കാൻ വേറെയും വഴികളുണ്ട്​. കുറ്റകൃത്യത്തി​െൻറ ഇരകളെ ഓ​ട്ടോപ്​സിക്കും പോസ്​റ്റ്​മോർട്ടത്തിനും വിധേയരാക്കു​േമ്പാൾ അങ്ങേയറ്റത്തെ സൂക്ഷ്​മതയും കൃത്യതയും ഉണ്ടാകണം. ഹാഥറസ്​ പെൺകുട്ടിയുടെ കാര്യത്തിൽ രണ്ടു​ പരിശോധനകൾ തമ്മിൽ വൈരുധ്യമുണ്ട്​. പേരിലും വയസ്സിലും കുറ്റം നടന്നതി​െൻറ ലക്ഷണങ്ങളിലുമെല്ലാം വ്യത്യാസങ്ങൾ വന്നുകഴിഞ്ഞു. ബലാത്സംഗം നടന്നതിന്​ തെളിവില്ലെന്ന്​ എ.ഡി.ജി.പി പ്രശാന്ത്​കുമാർ പറഞ്ഞത്​ നിയമത്തിൽ പറയുന്ന നിർവചനത്തെ വളച്ചൊടിച്ചാണെന്ന്​ ചൂണ്ടിക്കാണിക്കപ്പെടുന്നു. മരണമൊഴിയിൽ യുവതി പറഞ്ഞ വസ്​തുതയെ നിഷേധിക്കാൻ പാകത്തിൽ കഥകൾ സൃഷ്​ടിക്കപ്പെട്ടുകൊണ്ടിരിക്കുന്നു.

കഥകൾ സൃഷ്​ടിക്കാൻ പബ്ലിക്​ റിലേഷൻസ്​ (പി.ആർ) കമ്പനികൾക്ക്​ കരാർ കൊടുക്കുന്നതായും റിപ്പോർട്ടുവരുന്നു. ഹാഥ​റസിൽ ബലാത്സംഗം നടന്നിട്ടില്ലെന്ന്​ മുംബൈയിലെ ഒരു പി.ആർ കമ്പനി വിദേശ മാധ്യമങ്ങൾക്കടക്കം വാർത്തക്കുറിപ്പ്​ അയക്കുവോളം നമ്മുടെ കുറ്റാന്വേഷണ യന്ത്രം പരിഷ്​കരിക്കപ്പെട്ടിരിക്കുന്നു. ഫോറൻസിക്​ അന്വേഷണവും പ്രാഥമിക മെഡിക്കൽ പരിശോധനയും പോസ്​റ്റ്​മോർട്ടം പരിശോധനയും പീഡനം നടന്നിട്ടില്ലെന്ന്​ വ്യക്​തമാക്കുന്നുണ്ടത്രെ. ഇതൊരു ദുരഭിമാനക്കൊല മാത്രമാണെന്നും പീഡനം കെട്ടുകഥയാണെന്നുമൊക്കെ പുതിയ 'കണ്ടെത്തൽ' അണിയറയിൽ തയാറാ​യിക്കൊണ്ടിരിക്കുന്നു എന്നാണ്​ വിവരം; ജാതിവെറിക്കപ്പുറം കുറ്റമൊന്നും നടന്നിട്ടില്ലെന്ന്​. അന്വേഷണ കേന്ദ്രങ്ങളിലും പ്രചാരണ രംഗത്തും രാഷ്​ട്രീയ മേഖലയിലുമെല്ലാം കുറ്റകൃത്യത്തെ മറച്ചുവെക്കാനും കുറച്ചുകാണിക്കാനും കൊണ്ടുപിടിച്ച്​ ശ്രമം നടക്കു​േമ്പാൾ, അധികാരത്തോട്​ വിധേയത്വം പുലർത്തുന്ന സി.ബി.ഐയെ കേസ്​ ഏൽപിക്കുന്നത്​, അധികൃത ഭാഷ്യത്തിന്​ സാധുത നൽകാനേ സഹായിക്കൂ. നേരു കണ്ടെത്താൻ മാത്രമല്ല, വേണമെങ്കിൽ മറച്ചുവെക്കാനും സമർഥരാണ്​ തങ്ങളെന്ന്​ സി.ബി.ഐ പലകുറി തെളിയിച്ചതാണ്​.