കറാച്ചി: മുൻ നായകൻ വിരാട് കോഹ്ലിക്ക് ഒരുദിവസം നേരത്തെ ജന്മദിനാശംസ നേർന്ന് പാക് താരം. 34ാം പിറന്നാൾ ദിനത്തലേന്നാണ് താരത്തെ അനുമോദിച്ച് പാക് പേസർ ഷാനവാസ് ദഹാനി ട്വിറ്ററിൽ പോസ്റ്റിട്ടത്.
'ക്രിക്കറ്റിനെ ഏറ്റവും മനോഹരമാക്കിമാറ്റിയ കലാകാരനെ അനുമോദിക്കാൻ നവംബർ അഞ്ചു വരെ കാത്തിരിക്കാനാകുന്നില്ല. എക്കാലത്തെയും മികച്ച കളിക്കാരന് ജന്മദിനം നേരുന്നു. നിങ്ങളുടെ ദിനം ആസ്വദിക്കൂ. ലോകത്തിന് ആസ്വാദനം നൽകുന്നത് തുടരൂ''- എന്നായിരുന്നു ട്വീറ്റ്. ഇന്ത്യയിൽ മാത്രമല്ല, മുഹമ്മദ് ആമിർ, ബാബർ അഅ്സം, ഹാരിസ് റഊഫ് തുടങ്ങി പാകിസ്താനിലും ഏറെ ആരാധകരുള്ള താരമാണ് കോഹ്ലി.
പിറന്നാൾ ദിനത്തിൽ സമൂഹ മാധ്യമങ്ങളിലും അല്ലാതെയും കോഹ്ലിക്ക് ആശംസ നേർന്ന് നിരവധി പേർ എത്തി. ക്രിക്കറ്റ് കണ്ട ഏറ്റവും മികച്ച താരങ്ങളിലൊരാൾക്ക് ആശംസ നേരുന്നതായി മുൻനിര താരങ്ങളും കുറിച്ചു.
ഓസീസ് മണ്ണിൽ അരങ്ങേറുന്ന ട്വന്റി20 ലോകകപ്പിൽ ടീം ഇന്ത്യക്കായി പാകിസ്താനെതിരെ പുറത്താകാതെ കുറിച്ച 82 റൺസ് വിജയത്തിൽ നിർണായകമായിരുന്നു. കഴിഞ്ഞ നാലു കളികളിൽ ഇതുവരെ 220 റൺസ് എടുത്തിട്ടുണ്ട്. ഇവയിൽ ഒരു തവണ മാത്രമാണ് പുറത്തായത്. ടൂർണമെന്റിൽ കോഹ്ലി മൂന്ന് അർധ സെഞ്ച്വറികളും സ്വന്തം പേരിൽ കുറിച്ചിട്ടുണ്ട്.
പാകിസ്താനാകട്ടെ, നാലു കളികളിൽ രണ്ടെണ്ണം മാത്രം ജയിച്ച് പുറത്താകലിന്റെ വക്കിലാണ്. ഇന്ത്യക്കു പുറമെ സിംബാബ്വെയോടും ടീം തോറ്റിരുന്നു. നെതർലൻഡ്സ്, ദക്ഷിണാഫ്രിക്ക ടീമുകൾക്കെതിരെ ജയിച്ചിട്ടുണ്ടെങ്കിലും പോയിന്റ് പട്ടികയിൽ മൂന്നാമതാണ്. ഗ്രൂപ് രണ്ടിൽ ഇതുവരെയും ഒരു ടീമും സെമി ഉറപ്പാക്കിയിട്ടില്ല.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.